狗女絕育有什麼要留意 ?

絕育前後須知：
絕育手術前24小時要禁食、禁水，手術後由於麻醉藥未過，狗狗會有如飲醉酒；第一晚由得狗狗休息，可以比少少雞肉或濕糧佢食，緊記千萬唔可以除燈罩（飲水食嘢時例外，但必須喺你看管之），因為佢會舔傷口，咁會令傷口發炎，又或者佢會自己拆線（狗狗自己拆線，有可能要再聯過）；唔好比佢做跑跳動作（咁會好容易扯開傷口），唔好落街，十日後拆咗線，先至好幫佢沖涼。
絕育手術的好處：
手術後可以避免一D疾病發生嘅可能性，如母狗可能會子宮畜膿或卵巢囊腫引起嘅病、性病等；第一次起水前就幫母狗做手術，可以避免乳房腫瘤，而且手術亦都可以令狗狗壽命長D。
做咗絕育手術，可以減少性荷爾蒙引起嘅不安，如：咬人、破壞傢具，亦可改善壞脾氣等，所以做絕育係好多過壞呀！
個人經驗：
我隻史納莎女，一向都唔係好鍾意食狗乾糧，所以一直都比較瘦，而且好怕凍；但係做咗手術之後，明顯胃口好咗，而家唔係低到十一、二度，都唔駛開暖風機呀！

最緊要小心唔好比佢整到傷口,頭罩最好帶啦,怕佢無lam傷口,我隻做完都好精神,好似無野禁走黎走去,有d或者頭一,兩日比較攰,你只要比佢休息下就ok,放心啦,絕育只係小手術,唔洗太擔心,祝順利!

其實並沒有特別需要安排, 只係佢做完手術後會特別累, 你只要比佢休息吓, 若果佢唔願意食嘢, 你就比水佢飲, 至於喇叭係要帶的, 因為扣擔心佢會咬斷手術線而導致傷口發炎, 當然, 當佢食飯時, 就幫佢除喇叭休息一陣, 若果你想佢除低喇叭休息一陣, 你就要睇實佢, 唔好比佢咬到傷口, 因為傷口開始好的時候, 就會有D痕, 那佢地就會不停地舔傷口.