黑白雲石鼠有咩性格/特徵??要5要分籠??

A..雲石好惡,多數細品種既鼠年幼都打得少,但雲石就好細已會打交,可能因為咁,都較少地方有得買

B.唔建議將鼠鼠放埋一齊,最好係一籠一鼠,因為好易會出現打交既行為

倉鼠係獨居動物,習慣一隻咁生活,野生既倉鼠只會在發情期先走埋一齊交配,之後又再各散東西,所以唔係一籠一鼠真係好易會有打交既問題

坊間有好多話可以令鼠鼠唔打交既方法,例如話同性別唔打,又或唔同性別唔打都聽話,但我細個係一籠兩鼠,同唔同性別,兄弟or姊妹都一樣會打
而亦都有話買多d野俾鼠鼠唔爭就冇事,我細個時試過一籠放兩兄弟,個籠好大,有2間屋仔,2個瞭望台,好多野都有兩樣,都一樣打到頭都甩,就算係再大既籠,同性唔同性,係咪同一胎,其實都會打既
都有話沖完涼再放埋一齊既方法我都試過好多次,一樣打得好勁呢,沖完初時可能係會有短時間冇事,因為大家既氣味改變,要再睇返對方既實力先會再出手,但唔好以為不斷沖涼就得,因為鼠鼠唔可以成日沖涼,加上好難會知道佢地幾時會打,半夜打又唔在場就好危險了

有時有d鼠鼠一齊住,打交未必會打死打傷,但由於天生獨居既性格,唔止一隻居住都好易令鼠鼠感到壓力,有壓力就有機會誘發肚瀉,甩毛,濕尾症等問題

我都好想一籠多鼠,但好多人地講既方法我細個都試過晒,結果都一樣

其實鼠鼠最好分籠,如果唔同性別,繁殖鼠鼠會有好多問題,我自己一籠一鼠左好耐,鼠鼠身體都好D,唔會被打,又少受驚,我既鼠多數都係老死OR年老腫瘤而死(當然配合返唔亂食野,同適當地對鼠鼠啦),建議分籠原因如下:
1)倉鼠天生根本就係獨居動物,根本唔適合群居,就算兄弟姊妹,同性別or唔同性別,都一樣可以打到死晒.睇書知道,外國既鼠鼠繁殖場都係一籠放一隻鼠,到發情期先放埋一齊一陣既
2)鼠鼠既繁殖速度好快,而且繁殖鼠鼠有好多問題(例如鼠媽媽有機會會食bb,bb未戒奶就打交但又唔分開得),就算樣樣都解決到,都會令鼠鼠既生活質素下降,鼠媽媽生育後壽命又會縮短(甚至難產),好多隻鼠又會有第d問題,所以真係唔好俾鼠鼠生bb呢
3)可能你會話鼠店既鼠咁多隻一齊都冇事,但鼠店既鼠仲好細,所以唔會打得好犀利,而且你睇到鼠店既鼠既時間都未到深夜,唔係鼠鼠最活躍既時候,所以未必俾你見到有咩問題.但我曾經見過,鼠店一堆鼠入面,有隻鼠已經得返d白骨...所以鼠店講既野,,唔好盡信,鼠店有鼠死左都唔會俾客人知呢
4) 就算兩隻鼠初初唔打交,其實之後都好易再打,特別係鼠鼠夜晚活動既多,半夜打起上唻,你又唔知既時候,仲危險.我細個既時候都試過覺得2隻鼠好似好fd咁放埋一齊,同一胎,我出去一陣返唻就打死晒啦
5)可能會諗鼠鼠會怕悶,但其實鼠鼠天生獨來獨往,只要有足夠既空間同運動(一個轉輪都ok啦),鼠鼠就唔會悶

真係好希望你可以考慮一籠一鼠,除左鼠鼠會打交及受壓易生病外,一籠多鼠都係易令鼠鼠較惡,較易有咬人咬籠等問題

另外,近來天氣較凍,新買鼠既話就最好等天氣暖返d先,因為鼠鼠初時會唔慣,未必識用鼠棉,咁就好易凍親