iphone 香港行貨上市日期

呢排史提芬為左迎接復活節，都真係忙到爆。

就係呢排咁忙既時候，網上傳出香港數碼通會出iPhone的消息。

雖則數碼通好快就否認左，咁香港行貨究竟幾時會有？

史提芬夫係行內都成日聽，香港好快會有iPhone行貨，仲定實曬日子，一係4月、一係就8月咁話。

仲有人係行內估，最大機會合作的係HKCSL、PCCW或者數碼通。

最爆的係，有勁多人話，香港版的iPhone已到左香港蘋果總部，只是等找一間電訊商合作而已。

嘩！咁史提芬夫就走去搵香港蘋果問下啦，佢地口好密，淨係同我講，話08年內一定有行貨iPhone。史提芬夫同香港蘋果講，我唔信。咁香港蘋果就好正斗咁話：香港市場咁大，邊有可能唔出？

下？香港市場大真係第一次聽。攪到我真係唔知信唔信香港有iPhone好。

史提芬夫覺得，除非6月Apple WWDC的會議上爆出一個3G iPhone，唔係香港出都幾難。

你諗下，若果仲係超級落後的2G EDGE，香港仲有邊間有得用EDGE？數埋只係得Peoples同HKCSL。

Peoples係大陸阿爺，最討厭蘋果個種食水超深的合作方式，真係啋你都傻。而HKCSL和HTC合作出的機，雙方分帳亦都無iPhone咁離譜。但由於佢同HTC合作開，HKCSL會否應承蘋果真係機會不大。

好啦。咁你話其餘個幾間3G台為主的PCCW, Smartone 和3，佢地會唔會因為一部iPhone而行番轉頭，俾錢再投資番舊技術2G？

不要忘記，香港蘋果的超級霸道的分帳方式，俾你係3香港主席，你會唔會咁笨俾錢蘋果賺，自己就賺少少？

世界無絕對。史提芬夫唔敢講香港唔會有行貨iPhone出，但香港技術都就黎去到4G，iPhone仲係上世紀的2G，除非佢出3G，唔係既話係香港銷情肯定唔多好。

香港有行貨, 好難講,
1. 香港地方同巿場根本唔大
2. apple 唔只charge 部機, 佢連網絡商都會收charge, 有邊間網絡商肯制真係勁難講
3. 唔只呢樣野, 仲有itune store, 香港仲未有account 比你online 買歌, 咁第日點買軟件
4. 而家話出3g 版又話六月, 又話四月 都係外國既投資專家估計only

我覺得hi.....唔係自己回答,我問過先達廣場0既人,佢地話今年8月會出iPhone,我都好想快d買,但要係全級10名入邊先買到,hope今年8月真係出,唔好再拖啦!