✔ 最佳答案
A.倉鼠怕凍亦怕
倉鼠原居沙漠,日頭好熱,所以鼠鼠日頭呢埋在地底訓覺,咁就冇咁熱,夜晚溫度涼返,先會出去活動,所以鼠鼠係怕凍又怕熱
所以鼠鼠係夜晚訓覺係好正常,而天氣較凍同較熱既時候就會訓多d,最緊要留意返鼠鼠身體及排泄物既有冇異常,會唔會有好凍,呼吸好慢既情況,呢個情況要馬上令鼠鼠慢慢溫暖返(唔可以突然好熱),如果真係都好凍,就要馬上睇醫生了
B.凍既時候,冇鼠專用棉既話,可以用多d木糠,再放鼠鼠去適當既位置,用曖毯暖爐都可以,但記得唔好將鼠鼠放得太近暖爐
籠擺放既位置要留意以下幾點:
1)要放在通風陰涼處
2)唔好電視等等好嘈既地方附近
3)唔好放在俾雨淋到既地方
4)唔好放在曬到既地方
5)唔好放在冷氣風口位
6)唔好放在太凍or太熱位置
C.冇鼠棉都唔好用普通棉花,用人既棉有機會令鼠鼠過敏,嚴重既過敏係會令鼠鼠死亡
鼠鼠應該就唔會食棉,鼠鼠好喜歡將食物及用品等塞入腮,再利用腮去運送物品,倉鼠都係因為咁而叫"倉"鼠,多數見到鼠鼠好似食D棉就係呢個情況
棉花的確有時好難買,你可以試下問鼠店會唔會仲有未上貨架,都可以試下去一d較細間既鼠店(大間未必理你,但都可以試既)問會唔會再入貨,會既話可唔可以留起一部份俾你,我試過先俾錢同留低電話號碼,順利可以買到
之後冬天開始既時候,我都習慣買大量棉,買晒數間鼠店既棉,到唔凍既時候仲留返2,3盒,以防第年忽然凍既時候買唔切,你都可以試下
D.屋企潮濕,係會令鼠鼠較易生病,特別係皮膚病,開抽濕機會有幫助,同時可以多D清理鼠籠
你可以每天同鼠鼠清理一下排泄物集中地,多D換木糠洗籠,間中用小動物專用消毒劑消毒一下個籠or用牙膏洗籠都唔錯既
屋企潮濕仲要留意返鼠鼠既食物會唔會變壞OR生虫之類
預防鼠糧有虫既方法:
1)買糧既時候睇下鼠糧有冇過期
2)有d糧會冇有效日期,又或有d鼠店會特地搵野貼住個日期,咁就要更小心留意包糧有冇問題
3)買糧既時候要仔細觀察,定住包糧(睇到既位置),睇下有冇問題同有冇野郁(定實先睇到有冇野郁)
4)買細包既糧,咁就唔洗開左口之後放咁耐,減低糧食出現問題既機會.
5)買左包糧返唻之後,要放在陰涼處
6)開左包糧之後最好放入密實袋,要成袋放入密實盒
2008-01-24 02:37:39 補充：
用木糠可以吸尿,而且可以做窩,而用草雖然做到窩,但鼠鼠用草做既窩密度較細,而已較涼,又唔吸尿,所以更易冷親,夏天既時候想涼d可以用草,但都最好只在訓覺地方用草,其他地方用木糠天氣涼,就更加唔好只用草,加多d木糠會比用草好而且要留意,潮濕既時候草好易生虫怕鼠鼠尿到涼,可考慮買個鼠廁所俾佢用,熊仔鼠一般唔洗教都會識用(當然頭幾日未慣就未必用意,不過鼠鼠用左鼠廁所都可能會有訓覺地方排泄物,因為鼠鼠會用排泄物表現該地係屬於佢我住屯門,去開金魚街同近屯門既鼠店,你可以去金魚街睇下,有d水族店都會有鼠用品買,但就唔太明顯,去開可以仔細睇下
