✔ 最佳答案
唔怪得樓主玩黎玩去都係你提到嗰幾個活動啦!因為樓主既要求好矛盾,有野食有野玩既地方一定有大量人工開發既設施,咁嗰個地方靚極有限。如果樓主係唔食唔玩唔得既,咁就真係得長洲同南丫島啱你去,另外石澳同赤柱都唔錯。
如果樓主真係想去一啲好靚既地方,而且對食同玩既人工設施要求唔多,咁我有幾個好地方可以介紹。最好就係去龍脊,即係石澳後面望上去嗰一連串山脈,嗰度好易行,而且係好天時望落黎既風景絕對係天下第一流。之後你可以去石澳附近既大浪灣,嗰度人煙稀少,但風景優美,而且那裡的沙幼滑細白,令人非常舒服。另外仲可以由山頂行落去港大既一條行山徑,同樣好易行,而且風景優美,最緊要係呢條路夠近市區。
唔去港島區,去西貢都好玩。最好就係去萬宜水庫,如果天氣好,嗰度會靚到好似幅畫咁,如果可以就去埋水庫東壩,嗰度唔單止靚,而且仲有地貌奇觀睇,夜晚既時候更係觀星勝地。不過麻煩在於東壩非常偏僻,係北潭涌搭的士入去都要半個鐘,行路入要三個鐘。所以去嗰度最好既方法就係一程搭車,另一程行路,咁就可以慳番啲時間又可以享受遠足既樂趣。
有一個地方都幾得意,就係位於西貢既蕉坑自然教育中心。嗰度有好多大自然既野睇,包括中草藥、昆蟲比你睇,而嗰度交通極方便,絕對唔駛好多體力勞動,又唔收入場費,行晒可以消磨一個下晝。
同樣好玩既有濕地公園同米埔自然保護區,兩度都係交通方便同風景優美,不過米埔要參加團體活動先可以去。但濕地公園就隨時去得,而風和日麗時就真係好靚,你慢慢行可以消磨一日。