急凍阿拉斯加蟹腳~~點整呀????

首先食之前一日將蟹腳從冰格取出轉放在雪柜下層以徹底溶雪(因室温環境溶雪易生細菌), 之後取出睇吓如果D邊邊有凍傷就剪咗佢, 外國人多數就咁凍食, 可配cocktail sauce(食生蠔時嗰D類似茄汁的sauce, City super有現成樽裝的賣), 你鐘意嘅可配蒜蓉白醋或薑蓉镇江醋食(要加少許黄糖), 又可以蒸番熱點上述的醋食. 鐘意嘅話可以將D蟹腳斬成適當大小後用薑葱炒, 椒塩都得, 總之用平常整蟹嘅方法都ok.

薑葱炒
以薑片及葱段起鑊爆香蟹腳, 在鑊邊灒少少酒兜勻, 加少少水及調味然後冚蓋收至中火煮約兩分鐘至熱透.(因D蟹係熟嘅, 唔使亦唔好煑太耐.)

椒塩炒
將蟹腳撲少少干粉後走油後撈起瀝干油(等D蟹干身少少, 故此火要猛但炸分零鐘便可), 另以少少油加蒜蓉及紅椒粒(怕辣可免)起鑊, 落蟹爆香, 可灒少少酒(唔好太多, 約半瓶蓋便可), 再落-醃味寶-(唔記得係唔係家樂牌, 一盒兩三包嘅調味粉, 有幾隻flavour, 要揀椒塩口味)兜勻, 唔好落哂一包, 落些少試過唔够再落.