杜拜旅行10日

小弟發覺呢度好多人想去杜拜旅行，而事實上亦有好多人去過呢個地方，但係唔知點解總係無人講佢地係當地既遊歷，小弟未去過嗰度，我只能講一啲我知度既野比樓主知。
之前我係呢度都講過，杜拜係一個近五十年先至發展起來既城市，情況同深圳差不多。兩地本來都係名不見經傳既小村莊，後來經大力發展後先至成為大城市。既然只係有幾十年既發展史，咁嗰度自然只會有一啲好現代化既高樓大廈睇，而由於杜拜以前完全唔出名，所以當然就無名勝古蹟可以參觀。
據小弟所知，去杜拜主要只係睇下呢個現代化城市同埋騎駱駝，行下市集咁。如果講到要買野，嗰度只有一般係阿拉伯市集常見既野賣。不過杜拜既金器市場好出名，樓主可以去睇下，不過有無需要買咁貴重既手信當然就留番樓主自己唸。杜拜係好有錢同現代化既城市，所以唔駛擔心治安，只需要做好一般既保安措施，例如財不可露眼，貴重財物跟身就可。
簡單黎講，一個人去杜拜無咩問題，但由於嗰度無咩野睇，而且樓主仲要去10日咁長，最大既問題應該都只係太悶。小弟覺得樓主可以改改計劃，唔好剩係遊杜拜，最多只係嗰度留三日(其實兩日都夠)，然後再搭多一程機去埋約旦睇佩特拉(Petra)古城，然後可以既話遊埋以色列耶路撒冷，咁個行程就會充實好多。但當然，去多咁多地方自然要用多啲錢，不過應該唔會用多好多，因為香港人去上述所有地方都免簽證，簽證費可以慳番。另外杜拜消費好貴，嗰度既酒店租金自然會貴啲，如果你去埋約旦同以色列，嗰兩度既酒店房租可能可以平啲黎冚番條數。不過，多一、兩程飛機錢自然唔慳得，樓主要查清楚價格睇下自己可唔可以負擔。