酒店房務員幾問!

我曾經做過酒店房務員，應該答到你。中四學歷無問題，但當然要視乎你做咩級數既酒店啦，五星以上而依又有幾年經驗都可能得，因為佢地要求會高d ，見工唔多唔少都會考你英文同國語，但如果係三四星級酒店，英文同國語唔叻都得，因為我做過幾間分別三星同四星既，有部份房務員都唔識英文，順便答埋你依行多數都係女仕做多，但男仕都有，我覺得都要幾大體力勞動，反而多數酒店女房務員多過男，唔知點解？33歲都仲可以做既，僱員再培訓同VTC有分別架！再培訓只係十幾日課程，VTC大概兩個月，所學到既野當然係VTC多d 同全面d，VTC著重實習，幾乎每日都要你練執床，仲會教酒店日常會講既英文同國語，我以前讀完連英文都進步左，因為咁樣對將來真正去到酒店做都會容易適應好多，加上如果一個讀完VTC同讀完再培訓既人同時見工，酒店都會揀VTC先，其實房務員係幾辛苦既職位，如果準備唔夠就咁入去做，就算請你你都未必咁易適應到，好多人做唔過試用期頂唔順就走，時間多數都係返九個鐘，不過佢地會以執房既數目為標準，多數酒店一日要執十六間，當然唔會第一日就要你執十六間啦，第一兩日會跟人學，第三日就會要你自己執兩間，第四日三間或者四間，如此類推加上去，房數當然又係視乎咩級數酒店，有部份五六星級酒店一日可能只係執九至十二間，高級酒店人工可以去到一萬二五百蚊一個月，低級既低至六千都有，易唔易搵工好難講，因為經常都有請人廣告，但係去見既人又多，酒店會揀人，但有樣野就係大部份酒店請房務員，唔會話一請就請你做長工，依家趨勢會係先請抄散，意思係臨時工每間房計錢，期間除左有兩餐飯供應，無其他褔利，到你完全適應可以應付一個十六間而又達到酒店既標準，仲要係佢地未必每日一定會俾十六間你，如果入住率唔高一日可能要你只係執十間，再要等到佢地有空缺就可能會叫你轉做長工，依段時間可能要幾個月可能係一年，升職方面要睇你表現，升上去會係掃把，佢地職責係檢查房務員執完間房有冇放漏野，有冇唔乾淨，當然舒服好多，所以都係要睇表現同有冇人走，如果未做過揀一d三四星，要求唔係咁高既做住先，有兩三年經驗可以試下跳去五星級酒店，你想問而我所知既野都答晒，希望幫到你了解依個職位啦！