我個friend: a女
我個friend個男友: b君
a女同b君一齊咗兩年幾, 但係呢排a女同我講, b君成日發佢脾氣, 又話做返朋友咁話, 但係a女話真係好愛佢, 唔想同佢散, 所以日日收咗工都等b君收工一齊去撘車, 咁a女又早收過b君, 而我又成日收咗工去搵a女傾計, 所以a女成日叫我一齊接b君收工. 其實我同b君係同一間公司嘅, 只係返唔同時間, 所以我早收過佢. 我同a女唔係咁熟嘅時候, 有時收工會自己出去玩, 都有幾次同b君撞到會一齊玩. 大約半年前, b君同幾個同事一齊出去玩, 我哋又撞到, 其中有一個唔知係咪同我講笑, 佢話b君鍾意咗我好耐, 叫我同佢一齊. 當時我只係當笑話, 當無聽過. 不過之後b君成日借啲意同我講嘢, 我都唔當一會事, 只係覺得有少少怪啫!
之後, 情人節嗰日, 我又同a女一齊去接b君收工, 我見到佢拎住幾支花, 以為佢送俾a女, 我同a女一齊行過去, 佢居然响a女面前將啲花俾我喎! 咁我未將啲花即刻遞俾a女囉! 跟住, b君即刻同我講, 話啲花係送俾我嘅! 咁我未又當聽唔到囉! 之後, 到尋日, 我又同a女接b君收工, 平時我哋係唔同路嘅, 不過我約咗人, 所以先同路. 我哋行行吓, 佢突然隔住a女攬住我條腰! (a女唔知佢有攬過我) 死啦! 你哋話b君係咪鍾意咗我?? 如果係, 我同a女又咁熟, 我又唔想因為呢啲事同佢反面, 有無人可以話俾我知我應該點做好??
對唔住...可能個問題係長咗少少, 不過唔該各位睇完成個問題先至答, 唔該唔好求其答一啲可有可無嘅答案.
回覆127 & 橙: 其實我都係同a女熟咗之後先知b君係佢男友, 我之前都試過响b君面前同其他同事傾計同玩, 佢亦都撞過我同其他男仔出去玩, 但係佢好似無乜反應喎!! 仲有呀....b君之前响我哋成日撞到間酒吧度飲醉咗, 我要走先, 佢捉住我叫我唔好走, 當時有幾個同事都喺度, 但係a女唔喺度, 而佢哋都知b君同a女係一齊嘅, 但係佢哋好似唔覺得奇怪咁喎... (a女之前同我講過b君啲friend(我啲同事)唔鍾意佢哋一齊)
喺公司, 我知道有幾個女仔鍾意b君, 佢哋唔知b君有女友, 成日借啲意同b君講嘢, 但係佢又唔理佢哋喎! b君喺公司唔係好同啲女仔講嘢(除工事上), 但係又成日同我講嘢(唔係工事), 攪到公司好多人都傳我同佢有嘢.... 其實b君應該唔知我feel到佢鍾意我, 因為我响公司個個都咁好傾, 不論男同女都成日傾計同玩.
回覆jumpcao: 我以前係對b君有少少feel, 但係我知道佢同a女係一齊時, 我已經無諗過會同佢有發展喇! 我都唔想做人第三者...而且我又唔係無人追, 要玩玩出面嗰啲, 呢個道理我都識... 我之前有同a女講過唔陪佢等b君喇! 但係a女係都要我陪佢, 咁我又唔識點拒絕佢, 先至陪佢等.
回覆fanming_ma: 點解你個答案同橙嘅咁似嘅.....只係有幾個字唔同......
頭先我又同a女講電話, 佢話原來我同佢哋分咗手之後, 佢哋撞到我公司啲同事, 但係b君發現咗之後, 連拖都無拖過a女隻手, a女又話原來佢哋拍咗拖咁耐b君都未帶過佢去見b君嘅屋企人同朋友....a女問我點好.....我真唔識答佢, 未同佢講順其自然啦! 好明顯佢無發現尋日b君攬住我嘅事..... 唉....a女有乜都會同我講, 但係我知道如果我同a女講咗呢啲嘢, 佢會好唔開心, 仲可能因為咁我同佢嘅友情會無咗....
好多謝各位咁用心咁答我呢個問題, 但係請你哋唔好講到我好似一定會唔理a女而同b君一齊, 我只係想知我而家就乜都扮唔知, 但係之後嘅事好難講, 我怕b君同a女講分手時, 話係因為鍾意咗我!! 我知a女真係好鍾意b君, 仲諗住同佢一齊好耐添! 我又唔想攪到佢哋嘅關係唔好, 我只係唔知我應該點做, 可以做到三贏嘅局面呢? 就算唔可以做到三贏, 咁又可唔可以唔好攪到個結局咁差呀?? 我唔想a女唔開心...而又唔想到時响公司見到b君尷尬....
回覆faifai0325: 我都話咗我只係以前, 曾經對佢有少少feel, 唔好話到我好似"鈎"人老公咁啦! 正確嚟講, 我向a女未熟之前, 我己經識b君, 而且我同a女熟咗之後, 先至知a女同b君係一對, 而唔係因為a女而識b君...
回覆faifai0325: 我明白你哋咁好心機答我問題係關心我, 我想話俾你知, 我自己唔覺得b君係想一腳踏兩船, 因為佢哋之前分過手, 但係a女一定要同佢復合先至一齊返, 我而家都唔知點同你講.... 回覆遇上愛: 我想同你講a女愛b君嘅程度係, 如果b君無錢而佢可以的話, 會俾錢b君用, 你叫我用咁嘅方法, 最傷嘅只會係a女, 呢個方法行唔通嫁!! 而且我都講過, 我唔係要同b君一齊, 只係唔想攪到好尷尬啫......
