色盲鏡片一問

✔ 最佳答案

拿, 首先同你講明, 色盲係唔可以用鏡片矯正既. 佢唔係好似近視, 遠視咁對焦不準確, 而係視網膜少左D感光細胞. 少左就係少左, 帶咩鏡都變唔返出來的.
1.我想知呢個世界有冇色盲鏡片?(香港唔多聽見)從以下網址,是真定假?
係, 個D係濾光鏡片. 色盲既人帶左, 冇錯係可以分得到本來分唔出既野. 只不過所謂分得出, 就唔係睇到同正常人見到既彩色影像, 而剛好相反, 係黑白影像.
點解咁講呢? 例如一個對紅/綠色分辨唔到既色盲患者, 比佢睇一張紅綠間條既圖片[紅/綠既亮度相同], 會係灰色一片, 見唔到間條紋. 帶左呢種所謂色盲鏡片, 紅色變成淺灰色, 綠色變成深灰色, 就即係間條紋啦. 所以用作色盲考試作弊就係一流.
但現實生活中, 物件既紅,綠色深淺程度不同. 紅色變成淺灰色, 綠色變成深灰色, 對你有咩作用呢? 係50米之外, 交通燈係紅係綠, 你都只係睇到灰, 由於只得一盞著左, 又估唔到係深灰定淺灰.... 咁既眼鏡係幫唔到要分辨紅/綠燈既色盲患者.
假如你只係色弱, 帶呢種眼鏡, 反而將原本僅有既彩色視覺通通轉成深灰淺灰, 你話係咪仲死? 唔帶好過帶.

2.我睇紅橙黃綠青藍紫黑白灰都睇到,但色盲圖(點點圖)就睇唔到,咁我算色盲嗎?
色盲都有分深淺程度. 淺的叫做色弱. 色弱就係雖然仍有顏色感應既細胞, 但數目較正常人為少, 係視網膜上分佈稀疏.
在下有個色弱既朋友, 佢睇一大片既紅色, 例如一部的士, 係立即好清楚知道係紅既. 但係如果係圖表中有D符號係紅或係綠, 佢就會遲疑一下先至答得出顏色. 因為視網膜上既細胞稀疏, 睇細既野同遠既野紅或綠既信號微弱, 比平常人吃力至睇得出顏色. 而分辨色差, 例如紅色或啡紅色, 會有困難.

3.點解見工要睇色盲圖(點點圖),而唔係紅橙黃綠青藍紫黑白灰?
唔係每一份工都要驗色盲. 會驗既都因為工作需要用顏色. 用色盲圖可以分辨出色盲既程度同種類. 有時就算你係色弱,都會請, 只睇工作需要有幾重要囉.

4.如果網址係真,呢個世界係有色盲鏡片,咁戴色盲鏡片見工是否犯法?
一定係作弊. 比人知道一定會取消資格. 至於告唔告得你入就唔肯定.

5.如果網址係真,呢個世界係有色盲鏡片,咁戴色盲鏡片見工同考試中出貓有冇分別?
講得岩, 根本就係出貓.

6.如果不能通過色盲測試,而boss因呢個原因唔請,有冇犯殘疾歧視條例呢?
冇.
頭先講左, 一定係份工有需要先會測色盲. 申請做文員, 政務主任個D一定唔會測色盲. 考車牌, 做司機就一定要.
理由好清楚, 用番頭先個例子, 假如個司機係色弱, 距離交通燈位50米, 以為係綠燈, 照去, 佢睇多兩秒之後, 先知道原來係紅燈...
所以唔好只講見工, 考車牌本來就要測色盲. 唔係為左歧視你, 係為你自己同其他道路使用者安全. 你帶鏡片去考車, 比你考到又點, 自己條命來架, 玩命咩?
在下個個色弱朋友去化驗所見工, 唔請. 理由係化驗工作經常要判別顏色濃度, 來斷定樣本成分, 酸鹼度.... 色弱根本唔可以準確判斷, 佢根本冇可能勝任個份工.
7.點解見工唔會除眼鏡check你有冇近視/遠視,而色盲就要check?
有架. 空姐/飛機師就要除眼鏡驗近視, 因為假如有特殊事故, 跌左眼鏡/contact lens都要有能力自保, 仲要帶領乘客去安全地點吖嘛. 而一d冇咁既緊急情況既工, 多數你都會帶住眼鏡做野, 跌左都唔會即刻死得既, 咪會准你帶住眼鏡驗近視囉.
色盲點解要check, 上面講左係工作需要囉.
結論:
假如你真係色弱, 應該搵第二d工種, 無謂同雇主爭辯歧唔歧視. 你諗下在下個朋友, 就算真係比佢做到化驗師, 每次做完工作要攞比上司或者同事睇下佢有冇睇錯顏色, 其他同事會點睇? [做咩老細請一個做唔掂自己野既人返來, 而要我幫佢做埋佢d野呢?] 朋友自己又會好受咩? 再諗下個玩命司機....

2008-03-11 16:05:26 補充：
未知發問者閣下既 [同學] 識幾多野, 在下就不敢苟同. 人地要考你, 梗係要你用到至考你啦. 人地用咩機, 佢地至清楚.

呢個係現實, 當然你亦有權拒絕接受現實. 呢樣野在下冇責任亦冇須要說服你.

始終香港都係言論自由同依法辦事既社會. 係社會上有不公平既事, 唔係當事人, 好難搏取正常人既同情. 唔等於呢d當事人唔可以告狀既. 人地平機會, 法庭唔受理, 你咪去行政長官度告狀囉. 在下唔係講反話. 幾十年以來訂落既標準, 如果真係過時, 你要求覆核都係合理既.

在下支持理性討論, 謝絕任性妄言, 鄙視作弊取巧.

回答 (2)