✔ 最佳答案
鼠鼠有冇甩毛見到見肉?有冇抓損自己?點睇到佢係抓到訓唔到?
A.有幾樣野要留意返:
1)你話見到有蚤,係點樣睇到既呢?好近睇定係一般距離?
鼠鼠既蚤係好細,好近睇多數只睇到有好細好細點野郁緊,你可以試下用電筒照住近睇,咁會易睇d,如果所睇到既唔係咁細,就要留意返會唔會係食物既寄生昆虫呢?檢查所有食物及草之類睇下有冇,有既話就要盡快更換
2)抓既情況會唔會只係平日鼠鼠自己沖涼既咁?
鼠鼠好喜歡乾淨,所以成日都會舔同抓自己,有冇過度地抓就要留意返了
3)幾時開始日日沖涼?
在一般情況下,鼠鼠係唔可以日日沖涼既,如果皮膚冇問題又日日沖既話,反而會令鼠鼠抵抗力下降,更易患皮膚病
B.如果肯定左真係有蚤既話,鼠鼠多數會有甩毛既問題,都好易會抓損自己,可以買一d小動物專用既殺蚤水,唔好噴太多,噴埋籠同用品,但你要真係知道係有蚤先得
如果唔係有蚤甩毛甩到見肉,冇其他病徵,咁就可能係皮膚病了,皮膚病好少會致命既,唔洗太擔心,但都要留意下有D情況都會甩毛:
1)檢查下鼠鼠排尿有冇問題,膀胱or腎有事都會令鼠鼠有皮膚病,咁就要先根治引起皮膚病既問題先
2)檢查一下甩毛既地方會唔會生粒粒,生瘡or腫瘤都會令鼠鼠該位置甩毛,咁就唔係皮膚病,要處理好瘡or腫瘤先
C.有皮膚病既做法:(除左4,5,有蚤都同樣要留意以下問題)
1)有第隻鼠既話要分籠,避免傳染or第隻鼠乘機打病既鼠(不過鼠鼠其實係獨居動物,分開住會好d)
2)仔細檢查鼠鼠既食物,會唔會有寄生物,有時有既話未必咁易睇到,呢d寄生物都會令鼠鼠甩毛既
3)有皮膚病就要保持個籠乾爽清潔
4)同鼠鼠每日用藥性沖涼粉沖涼,之後噴/搽藥皮膚病既藥水,藥水應該好多有賣鼠用品既地方都會有,買既時候記得睇下有效日期.
藥水噴落傷口既時候,鼠鼠既反應會好大,我諗應該幾痛啦,所以下次噴就會更難,鼠鼠會反抗愈唻愈大,小心d唔好因為咁而噴到鼠鼠既眼耳口鼻.如果脫毛既地方接近頭部/擔心會噴得唔好,就可以用棉花棒同鼠鼠搽藥.
5)有俾鼠鼠飲既皮膚病內服藥水,叫"美毛素",如果買到都可以加入鼠鼠飲用既水度俾鼠鼠飲,雖然效果比較慢,但唔洗噴藥咁難.價錢就比較貴,大約$55-70,買既時候記得睇下有效日期.
6)唔好俾零食俾鼠鼠食,戒下口先,曾經有鼠店既人話,食人食既食物都會引致有皮膚病,而人既食物其實一般都唔適合鼠鼠,所以唔俾鼠鼠食都係好既.
7)唔好用有色or有味既木糠,因為呢d都好易令鼠鼠皮膚敏感,敏感嚴重起唻係會致命既
8)當然可以直接帶佢睇醫生啦. .睇醫生既話可以考慮一下:
大圍珍禽異獸及寵物醫院 DR.TIGER/DR.LAM
Tel: 2687 1030地址:大圍積信街75號地下
http://www.taiwaiexotic.com/
愛護動物協會診所資料:(需入會) Dr. Corla DeWet
http://www.spca.org.hk/chi/vet/vetclinic.html
愛護動物協會流動醫療車資料:
http://www.spca.org.hk/chi/vet/moclinic.html
D.另外,其實鼠鼠最好分籠,如果唔同性別,繁殖鼠鼠會有好多問題,所以就算鼠鼠冇事,都希望你可以將鼠鼠分籠,我自己一籠一鼠左好耐,鼠鼠身體都好D,唔會被打,又少受驚,我既鼠多數都係老死OR年老腫瘤而死(當然配合返唔亂食野,同適當地對鼠鼠啦),建議分籠原因如下:
1)倉鼠天生根本就係獨居動物,根本唔適合群居,就算兄弟姊妹,同性別or唔同性別,都一樣可以打到死晒.睇書知道,外國既鼠鼠繁殖場都係一籠放一隻鼠,到發情期先放埋一齊一陣既
2)鼠鼠既繁殖速度好快,而且繁殖鼠鼠有好多問題(例如鼠媽媽有機會會食bb,bb未戒奶就打交但又唔分開得),就算樣樣都解決到,都會令鼠鼠既生活質素下降,鼠媽媽生育後壽命又會縮短(甚至難產),好多隻鼠又會有第d問題,所以真係唔好俾鼠鼠生bb呢
3)可能你會話鼠店既鼠咁多隻一齊都冇事,但鼠店既鼠仲好細,所以唔會打得好犀利,而且你睇到鼠店既鼠既時間都未到深夜,唔係鼠鼠最活躍既時候,所以未必俾你見到有咩問題.但我曾經見過,鼠店一堆鼠入面,有隻鼠已經得返d白骨...所以鼠店講既野,,唔好盡信,鼠店有鼠死左都唔會俾客人知呢
4) 就算兩隻鼠初初唔打交,其實之後都好易再打,特別係鼠鼠夜晚活動既多,半夜打起上唻,你又唔知既時候,仲危險.我細個既時候都試過覺得2隻鼠好似好fd咁放埋一齊,同一胎,我出去一陣返唻就打死晒啦
5)可能會諗鼠鼠會怕悶,但其實鼠鼠天生獨來獨往,只要有足夠既空間同運動(一個轉輪都ok啦),鼠鼠就唔會悶
2008-03-25 22:35:47 補充：
咁可能係肚瀉令鼠鼠甩毛or有蚤,咁既話要先處理好肚瀉既問題先
亂食野有機會令鼠鼠肚瀉,除左鼠糧同草之外仲有冇俾過咩俾鼠鼠食?暫時只俾鼠糧俾鼠鼠食先,其他咩都唔好俾
而你兩隻鼠一齊住,都會有機會因感到壓力而肚瀉,加上肚瀉係傳染病,都一定要隔離兩隻鼠
肚瀉既詳細處理方法可參考以下我回答既知識:
http://hk.knowledge.yahoo.com/question/question?qid=7008011903307
