✔ 最佳答案
bio 煩, 係因為人地逼你讀.
bio 煩, 係因為你明知唔讀唔得,
bio 煩, 係因為你讀個d字都唔知讀黎做乜.
咁最初, 點解有bio呢一科? 我地知六畜[豬牛羊雞犬豕], 六穀[稻粱菽麥黍稷] 咪得囉. [-- 下, 你唔知咩係菽稷??] 係以前三字經時代, 小朋友已經要識, 而且唔難學識, 因為呢d野就係佢地身邊周圍, 影響佢地日常生活, 所以有須要識, 而且唔識唔得.
現代版既生物學, 同樣應該係好生活化既.
先講營養學啦, 你咁大個人, 連自己食緊d乜都唔知, 身體需要乜都唔知, 係冇可能好好照顧自己健康.
另外, 身體係點樣運作既呢? 點消化食物? 點抵抗病原體? 報紙話飲益力多醫肺炎, 真定假? 你冇基本既生物學知識, 咪人地講乜你就信乜, 人地食乜你就食乜?
好. 咁講下原本咁有切身關係, 咁重要既科目, 點解令你覺得煩.
假設唔使用長長既拉丁字 [photosynthesis個d], 用[光合作用], 係咪易明又易背? 用中文問係咪唔會解錯題? 即係, 用中文讀, 對你來講會好好多, 係咪?
即係唔關bio既內容煩唔煩, 係佢用既教學語言既問題囉.
因為相對起phy, chem可以用符號, 計算作答, bio係比較多要用文字解釋, 好似其他文科科目. [你唔肯選文科, 係咪因為唔鍾意運用文字, 比較喜歡用算式直接解決難題呢?] 不過唔好以為BIO係文科. 佢當中需要既觀察, 思考, 舉證, 實驗, 係如假包換既理科.
呢度比少少建議, 睇下幫唔幫到你:
1/ 去搵d中文既生物教科書來備課. 因為同一個教統局, 考試局, 保證範圍完全一樣. 係學校開始一課新題目之前, 睇左中文版先, 將英文課本既字查左字典先. 明唔晒唔緊要, 只係想幫助你上堂容易明d, 又冇咁分心, 即係冇咁悶.
2/ 補習囉. 有d補習班會派d整理得好好既筆記, 將d生字, 概念整理好, 比一d對文字唔夠敏感度既人特別有效.
3/ 搵d有marking scheme 既 past paper試做, 再對答案. 呢招係高年班尤其常用. 點解? 當上堂教與學係一回事, 到考試, 係唔會一課一課書咁寫返出來, 正所謂比你背晒d課文都冇用. 而解題/答題, 來來去去個幾招嫁咋. 試做一題past paper, 寫低答案, 再搵marking scheme對下, 對方係點樣將個題目分拆開? 值3 marks既題目, 預期個答案要有幾多個points, 幾長左右? 全部都可以捉到路.
4/ 理科, 讀到高年班, 就算只讀phy chem, 始終走唔甩要用文字. 去補習boost下英文寫作[橫掂你年年都總係要考英文架啦, 唔怕嘥.] 因為將來你讀上去, 大學都係用英文教絕大部分既科目. 語文根基真係靠而家架啦!
參考: 自家意見, 在下教過會考生物班.
