女仔突然180度態度轉變

我同佢網上識既，後期熟左就同佢出黎溫書，幫個女仔預備會考

我慢慢鍾意左佢，但係冇話佢知，平時佢同我都有傾msn，又好鍾意同我講下笑，佢仲好多謝我走到好遠去佢個邊教佢野

情人節（不過唔係14號，係16號）個時仲送左一盒朱古力，一束花比佢，佢好開心，但大家有d事唔得閒，成個月之後先再見面，見面時係白色情人節，佢收到我一對耳環同頸鍊，佢好開心

本身想約佢星期6再溫書，但係星期3就再搵佢唔到，msn唔on，電話唔覆，sms唔理

xanga佢就話「話不投機半句多」，唔知係咪同我講，第2日佢又寫「其實我都很小氣」又唔知佢係咪話我

打左n咁多次，後期電話通左，點知係佢既朋友，佢兩個一齊呃我，話個女仔放低左電話比佢，所以冇人聽，我唔信，就算佢點大頭蝦都唔會咁，仲要3日唔聽電話？我知佢後期仲同朋友去左教會玩

我再搵左佢好多次，最後佢終於覆左我sms，佢話對唔住我，又話自己任性會傷害好多錫佢既人，但係佢話唔想去解釋d咩，佢有佢既困難，有要面對既野，話好對我唔住

佢當日寫xanga寫得好灰，話自己任性，話自己幼稚唔成熟，話佢好內疚，我同佢個晚都完全訓唔到

我喊左好耐，真係好唔開心，我自問對佢無微不至，冇做過對佢唔住既事，但係冇端端就咁對我？約佢出黎傾又推3推4

我再忍唔住，用sms同佢講，我好鍾意佢，我冇怪責過佢，求佢覆返我，但佢再冇覆我，電話留言又唔覆call

我到底做錯咩喎？佢到底諗咩？我完全冇頭緒，件事就快成個星期喇，我真係唔想冇左佢