澳門一日遊

1. 澳門得一個港澳碼頭係來往香港及澳門，
上環<－>澳門：每十五分鐘一班（零晨十二點前，之後班次較疏）
尖沙咀<－>澳門：班次比上環少（我每次去都係響上環坐船，冇認真查證尖咀船期）

但，響澳門的港澳碼頭步行冇幾遠，有個“漁人碼頭”，
係澳門其中一個旅遊景點，有表演睇架！但就冇得坐船番香港 @_@


2. 去澳門呢，我唸你應該會去大三巴的（也是景點之一），
響大三巴果度有好多條街，其中一條，由廣場通到大三巴嘅路，
有好多賣手信（野食）嘅鋪頭，

嗱！我呢就建議閣下先每間試食，有乜你想買，佢又有試食嘅，
你就試試佢，（所以去買手信之前，唔好食咁飽，留啲肚試食）

本人推介：鉅記（脆）豬肉乾，有口感，又香脆；
鉅記杏仁餅，香口，入口有小小溶化感覺；
鳳城鳳凰卷，幾香蛋味；
（講住三樣先，其他留待你去試食同發掘啦！:P）


3. 澳門係可以用港幣，我每次去都唔會換葡幣黎用，
係，香幣係俾葡幣高少少，
但，我覺得每次去澳門，都唔知會用幾多，差少少啫，換多換少都係無謂，

但一定要記住，響澳門用港幣，最好要求佢地找番港幣，
有啲商店，會乘機找葡幣俾你，就算唔賺得你好多，但都係賺左，
係，一次半次，你唔係蝕好多，但食、玩、手信、交通…
真係少數怕長計啦！


好，見你有得去旅行咁開心，醒多少少野俾你：
如果你係自由行的話，你可以去下「黑沙」食燒野食，
唔駛自己燒，有人燒的，你俾錢就有得食，
唔係好貴，雞翼$7、秋刀魚$10、豬扒飽$9…（仲有好多食物不能盡錄）
但去黑沙就得食，冇野玩，同埋坐車時間有番咁上下，（有時間至去啦！）

還有，澳門搭的士，都唔平！
所以先計劃好你嘅行程，（澳門分三個島）玩完一度至去第二度，
唔趕時間，可以搭下巴士！

希望以上資料幫到你啦！
玩得開心啲啦！

1. 澳門只有一個碼頭, 係返香港與澳門的.
2. 買手信的話, 可以去氹仔的官也街買手信.
3. 澳門是可以用澳門幣or港幣的.
建議行程如下:
計劃一:
早上抵達澳門後, 你可以在碼頭搭新福利3號, 3號A巴士或澳巴10號線去議事亭前地, 然後步行前往大三巴牌坊. 再行上少少就會見到澳門大炮台+澳門博物館(博物館逢星期一休館). 之後可以在大三巴再步行5分鐘去聖安多尼教堂及白鴿巢公園. (當你落完大三巴前面的樓梯, 面向大三巴牌坊時, 你的左手面有一條路仔, 沿路仔行5分鐘便到聖安多尼教堂及白鴿巢公園, 果條路仔有好多古董賣的). 中午可以在議事亭前地中央郵局附近的黃枝記食LUNCH, 主要係食中式粥類及粉麵.
下午可以到福隆新街睇下一些特色的街道(福隆新街在議事亭中央郵局對面的澳門民政總署旁邊的橫街入去, 整條街的門窗都係油上紅色的油漆), 然後在新馬路搭澳巴10號線, 在總站落車便到達媽閣廟及海事博物館. 之後可以去附近的主教山小堂. 傍晚可以落一落去位於新口岸的觀音像及宋玉生公園參觀. 晚上可以去漁人碼頭玩及到附近的新八佰伴SHOPPING, 新八佰伴頂樓有美食廣場, 你可以在那裡食晚餐. 如果你有興趣睇賽狗的話, 晚餐後可以在新馬路搭巴士去拱北, 在紅街市附近下車然後行一段路去逸園賽狗場, 入賽狗場只須10元的入場費, 憑入場券可投注一次. 賽狗場門口有好多大排檔的, 可以食埋消夜才走. 走之前順道去埋賽狗場附近的三盞燈睇特色街燈.

計劃二:
早上可以去盧廉若公園及二龍喉公園舒展一下筋骨. 二龍喉公園係有纜車上松山燈塔的. 燈塔旁邊有一間聖母雪地殿聖堂, 始建於1626年. 之後可以搭車前往氹仔, 你可以在氹仔的益隆炮竹廠下車, 到龍環葡韻睇萄國的特色住宅(此處是澳門八景之一), 整座building富有萄國的色彩以及用粉綠&白色為主色. 如果想入埋屋睇的話, 最好是在星期日及5時前去到. 因為在出面睇座building係唔駛$$, 入屋參觀要比入場費, 而星期日入屋參觀是免費的. 中午由官也街行大約10分鐘便可以去到富有中國色彩的花城公園遊覽+食Lunch, Lunch後去四面佛. 下午茶可以去大利來記食馳名的豬扒包及絲襪奶茶, 不過最好要在3:00pm前霸定位, 因為大利來記每日3:00pm會有新鮮的豬扒包出爐, 到時會有好多人去食, 遲D去的話就會賣完無得食架啦! 之後去返官也街買手信, 你亦都可以去官也街9號A的莫義記品嚐特色的三色大菜榚, 如果沒有記錯的話, 應該6-7元就有交易(營業時間至晚上七時半). 晚上可以去附近的熊貓餐廳食地道的萄國菜. 請緊記要預鬆D時間由氹仔出返碼頭, 因為預左會有少少塞車.

1..我知道有一個港澳碼頭,但有冇其他我就唔知

2.豬肉乾,杏仁餅

3.澳門用澳門幣,,澳門邊到都可以用港幣,好似港幣100蚊換澳門幣103蚊