點解宜家咁多人連基本金融知識都無就去買股票既? 特別係D學生

呢樣野我幾有感受，因為我都係一個學生而已。
初初我會玩，因為發覺原來錢係咁易搵！我係上年一月先開始玩，之後好快就到細價股熱潮，雞犬皆升，我阿媽日日都話賺錢，仲要下下都幾千幾千咁賺，我就開始有興趣。之後開始玩，見只要買細價股就有運行，每日就留係報價機面前用Ｉ－ＢＡＮＫ不斷買賣。果陣岩岩會考完，輕鬆冇野做，就日日煲，真係愈玩愈狂。但果陣我已知基本的技術分析手法，玩細價股亦都只係靠呢樣野去做判斷及買賣。結果後來Ｄ細價野一沉不起，自己又死守唔走，結果埋單計數，都只係賺雞碎咁多，之前幾倍的利潤變晒一場夢。
其實之前個市咩都升，已經吸引到好多乜都未識，咩股災都未見過既年輕人入市，心諗亂點都中，賺錢原來咁容易，結果就衰到貼晒地。
但其實學生買股既熱潮，應該係上年大升一萬點果陣先出現。果陣就真係咩都升（除左細價股），大藍籌同國企都可以一日５～６％係咁上唔停，報紙日日大市標題，新聞又日日播，年青人未見過世面，而平時又好多野想買，所以係心知買優質股就冇死的大前提之下，就一窩蜂結伴炒股。Ｄ心境寧靜，踏實既同學見到身邊其他人大賺得賺，大大晒命，自然會受影響，結果就個個都中招，心諗呢個係一個瘋狂年代，個個都係盲目，所以自己都目空一切去投入。
但佢地唔知，消息可以一日之間令氣氛徹底倒轉，而蝕緊果陣又死不認輸，認為係調整，結果愈調愈深時，又話終有一日會沙彈，結果還是頂唔順而斬倉，咩都嘔番晒。
其實一字以蔽之，就係一個”貪”字。佢地讀書咁辛苦，係為左大個搵錢；而專心炒股，分分鐘一日賺到人地一個月的人工，心裡面想買咩即時可以實現。面對付出同收益一個咁大的不成比例，自然就好難抗拒唔去炒股。
而佢地之所以唔學就去玩，主要係因為佢地認為呢Ｄ野唔等駛，用直覺去點，聽所謂專家廢ＵＰ去買，就自然做到高賣低買＜－－起碼佢地果幾個月真係可以全憑直覺，報紙貼士同埋財經演員去買，然後賺錢。就係咁，佢地利用佢地有限的經驗去判斷，反而就忽略左可能的危險，就變相咁鬼勇。
如果依家叫果Ｄ爭人周身債果Ｄ炒股學生去買呢隻買果隻，佢地走都走唔切，就已經無勇可言了。

我覺得無乜所謂啦, 反正好多時炒股票係要交學費先學到.....
報紙報得太多少年股神啦, 所以後生仔以為炒股好容易, 乜野五萬變一百萬, 點知未賺到就跌入大戶口中做點心...