組裝機問題

假如你確定你底板支援記憶體上限為2GB，而你安裝多於2G的RAM，當開機自檢時出現你所見嘅reboot，係正常，而你按Esc取消自檢能進入Windows，只係跳過『錯誤自檢』嘅程序，令硬件帶住一個被忽視咗嘅『隱藏錯誤』危機，繼續工作。

我唔敢話一定會有咩問題會必然發生，但講出我估計有可能發生嘅情況：

1) 記憶體容量越大，所要求電量及產生熱量亦必然更多，但假如你底板上限支援2GB RAM，插槽設計時對供電及散熱都唔會考慮可以應付超出上限嘅要求，可能出現嘅情況會令系統不穩定，甚至hang機；或者嚴重之下，會燒毀硬件；

2) 雖然硬件並不支援2GB以上記憶體，但『自檢』可以提醒你系統有問題，因而不斷reboot。但當你跳過呢個保險程序，強制令系統進入Windows之後，系統只會『認為』硬體運作正常。即使硬體支援上限為2GB，但你強制令硬件進入Windows，硬件有可能有能力辨認到十足嘅容量（即4GB），但冇能力使用呢4GB，假如呢個情況發生，Windows會誤會你嘅硬體有4GB畀佢用，當需要調用到超出2GB資料（所指並非以一個檔案計，而係指正在運行時各方面需要處理嘅資料數量總和，當你部電腦開得越耐，用嘅時間越長，呢個情況越易發生）時，問題就一定會出現，最正常嘅就係hang機或者強制reboot，令你正在進行而又未儲存嘅工作毀於一旦。

所以，都係及早換過啲RAM，或者換咗塊板，保障安全。