✔ 最佳答案
先唔講來源,因為所有「真品」都係屬於該國家嘅「財產」,理論上係唔比公開發售嘅,但事實係好大部份市面買到嘅軍用品係以「到期」或「不能修復」為藉口;由管倉嗰班老友,成車成櫃咁運走!
就小弟所知,一般軍服、夾乸衣、醫療用品及 MRE 等所謂「消耗品」不論狀況;出入香港都係唔受限制嘅,只要無喺香港法例 Cap.60 嘅清單內被列入受管制戰畧物資就可以。
出咗倉嘅嘢就通常會被接頭買手成批拍賣,假若你係軍用品鋪買手;好彩就成櫃新嘢運走。唔好彩就成櫃真係報銷品,蝕晒都無仇報!
得意嘅係你可以喺美國買到英國或加拿大嘢,但無本土美國嘢買!相反在英國亦好容易買到美國嘢。好簡單,賣本土嘢犯本土法例嘛,挪去第二處買鬼理你咩!
2008-02-06 12:58:24 補充:
嗱,軍隊係國家機器嘅一份子,為保障國內就業機會,傳統上所有軍需品都必需係國內生產。所以唔好比人誤導咗你,嗰啲同你講係甚麼次貨或者由別國代為生產嘅,我話你知其實係賣假嘢嘅藉口。首先,所有次貨都唔會交到軍部,因為唔合格嘛。生產商怕唔怕下次無得做先?第二,真係次貨嘅話,生產商自己嘅 QC 己經抽起晒並進行銷毀,成本其實一早加咗喺合約內。最後,生產商嘅 QC 重「盡忠」過軍部管倉班友,呢個係鐵一般事實!所以,你要知要學嘅,並唔係怕買到「次貨」;因為係唔會有次貨流通呢件事,而係識得睇喺件軍品上印嘅合約批號同生產商 Label 資料。