急!!!!!!!!!一篇一分半鐘演講

分半鐘,如果快既都可以講到400-500字左右,多少你試過之後自行加減少少啦..
( )入面果d唔係正文,係個人感想黎:

開首---
考試形式: 你好,我係xxx,我要講既題目係如何組織班會
演講形式: 大家好,今日我要講下如何去組織一個班會( 二選一或者自創都ok! )

內文---
班會,顧名思義就係班中同學所組成既一個團隊,而佢既職能係籌辦或者協助班中o既活動舉行。

首先,我地必須要選出適合既同學擔任班會中唔同o既崗位,例如正副主席,文書,財政,總務等等,呢d人選必須要o係班主任列席下由班中同學推選出黎,而同學o投票o既過程當中,必須要考慮各個同學o既能力係咪適合果個職位,知人善任,而唔應該由個人情感或者關係親疏出發,咁先能夠組織一個好o既班會。

接住落黎 ( 呢d字眼一定要出,俾人覺得你有結構 ),當所有人選已定之後,我地應該定下班會例會o既時間同地點,然後以回條或者通訊既形式向各同學確認班會內閣o既名單,例會日期,收取班會費用o既多少等資料,並且要張貼o係壁報方便同學查閱。而往後每一次o既會議,必須由文書進行紀錄,再由主席確認,然後俾同學傳閱或者張貼o係壁報,令同學能夠得知班入面最新既事務同需要留意o既事項。

再者,o係每次重要事項同活動之前,必須進行最少一次o既全班回議,並由負責老師列席,藉此商討舉行o既方向同細則。另外,班會亦需要定期製作意向調查表,方便收取同學o既意見同回饋。

結尾---
最後,班會o既各位成員必須能夠緊守自己o既崗位,做好份內o既職責,而班入面o既同學亦都需要同班會合作,以提高整體o既工作效率。各成員o既努力加上同學o既參與合作,就一定能夠組織到一個好o既班會!

( 如果時間未到,可以加多句"我講o既係咁多.多謝",而如果時間唔夠,最尾結尾果part唔要都ok)

以下係演講o既一d skills:
1.o係上文每個隔行位心入面數兩下先再講,結構更分明
2.遇有長句唔好一口氣講晒,應該將果句句子cut開中間稍為停頓咁講
e.g.必須要考慮/各個同學o既能力/係咪適合果個職位
當中/位停半秒左右

希望幫到你啦...雖然我作文唔係好叻=3=hee~

組織班會可以有管理班中的事務。（比如：班中有班中的金錢等）可以在班中自行一些舉辦大步份同學都喜歡的小活動，在同學們收回來的金錢可以在不同的派對中使用在食物和佈置，因此一個班別沒有班會就沒有一些事情可以舉辦，大家只會沒有些可以製做回憶的機會，只會在一個沒有樂趣的地方學習渡過一年。