攞到返黎先知狗狗感冒食緊藥(26/3係東方睇),話已經睇左兩次醫生。
我地keep住餵佢食藥,狗狗幾生猛架...不過都仲有咳,瞓覺果陣呼吸唔係太順。我地以為佢係氣管唔好。
到11/4狗狗肚痾我地12/4帶佢去東方睇,醫生話佢有發燒, 咳得幾勁,有啖,幫我地做狗瘟&腸炎測試。
等o左10分鐘,腸冇事,但係狗瘟係陽性反應。
之後姑娘攞o左張狗瘟資料o既紙出o黎,話狗瘟冇藥醫,叫我地去維多利吊盬水。然後我地問佢有冇藥食,佢先入去問醫生,再話開d抗生素同止屙藥俾我地。之後問o左佢狗狗仲有幾耐命,姑娘話要睇佢抵抗力,再問佢狗狗既情況去到咩階段,佢先再入去問醫生話係後期。
我一聽到狗狗有狗瘟之後成個呆o左...到走左先諗到...點解唔再安排醫生同我地講番狗狗既病情呢...如果我唔問,你咪唔同我講狗狗依家係咩情況囉。
狗狗依家仲識走識跳,好為食。
睇醫生之前仲追住隻大狗咬,我好難相信佢o既狗瘟已經去到後期。
我應該睇多兩日先定係趁仲有得救轉醫生....
究竟我狗狗係咪好嚴重啊?
我見大家都介紹去麥子健睇,係咪要預約o左先架?要等幾耐?
我要救番狗狗要用幾多$...我真係唔想放棄佢 /____\
現階段我要點照顧狗狗?
我見有朋友餵佢愛犬飲葡萄糖(係咪葡萄靈?)
食雞肉...(我狗狗仲食到o野...駛唔駛餵雞肉?)
暖水袋...(依家咁熱駛唔駛俾佢用暖水袋?)
聞蒸氣...
希望你地可以比d意見我!Thanks a lot!!
多謝大家o既關心 ^^ 多謝kafai0724, 你俾o左希望我!! 狗狗今日都好精神...便便冇之前咁爛, 不過應該仲有d燒(額頭熱熱o地)。 胃口超大...食餅餅再撈d營養濕糧, 下晝烚o左d雞肉佢食。 個肚仔脹卜卜~(係咪唔應該食咁多?) 不過狗狗唔鍾意食藥(藥水用針筒餵), 越o黎越難餵。 今日打o左去何大成o既診所, 何醫生仍然係唔收新證。 之後再打去麥子健o既診所, 姑娘問o左狗狗o既病徵,再叫我地Fax番個病歷過去。 要等醫生睇完再約時間...(如冇意外聽日應該有得睇..) 希望醫生收我狗狗證啦~
多謝kafai0724仍然有留意我狗狗o既情況!! 呢幾日發生o左好多事...真係俾狗狗嚇到我心都跳埋出o黎。 4/14 12pm左右狗狗突然之間抽筋...抽到側埋o左一邊,持續o左3-4分鐘。 我哥哥話佢唔知捱唔捱到出去睇醫生...嘩!真係嚇我到成個失哂魂。 其實當日朝日已經打o左去太平道, 不過仲未覆幾時有得睇。抽筋之後我再打去, 姑娘幫我check完覆番我, 麥醫生做緊大手術...未知幾時可以幫我狗狗睇, 叫我轉其他醫生好唔好。但之前有朋友介紹我地去寶湖, 所以即刻打過去...佢可以等到我地1:15pm。
其實狗狗抽完之後開始企得番又肯食o野...個樣唔似病,不過都係睇o左醫生會放心d。 等o左陣..入去睇,醫生好詳細問番狗狗o既一d問題, 又好細心幫佢眼仔&腳仔...等。 結果: 狗狗現階段o既病徵同狗瘟並唔係太相似, 因為狗狗冇眼紅, 手硬, 抽筋o既情況亦唔相同。佢唔相信之前係東方做果個測試, 因為有好多因素會影響到測試結果, 不過並唔代表狗狗冇狗瘟, 要觀察番佢o既情況, 佢亦叫o左我地做抽痰化驗, 睇下種到d咩菌。又俾o左d藥我地試, 同埋聞o左氣(連續幾日都要去)。 結論: 現階段狗狗係上呼吸道感染
4/13 朝早狗狗唔係點肯食o野...好似好攰 之後去o左寶湖聞氣, 姑娘話用針筒餵佢食... 到下晝又正常番d, 肯自己食番野。 因為寶湖個醫生話佢瘦(肥o係個肚仔), 要我地一日餵四餐, 所以我又另外再俾d雞肉俾食。 但係八點幾左右...狗狗突然間好似抽筋咁... 個身側埋一邊, 隻腳怪怪地又不斷喊。 睇見都心痛...之後即刻影低狗狗o既情況可以俾醫生睇。 當時好擔心佢係狗瘟上腦..所以要同俾我打擾過o既診所講聲唔好意思。
狗狗持續痛o左個半鐘, 之後我地先去到太平道睇急診。 醫生睇o左d片, 話狗狗唔係狗瘟抽筋, 再睇佢d腳仔發現佢左腳波羅蓋係先天移位。 不幸中o既大幸, 腳唔好可以做手術...但係狗瘟上腦就手尾長。 結論: 1. 腳o既問題..要1歲左右先做手術 2. 上呼吸道感染 (或者可能係狗瘟or狗房咳 另外我想問, 佢係東方驗到有狗瘟之前同隻10歲既八哥玩過 & 飲過同一兜水..不過唔多, 我一知佢有狗瘟即刻收起大狗既狗兜...等消毒(狗兜&全屋地板)哂先俾佢用, 咁我隻大狗會唔會有事?
