今年7月想去旅行，有乜目的地既好提議呢？

如果樓主有較為充裕既條件，我梗係推介你去歐洲。近排我計劃過去意大利加瑞士，如果好慳，齊頭$20000同八日就搞店。其實如果樓主唔想太趕同勁慳，唔去瑞士，剩係遊意大利都好，行程可以包括羅馬、佛羅倫斯加比薩、威尼斯，如果時間同預算許可當然可以遊埋米蘭。

唔想去意大利，我會推介倫敦加巴黎，呢個行程時間唔會好長，十日啱啱好，而預算大約係$15000左右。

如果樓主可以再預多兩、三日時間，去阿拉斯加搭郵輪睇冰川都幾好。全程應該唔會過$20000蚊，好彩既話你仲有機會睇到極光添。七月去應該唔錯，起碼無咁凍。唔駛驚夏天無冰川睇，冰川係長年存在而嗰度既夏天都係好涼既，只不過冬天就凍到零下廿幾度咁解，所以夏天去就ok。

如果樓主想要陽光與海灘，去馬爾代夫都幾好，用$13,000左右。不過唔知七用會唔會好熱，另外嗰度只係玩死一個島，所以都可以幾悶，最好搵人陪你去。

如果樓主出唔到多錢，去中國旅行就係最明智既選擇。中國歷史太悠久，而中國文化又太獨特，西方好多人望到頸都長都係想黎中國旅行，對佢地黎講，去中國旅行就好似我地去歐洲一樣幾乎變成一個朝聖之旅。我地身為中國人，近水樓台，自然要番中國玩下。去中國首先一定要北京，原因無他，因為平，3,000蚊豪華團全包之餘，而且令人嘆為觀止既景點極多。故宮、長城、頤和園、天安門廣場都唔駛我多介紹，而且3月高速京津線通車，你可以試下搭又快又靚既和諧號係半個鐘之內去到天津遊覽。

除左北京，華東團都係一個好選擇。華東團仲平，二千幾蚊同樣係豪華團全包，但最緊要既係你依家有機會睇到春天既西湖美景。小弟之前12月去過西湖，發覺冬日無花既西湖都好靚，若春天繁花盛開時，嗰度一定係人間仙境。除左杭州西湖，華東團仲會去蘇州水鄉同上海睇四大名園、外灘夜景同埋搭磁浮火車。咁抵玩既團實在好少見。

如果可以用多啲錢，即大概4,000至6,000蚊，樓主可以去黃山同張家界睇奇山異水。但呢兩個地方都唔夠好，最好就去九寨溝。坦白講，好難相信世界上有咁靚既地方，你點唸到世界上會有一個地方，有一個又一個天然無污染既水池反映住七彩既清潵顏色﹖如果我唔係有識人去過同睇過無數咁多個介紹嗰度既節目同相，我都唔相信會有咁靚既地方。去九寨溝一向係小弟既夢想，我打算未來一、兩年內去，影幾幅相返黎做電腦Wallpaper都好。

希望以上建議可以幫到樓主。