有無人因師生戀而受到歧視?

歧視(discrimination)一詞, 根據Oxford Reference Encyclopedia (1998:425)係 "Unfavourable treatment based on prejudice against certain people or groups". 翻譯做中文就係話, 因為一d 偏見而對某一社會成員或團體作出負面的對待。

如果無負面對待做大前題, 咁就一定唔可以叫做歧視, 所以第1樣要講既係負面對待; 而偏見就係呢d負面對待背後既動機。

定義講到, 係因為人地對師生戀既主角有偏見, 所以先有負面/不公平既對待。
但係d人就可以捉住偏見兩個字黎拗。大可以話, 係佢地抵死, 係佢地不道德, 呢d唔係偏見, 係正義既人對不道德行為既正常反應。所以其實呢d係偏見與否都有排拗。

根據歧視既定義, 究竟當年既我有無比人歧視呢?
不如聽下我當年既故事。

我最討厭一月天, 尤其是寒冷而又微微細雨既天氣。

係一月既某一日, 好凍。我一返到學校就係我個位度見到一張藍色既紙, 上面叫我放學去見校長。當下我有d驚, 因為唔知點解, 自從12月開始, 就有人傳我同某男學生師生戀, 唔知係咪校長收到風?

未入到校長室, 見到另外2位老師: 一個教bio, 一個教中文, 我地3個一d關係都無。我心唸, 好彩, 唔係淨係見我一個...應該係校長想攪d跨科課外活動? 點知入到去, 校長就打開本簿, 問我知唔知做咩會叫我黎見佢? 點解有另外2位老師一齊黎? 我心裡覺得極之不妙, 但只好話: 下? 咩事呀? 校長之後就話, 為左保障大家利益, 我地今日講既野係會用簿記低。我就問佢究竟咩事。校長開頭仲笑笑口咁問我, 知道我年紀同d學生差好少好少, 所以會同佢地玩得埋d, 亦都欣賞我平時好關心學生, 但係會唔會話定返個界線呢? 之後就問我, 有無同邊個男學生特別熟? 我就話我對個個學生都好好, 因為我自己都做過學生, 知道學生除左需要老師教學之外, 係好需要佢地既關心同鼓勵。校長問左我成個鐘我都係笑笑口咁同佢吹水, 所以無咩野, 就咁叫我自己留意多d, 有咩唔明既就搵果2位經驗老師傾下。果次係完全無提及師生戀字眼。

自從果日之後, 同我同期入職, 平日同我日日都一齊食飯既老師突然係lunch time消失。第1次以為佢地漏左唔記得叫我出去食飯, 第2日亦如是, 我開始覺得好唔開心, 自己一個人屈係教員室, 仲偷偷地喊。真係好想知佢地做咩會咁樣, 直至佢地其中一人話我知, 你大鑊了。有個舊老師約佢地全部人食飯, 指名道姓一定唔可以叫埋我, 因為有d好重要既野要講。個舊老師就同所以同我比較熟既同事講, 話我攪男學生, d高層好唔gur我, 就快要炒我, 叫佢地至緊要唔好理我, 如果唔係就當我地係一黨。

其間, 科主任平時好似傾計咁問我: 你有無教f5架? 我答無, 亦心唸, 你係科主任點會唔知呀? 佢問我點解會識xxx? 我就話因為義務教佢朗誦所以識。表面上好似好平常, 實際上我好驚。

2日後, 又有藍紙, 真係好不妙! 成個人都專心唔到。我開始想搵人求救, 但係我可以搵邊個呢? 搵個學生? 佢係分開唔夠一個月就同左第2個一齊, 丟下我一個打呢場杖! 搵同事? 我真係唔敢講比同事聽! 搵屋企人? 屋企人更加會鬧我! 搵朋友? 朋友只會覺得我同男學生一齊就係不道德。我可以講比邊個聽? 講出黎求救, 萬一爆返出黎點算? 我可以點做?

入到校長室, 今次又有中文科既老師(佢亦都係輔導經既主任), 仲有2位副校長同埋我既科主任。校長突然好唔客氣, 一開口就想鬧我咁既款。今次佢係盤問我既形式, 話佢收到一封信, 信上投訴我搭上一名男學生, 而且有清楚描寫男學生既身形特徵, 就讀級別同埋所屬課外活動單位。今次校方迫我認了! 我開頭唸, 我做得出唔怕認, 但係又怕影響個男學生既前途! 我係度唔做份工都可以, 但係對於個男仔黎講, 呢間係佢母校, 呢世都要咩住呢個名, 我唔想! 為左保護返個男仔, 我死口唔認, 唔認到底。

之後, 輔導主任叫我去見佢, 我知佢係幫我的。佢話我聽, 校長手上既信佢有睇過, 字眼好唔客氣, 原來係封匿名信, 投訴人聲稱親眼見到著住校服既男學生同我係某公眾地方有極度親密既行為, 信上繪影繪聲咁講, 所以校長聲稱自己都唔好意思將封信讀出黎。但係我唸, 今時今日既科技, 影張相唔難, 佢無證無據仲要匿名都受理, 咁以後我求其寫封匿名信中意告邊個都得啦?

又過左幾日, 我又收到藍紙, 今次我喊左出聲, 崩潰了。究竟學校d人想玩咩? 今次我直頭feel到校長係想即刻要我走。我唔知點算, 就講左比輔導主任聽。輔導主任本來都收到藍紙叫佢放學見校長, 但岩岩見到2位副校同埋我既科主任都入左校長室, 佢都覺得好不妙, 於曷飯都唔食衝入校長室問佢究竟想點。去到果然係傾點樣炒我既事, 想係lunch果時傾好, 出埋信, 放學一見到我就比我要我即刻走。走, 無問題, 當日決定勇敢走師生戀呢條路就預左有咁既一日。但係個男仔就快考會考了! 分開左之後都好少好少聯絡, 不過呢樣佢唔可以唔知, 所以我有講佢知最新既情況, 亦都有問佢想唔想係原校升中六。佢係想的。既然佢想留原校, 咁我就唔可以一走了之, 如果唔係就等於認左件事, 咁佢就水洗都唔清。反正我個底都花晒了, 走左仲好唔駛受人白眼。你都唔知, 日日返學我都抬唔起頭, d學生多口, 見到我就會話"果個師生戀miss!" 有女同學d口仲衰, 話: "全校既仔都比你溝晒啦!" "真係好靚咩? d男仔發晒癲咁" 學生都話佢地細個唔識野, 大人仲衰...訓導組既人, 我同佢地講早晨, 大多數都係當我透明。有位訓導miss啤左我一眼之後話 "妖!" 咁就行左去。總之我做咩都唔岩咁。我係堂上飲水(好正常)又屈我上堂食早餐, 一有男學生搵我問功課就最十對眼望住我。

講返果日。最後輔導主任佢幫我迫校長唔好炒我, 至多由得我學期尾自己走。一來為我, 二來為個學生。但係校長都係唔gur, 亦都因為要校長佢好落台, 佢地唸左個方法, 就係出warning letter比我。我好想知佢係warning letter度寫師生戀會有幾咁攪笑! 個letter head係有校名的, 佢地唔驚架? 佢地早就預左我會咁唸, 於是作左一行叫misbehavior, 即係行為不當。一句行為不當, 幾咁vague! 到時如果人地問我做錯d咩, 校方就會話我上堂講粗口。我當然反對! 我絕對唔會上堂講粗口, 所有學生可以做證。但係校長死都堅持屈我講粗口要我簽warning。我無做過, 做咩要簽? 簽左即係認啦! 我堅持到最後一刻, 校長話如果我唔簽就要即走。正常黎講我真係不如即走! d人又咁對我, 我亦無做過, 唔簽, 走人之後仲可以告返你! 但係我無咁做, 因為我知道如果我玩到呢個地步, 個男學生一定會好慘! 校長見我好似成日都護住個男學生, 於是就話, 你想唔想我叫個男仔黎對住我當面問佢你地有無野? 個男仔係聰明人, 一定識得點做, 但係我唔想攪到要佢日日見校長, 見呢個果個, 仲有好少時間就會考了, 唔想影響佢前途。所以我同校長講, 好, 我簽, 不過你要當住在坐咁多老師面前講你唔會向個男學生追究, 我做到學期尾就走! 於是我咁大個女, 第1次屈打成招, 被迫簽左封warning letter.

收左warning letter之後, 學校話依正常程序係要搵主任睇我堂, check我既功課, 以及嚴加管理我平日既行為。我覺得咁樣真係好無理, 無啦啦要比人check住, 不過算啦, 平日d野都做得ok, 唔會比人捉到痛腳既, 只係覺得unfair姐...都唔輪到我揀。點知我科主任都做我! 考換d作文卷係交換老師改, 先唔會比自己學校最高分。咁我拎中科主任果班, 佢話佢好想知佢自己學生考成點, 所以想問我拎返黎, 佢自己改。我話但係呢樣係我既工作bor...佢話: 我係科主任呀麻, 你唔駛驚wor, 比返我改啦, 至多你幫我做返第2d工作啦。我就聽佢講比返佢改。點知佢係我既report度寫: 自己既工作唔做, 要別人幫手。

仲有一樣就係, 我發現訓導組係方死迫我唔走咁。我班既學校駁訓導主任咀, 就比人鬧係班主任教佢咁做既。總之我果班d學生做錯咩野, 就一定係我教既。咩都入晒我數, 無限上鋼上線, 呢d係咪合理既做法呢?

不過點都好, 過左去了。
個男仔同級既同學係畢業典禮之後聚會都唔去, 約我出黎食晚飯, 拎本校刊比我睇。有一頁, 講個男仔ALevel成績係全校最top, 睇到佢入到間好好既大學讀佢中意讀既科, 睇到佢用英文寫佢既讀書心得, 寫得幾咁好, 我喊左出聲。恭喜你, 我好安慰! 我知道當日我走呢個決定係岩既! 你將來一定出人頭地, 會發現果個出現過係你生命裡面果個miss, 只係......普通女人一個。

真係好感動,事隔多年,如果你睇到我既留言
我好想聽你既故事....
我EMAIL :[email protected]

hirose_michi20041201 ( 小學級 5 級 ) 你結果有冇跟那男生計續 ? 故事就此結束?
為他希生甘多 ? 結果分開好慘oh !!