✔ 最佳答案
有防震當然會比冇防震好,支鏡可以降低安全快門約4級.對遠攝及低光拍攝十分有幫助.
但係我見你又同時問Tamron 18-250mm好唔好用,咁我假設你係用有1.5倍或1.6倍焦距增長的DSLR.因為Tamron 18-250mm淨係可以用在呢類機上.但呢類機配28-300mm鏡,最廣角焦距會變咗42mm或者45mm,非常唔夠廣角.即係唔可以一鏡走天涯.
老實講用高倍變焦鏡目的就係貪方便,否則犠牲咗畫質之餘又要配多支廣角鏡咁不如索性買支變焦倍數細啲既例如70-300mm仲好.而且支鏡唔平要成4千幾,原廠70-300mm防震鏡都係咁上下價錢,而且有超聲波對焦,俾我一定揀原廠70-300mm.
如果你有菲林機或者全片幅DSLR,咁個焦距28-300mm就會幾好用.不過如果用在全片幅DSLR,會有啲觀音頭,掃把腳囉,買部機咁貴都係為咗靚啫,唔會咁配鏡呱.
咁似乎18-250mm會好啲,冇錯佢焦距係夠長,但係佢冇防震的.又長焦又細光圈,震過猫王,你預咗成日帶腳架都得喇.又係嗰句,用高倍變焦鏡就係為咗方便,要成日帶腳架何方便之有,所以買呢類鏡一定要買有防震功能的.我建議你買Sigma 18-200mm f3.5-5.6 DC OS.
AF18-250 or AF28-300就係前者一定要用在APS-C的DSLR上,後者則可以用在任何片幅的相機上.
買鏡我建議都係去翻永成,萬成,DC fever買啦,價錢未必係最平但會放心啲.