BB五六個月時的成長過程,急!!!!資料愈詳盡愈好!!!送十分

5-6個月的BB，這時應該是時候幫佢轉奶粉、同埋開始要比D糊狀食物佢食囉！正式係應該每一日遂少遂少轉專比中BB食的奶粉，轉三日，跟住再轉多餐，例如你bb一日食五餐奶的話：

第1-3日： 一號（初生BB食的奶粉） 一號 二號（中BB食的奶粉） 一號 一號
第4-6日： 一號 一號 二號 二號 一號
第7-9日： 一號 二號 二號 二號 一號
第10-13日： 二號 二號 二號 二號 一號
第14日： 全二號

如果你好似我咁，到bb一日三餐奶先轉奶粉，都係轉中間果餐先，跟住早餐， 最後晚餐。

點解有d媽咪會兩溝咁轉呢，因為係怕d bb唔肯食枝新奶，兩溝等bb習慣下d味， 再慢慢加d新奶粉落去；但係其實咁樣唔好架，因為隻隻奶粉成份唔一樣，溝埋一齊食咪即係亂較奶俾bb囉！

我囡囡初初第一餐轉都唔肯食架，咁我咪由得佢餓下囉，等佢餓到咁上下喊，我再俾佢食，佢餓得耐就自然唔會唔肯食架啦，果時我囡囡都餓多左兩個鐘先同我一次過食晒支新奶佢，第二餐開始就冇咁抗拒，餓半粒鐘就食，慢慢佢就習慣左囉！

bb menu：

豬寶寶的食野時間表

起身： 食返一枝奶，之後就食少少糊仔或果蓉。
10：00： 食多四安奶， 就訓覺。
12：00： 食飯仔，食飽之後，玩一陣，再訓覺
16：00： 起身，食下午茶。
17：30： 洗白白。
18：00： 食飯仔。
20：00： 訓覺。
23：00： 食多一枝奶。


以下的飯仔，可以俾十個月或更加大的bb食用：

肉類： 肉片 / 牛肉 / 鴨腎 / 鴨心 / 雞肉
魚類： 鯇魚 / 大魚 / 黃花魚 / 紅衫魚 / 白飯魚 / 大眼魚 (揀魚肉的時間，連魚皮都唔好要喎！)
蔬菜： 冬瓜 / 節瓜 / 蕃茄 / 紅蘿蔔 / 木瓜 / 菜心 / 菠菜 / 南瓜
另類： 雞蛋 / 芝士 / 蜜棗 / 淮山 / 龍牙百合 (黃色果隻，未漂過的！)

（以上的所有食材都或可以用食物處理器打爛，或用刀整爛！）

我煲過一次淮山粥仔，不過我個仔就唔多鐘意食，所以冇再煲，如果你想煲淮山粥仔，可以用野山淮山(黃色)，磨成粉，用一匙羹淮山粉，凍水連米一同落，煲好就食得（或可加入以上的所有食材調味！）。

蜜棗粥仔：一至兩粒蜜棗，洗乾淨，凍水同米一齊落，(食味架咋，蜜棗唔駛俾bb食)，煲好就食得。呢味粥仔可以去痰火，如果bb 初初起啖又或者傷風尾有幾聲痰聲，食呢味都幾好，亦可以加入龍牙百合，先將百合洗淨，浸半小時，水滾與蜜棗同下。

芝士及雞蛋：呢樣兩樣野都可以加入飯仔，一個星期最多食三隻蛋，芝士就可以日日食，雞蛋加入飯仔，煮到蛋花熟哂就食得架喇！

ABC 粉：(或者可以用organix牌子丫，佢地有專比BB的 abc 粉架！)

先將ABC粉放入滾水中煮，林身就可以取出，跟住就過冷河!
湯底：可用大地魚肉一片，加入滾水中以大火煮一煮，再用細火煮多15分鐘，然後可以加入材料，當材料煮林，就可以加入ABC粉，再煮至大滾，然後熄火，焗一焗佢，D 粉就會索哂D湯味架喇！

湯水篇

清潤湯水

椰子， 紅蘿蔔， 雪耳煲老雞
龍牙百合， 蜜棗煲豬展
蘋果， 雪梨， 南北杏煲豬展
佛手瓜， 蜜棗， 南北杏煲西施骨


化痰止咳湯水

川貝， 海底椰， 南北杏煲豬展(或鷓鴣， 不過依家好難買到真正鷓鴣， 所以都係用豬展穩陣)
木瓜， 龍利葉， 南北杏煲豬展
沙參玉竹煲豬展

健脾開胃，滋補湯水

淮山，茨實，紅棗煲牛秋魚
栗子淮山鮑魚片煲豬骨
花膠響螺煲老雞
淮山杞子龍眼肉煲老雞
蕃茄洋蔥紅蘿蔔煲牛尾(可用牛骨代替)

清熱去濕湯水

老冬瓜煲去濕料
赤小豆，扁豆， 老黃瓜煲西施骨

魚湯

蕃茄紅蘿蔔煲大眼魚
大豆豆腐煲九肚魚(一定要用煲湯魚袋， 因為好多骨架)

下午茶點
麵包 + 芝士 + OATMEALS
燉蛋
粟米蓉
栗子蓉
芝士薯蓉
冬瓜雞肝蓉 (好似滾湯咁， 將半斤冬瓜及兩隻雞肝放落滾水，當冬瓜林了，就取出一隻雞肝及適量的冬瓜用匙羹整碎佢，就可以飲BB食架喇， D湯都可以飲) ，好多BB都唔鐘意飲水，咁我就自己整D 野俾BB飲O既，有以下幾款：

雪梨煲南北杏
紅蘿蔔馬蹄煲粟米蘇
竹庶茅根煲粟米
木瓜雪耳煲南北杏
蘋果水
啤梨水