如何睇自動波箱油油尺

首先你要知道你架車check波箱油時可唔可以或需唔需要副引擎係運行緊嘅. 通常一般廠方喺說明書入面都會話要run住引擎, 只有少數唔係. 呢樣要攪清楚先.
因為你架車支油尺係有兩個刻度, 所以我推斷應該係可以run住引擎時check, 達到更準確讀數. 因為當運行時, D油就會隨個油泵不斷循環. 20度個讀數係車頭過夜凍咗, 或者啱啱著車時讀, 但因為周圍溫度會有偏差, 所以以60度個度數會較好. 最好係揸架車出去, 水溫表讀數上到正常溫度, 就揾個平路泊低車, keep住引擎著嚟量度.
準備一塊唔甩毛嘅毛巾, 攞支油尺出嚟抹乾淨, 插番落去, 再拉番出嚟, 睇吓60度嗰邊嘅讀數.
太多油會引至波箱油起泡, 令油壓唔穩定, 轉波反應混亂(時上時落), 甚至令波箱漏油; 所以要添加時, 要逐少逐少加
太少油就會令波箱轉波唔暢順, 甚至轉唔到波; 亦會令波箱操作過熱, 令波箱損壞.