屋苑高級保安員要注意什麼？

你唔使驚, 保安行業唔會好似其他行業咁挑剔, 我曾經做個保安公司的HR, 亦請過唔少保安, 以下是我過往替公司請人的準則:

對於$5000-$6000月薪的12小時更保安員職位:

對於咁少錢o既職位, 如果太挑剔, 真係想請夠人開工都幾難, 所以只要見工者手腳及五官健全, 能講廣東話(講得唔正都唔緊要), 中文書寫方面, 能夠填得掂張簡單o既入職申請表, 年紀在55歲以下, 即請也.

見工問D乜? 單憑觀察以上條件已經可以決定請唔請佢, 冇嘢問.

對於$6000-$7000月薪的12小時更保安員職位:

人工多啲, 要求自然高啲, 一般這類職位要求對方要中三畢業, 略懂英語, 廣東話流利, 五音不全者免問, 有保安人員許可證, 一年保安經驗優先.

見工問D乜? 單憑觀察以上條件已經可以決定請唔請佢, 冇嘢問.

對於$7000-$8000月薪的12小時更保安員職位:

這類職位要求中五程度(考得衰都唔緊要), 或者係中三加一年保安經驗, 需樣貎端正, 唔可以留「蘇」, 唔需要太高大, 亦唔可以太細粒, 約五呎半已經可以,有保安人員許可證.

見工問D乜? 問吓點解申請E個職位就算, 冇咩好問. 至於請唔請, 係是乎當時人會唔會牛頭唔撘馬嘴, 同埋合唔合乎以上條件和人手有幾短缺.

對於$8000-$9000月薪的12小時更保安員職位:

這類職位需能出示中五會考證書(有幾科合格機會增加, 但係考得衰都唔緊要), 及一年以上保安經驗, 高大靚仔(6呎高), 不可以光頭及留「蘇」.

見工問D乜? 問吓點解申請E個職位就算, 冇咩好問. 至於請唔請, 係是乎當時人會唔會牛頭唔撘馬嘴, 同埋合唔合乎以上條件和人手有幾短缺.

保安業的情況

上述只是保安員的要求, 如果係保安隊目或幫辦, 情況就會唔同. 保安員的面試是咁多個行業當中, 最容易過的, 你不需擔心, 只要答案似返個正常人就冇問題.

選擇員工的基本態度(面試官怕你唔肯做多過你怕佢唔請):

好多時面試官會唔夠膽問你咁多嘢, 驚嚇怕咗你, 你唔肯加入佢間公司, 因為保安多數係每日十二小時零十五分鐘工作, 工時長令流失率高到爆, 但又需要好多人手, 一有空缺就要很快請人填補, 否則會俾業委會炳到你上天花版, 所以什麼「你做開文員, 點解會轉保安咁無厘頭?」之類的較困難問題是幾乎不會問的, 如果真係問到, 你隨便答佢一句:「因為我要開飯」, 佢都會接受, 請唔請你通常最決定性的因素是你的外貎, 身高, 學歷與經驗, 而唔係你o既對答.

同是天涯淪落人:

記得十幾年前, 我於科技學院電腦學高級文憑畢業後, 揾唔到嘢做, 第一份工作便是月薪$5200的12小時車場保安員, 當時的情況, 跟你有點相似, 由一個field轉到另一個完全唔同o既field, 十幾年前做保安好多黑暗嘢, 因為有關當局的規管極少, D同事好多都同黑社會有關, 試過俾人嫁禍屈我貪汚, 好彩人間有情, 有正義o既街坊證人還我清白, 又試過做做吓幫辦俾另一位同事用錢向經理買咗個職位, 又試過成隊保安同貨車佬一齊開片, 躲埋一邊報警又俾上司鬧「若我們打輸了, 你就話報警揾差佬救命嗻, 現在我們打勝了, 點解你報警拉自己人?」

現時有法例規定, 沒有保安人員許可證就唔做得保安, 而有案低的人多數攞唔到證, 所以而家保安業的同事與上司都是良好市民, 前途一片光明, 你既然做開文員, 文化程度不差, 是大有前途的, 不過你又攞咗保安人員許可證未呢? 如果未, 快D去各大僱員再培訓局機構報名受訓, 跟住上警署攞返個證, 這會大大增加你成功的機會.

保安公司的保安員晋升機會(注意: 間間公司職銜與架構有少少唔同):

保安員-高級保安員-保安隊目-高級保安隊目-保安副督察-保安督察-高級保安督察-保安總督察-保安經理

物業管理公司的保安員晋升機會(注意: 間間公司職銜與架構有少少唔同):

保安員-高級保安員-保安隊目-保安督察-保安總長-管業助理(新入職的需大專程度)-助理管業主任-管業主任-高級管業主任-管業經理-高級管業經理-總裁

如果你有政府認可的高級文憑或大學學位, 而學科又係工程, 翻譯, 工商管理, 社會科學或電腦, 你取得保安證後, 可以試吓去「港專」或其他再培訓機構讀物業管理再培訓課程, 之後去申請物業管理公司的管業助理, 到時你就可以有$7-8K月薪同埋朝九晚六, 唔使十二小時工作.

2008-03-21 12:31:04 補充：
Congratulation, 「弓」喜你唔使好似我咁由最低果級做起, 每個地方(site)的隊目都有唔同職責, 如果係私人屋苑, 隊目通常係:

(1) 巡邏, 寫每日巡樓報告, 報告返邊度壞燈, 垃圾多, 消防候慢性漏水...等等.

(2) 應召到場處理: 趕保險Sales走, 趕有線電視Sales落樓, 收爛數淋油影相, 趕收數佬走, 老爆影相及善後, 交通失事, 懷疑漏煤氣/石油氣, 火警, 爆水候, 困升降機, 單位冇電或冇水....總之一言難盡.

2008-03-21 12:31:23 補充：
(3) 火警演習, 屋苑過年過節佈置

(4) 可能有機會使用電腦, 印鐘棒的巡邏報告, 又或者幫管理處手接聽電話, 打中英文通告及張貼, 數吓管理費單, 計吓應收未收賬.

(5) 睇吓公司有冇下放權力俾你, 如果有, 你要supervise 座頭保安員, 檢舉佢地訓覺, 有D會截斷閉路電視電源來煲水, 你要處理這些不當行為.

2008-03-21 12:49:53 補充：
唔記得咗答你隊目係D乜嘢, 宜家補返:

保安隊目算係保安員的半個上司, 通常冇固定岡位, 周圍巡邏及應召到場處理問題, 如果你有讀過管理學, 你會知道一間公司的organisational structure裏, 每一級通常都是一個上司對4個下屬, 亦即每4-6個文員/高級文員就有一個主任/高級主任, 每4-6個主任/高級主任就有一個經理...如此類推, 跟據專家分柝, 1:4-6是理想模式, 對公司有很大效益.

2008-03-21 12:50:21 補充：
保安業亦跟隨此工商管理模式, 但是由於此乃人手密集行業, 所以係採取1:4模式, 即每4個保安肙/高級保安員就有1個隊目/高級隊目睇住佢地, 每4個保安隊目/高級隊目就有一個保安督察supervise, 每4個督察就有一個保安經理.

睇下你要去咩盤啦,一般英文就可以同埋你會唔會慣企足成日囉,同埋有啲體力勞動,要有customer service囉,基本上唔難囉!有問題可以再問我呀