何謂實力股?

係決定揀咩股票之前，要搞清自己想玩短線還是長線。
想炒短線波幅從而賺差價者，揀股可以彈性Ｄ，可以揀／唔揀實力股，通常非實力股中大多數都係細價股，咁我就用細價股做例子。Ｄ毫子股／仙股可以話係在香港的股票市場厄飯食，冇基本因素，純粹提供一個平台俾愛滑浪的炒家玩數字遊戲。因為佢地一係唔郁，　一係就驚為天人地上落，加上股價細，入場限制低，所以好受散戶及師奶歡迎。玩短線，我當係買完，最多隔幾日就走果Ｄ，基本上唔駛同間公司過人世，玩厭左可以換，只係芸芸垃圾中揀一Ｄ來炒。但揀得呢Ｄ非實力股，有幾樣野要有心理準備：　
1. 一係大賺，一係大蝕斬盤離場
2. 隻股可能係你買賣完後就撞正停左牌，然後如果有咩大事要傾，分分鐘隔好耐先復牌，又或者復牌之後又話咩計劃失敗左，告吹左，然後又趁勢跌到一仆一碌。有Ｄ垃圾股如果違反上司規則，分分鐘一停冇回頭添。記得上年隻股仔202一停牌就停左2~3個月，Ｄ資金完全壓死晒係隻垃圾股的人自然日日冇覺好訓。
3. 呢D股咁大波幅，又冇基本因素支持，一跌分分鐘要等好多個月先再升起，基本上未來走勢得個估字。一買完就跌，你就會成日心掛掛，不斷掙扎：究竟賣好定等到佢反彈？唔賣既話，繼續跌唔升咁點？賣既話，會唔會又升番架？總之就好多天使魔鬼對話。
講真，我真係唔建議買細價股炒波幅，因為我會覺得日日擔驚受怕先搵到呢Ｄ辛苦錢，一日都唔知死左幾多細胞，倒不如踏實Ｄ長線投資好過，起碼心安理得先。但如果隻股真係跌到去冇得再跌既地步，如現時唔少股仔都跌到只係係谷底橫行，咁反而可以小注買入搏下大霧。但要記得小注，萬一停牌都冇咁大影響。
短線炒實力股方面，依家港股受美國及內地股市雙重影響下，每日波幅的確好大，尤其呢排美國造好，又來內地造淡，總之兩地相反咁走，就令港股呢塊夾心大上大落。多得佢地將港股舞高弄低，令不少紅籌，藍籌，國企，中資股波幅都頗大，有時揸幾日就賺／蝕１０％。其實如果你可以低買高賣呢Ｄ大隻佬，不妨都係一種策略。依家我見好多人都係用緊不差炒差價的方法將股本極大化。但你既然做得短線，就要記得賺多好縮，蝕多好斬，唔好留戀不捨。銖多人賣左之後見個價仲不斷升，就會好後悔，但其實呢家野唔後悔得咁多，因為冇人可以做到真正最高賣最低買，成日咁樣責怪自己只係冇野搵野煩。實力股好處就係間公司質素好，買左唔驚佢會執笠，即係唔驚渣都冇。有Ｄ人短線要炒賣，結果帳面一蝕錢就即時改口話長揸。起碼呢Ｄ野長揸都一定返到家鄉，但細價股就真係唔敢包。
話明短線，時勢最重要，氣氛都重要，一見外圍市況轉壞，又或者投資者信心明顯改變，又或者環球金融業前景又變得不明朗等，又或者果日沽壓沉重，以上種種情況都會對依家脆弱的港股造成好大影響及波動，稍一不慎就好易坐艇。之前見好多基建股及資源股詢基金洗倉，一日可以１０幾％咁跌，就可以肯定係呢Ｄ亂世，基本因素並唔係短線的考慮點。
講完短線講長線。長線既話，行業前景最緊要，公司實力都係其次。一間公司好有實力，但若果果個行業冇前景，其實根本就冇值得投資的地方。例如Ａ公司成本處理得宜，市場佔有率高，管理層經驗豐富，營銷策略穩健，流動資產質素良好等多種特徵都齊，但原來佢係做紡織業的，咁又有咩值得留意呢？紡織業全盛期晨早就過左，根本就冇咩可以再進步既空間，只係穩定經營，咁絕對係令人失望的。因此，揀股票首先要揀行業，要係有遠景及有市場，有潛力壯大的行業，然後再從該行業中揀選有強勁經營效益的公司作最終的投資目標。就以中交建(#1800)為例，佢係全國最大型基建承辦商之一，而依家中國好多基礎建設尚未開始，地大物博，好多地方未開發，而#1800同時擁有海外市場如越南, 印度等發展中國家的市場份額，生意做唔完，已經係一個有前景的行業。睇番佢股價，上市果陣只係3~4蚊，過左年幾之後，股價升左幾倍。呢Ｄ就係高增長股再配合亮麗前景後得番來的估值。長線投資的收益，比起你平時經常買賣，有賺有蝕 心驚膽戰所得到，應該更加多。所以我不嬲都支持係低位買貨，長線投資，一日基本因素未變又或者未等錢洗，都繼續持有。
至於”心水”，我會理解為自己的直覺。我阿媽都好鍾意靠直覺買股，技術分析同基本因素都唔會睇，所以只係覺得賭緊大細，完全係極度危險既行為。Ｄ錢自己辛辛苦苦搵返來，點知過一陣就冇左，你話幾心痛。
以上大概就係我既投資心得，希望你能夠揀選自合適自己既玩法，係股場中得益。


2008-04-02 22:03:54 補充：
＊＊希望發問者能盡責，選出心中的最佳者，以免浪費好答案和作答者的心血。