倉鼠便便問題...

樓上網友講既野有d唔同意,因為問題較嚴重,所以樓上網友唔好介意及留意一下以下問題:
1)我就唔建議鼠鼠有病去寵物店問,因為有D病寵物店未必有藥同儀器幫到你,始終寵物店係做生意既地方,就好似店內咩零食佢都會話鼠鼠鍾意同對鼠鼠好,但諗真d就會明白,食咁多類零食係好冇益
之前有網友既鼠夾到腳,最後寵物店叫佢買左皮膚病藥水,萬一唔好彩遇到D咁既情況,鼠鼠既病有機會會惡化,同埋好易延遲左去醫呢
2)天氣凍既話,都唔好俾暖水俾鼠鼠飲,鼠鼠飲既水一定要放涼,唔係會令鼠鼠唔舒服
3)唔好用藥棉,因為可能會令鼠鼠過敏,雖然唔係100%會過敏,但都唔應該試吧?過敏既話,嚴重係會致命,所以最好買鼠專用棉,如果買過既話,應該會知道鼠專用棉其實同藥棉唔同既,但有d鼠棉類似人用既,細細粒,呢d就唔好買

唔知鼠鼠既軟便係幾軟度呢?便便有冇多or少到?水唔多點飲定完全冇飲?
如果所講既紅色係血,有血連住便便,都有機會因為濕濕地而令便便軟,如果係咁就唔係肚瀉,就唔可以俾止瀉藥俾鼠鼠食
如果係有飲過水而飲得唔多就唔洗太擔心,鼠鼠飲水其實好少,因為鼠鼠原居沙漠,較少有水飲,所以你會見到鼠鼠既尿係較濃,以防流失太多水份

A.首先要留意返以下問題:

1)係咪真係大便有血?
留意會唔會係身體第d地方有血,又或有血尿整左落便便度?前者係外傷,後者就可能係膀胱or腎有問題
個籠又會唔會有d紅色野會甩色整到落去?

2)呢兩日有冇俾紅色色素既野食俾鼠鼠食?
有時鼠鼠食左某d色既食物,都會在排泄物見到該顏色既

B.如果不幸真係大便有血,而又唔係便秘或以上問題,就要盡快睇獸醫了,可參考以下獸醫資料:
大圍珍禽異獸及寵物醫院 DR.TIGER/DR.LAM
Tel: 2687 1030 地址:大圍積信街75號地下
http://www.taiwaiexo tic.com/

平d可以睇愛護動物協會,但做手術既話,都可以會叫你睇大圍,因為設備不足.
愛護動物協會診所資料:(需入會) Dr. Corla DeWet
http://www.spca.org. hk/chi/vet/vetclinic .html
愛護動物協會流動醫療車資料:
http://www.spca.org. hk/chi/vet/moclinic. html

C.未咁快睇到醫生既話既,可以做以下既野先:
1)有第隻鼠既話要分籠,唔係會傳染(鼠鼠本身係獨居動物,冇事都係分籠會對鼠鼠好d)
2)保持周圍既環境衛生
3)唔好俾風直接吹到鼠鼠,要鼠鼠保持溫暖
4)俾一d有營養既野佢食.可以試下俾d麥片or白麵包佢(得呢兩類人既食物我會俾鼠鼠食,仲係有病先會俾)
5)如果鼠鼠唔食野唔飲水,就用手直接餵,都係唔食既話,就要俾d耐性試多d,鼠鼠唔舒服,又會好累咁,係冇咩胃口既.但要小心,都唔好嚇親鼠鼠

D.如果似肚瀉既話要留意返係咪真係肚瀉

分辨肚瀉:
1)嚴重既好易分,會明顯地見到鼠鼠既便便爛同濕,如果初期既肚瀉就較難去分
2)你可以拎鼠鼠既排泄物上手咁下,最好係佢排出唻冇耐(過一陣,1分鐘度啦,即摸好易係好林),睇下會唔會好硬,唔洗擔心,佢身體冇咩事既話唔會好臭.其實最好係成日咁樣去檢查鼠鼠既排泄物,因為如果之前你冇掂過,就好難分係咪特別林or硬左,我成日都會咁做
3)留意鼠鼠肛門一帶會唔會成日濕濕地,但便秘都會濕,但應該唔難分佢係肚瀉定便秘
4)清晒個籠之後,再仔細留意佢既排泄物係咪真係比平日多左,如果平日冇留意既話,就較用呢個方法難分,不過多數之前講既方法已可分到

肚瀉既要留意以下幾點:
1)買d止瀉藥加入水度俾佢飲
2)唔好食零食之類,蔬果更加唔可以食啦.可以俾d白麵包or麥片佢食.(好少量),其他人既食物當然都係唔好俾鼠鼠食啦,鼠鼠正常時都唔可以,好返都要戒口一段時間
3)有第隻鼠一齊就要分籠,因為會傳染既,而且俾藥都要分籠先俾到
4)保持個籠衛生
5)接觸鼠鼠之前之後都洗乾淨手,自己有唔舒服既就唔好接觸or靠近鼠鼠咁多.
6)鼠鼠有唔舒服係會特別怕人,都唔好打擾佢咁多
7)鼠鼠既用品同籠都要用動物專用既消毒劑消毒
8)密切留意下佢既排泄物變化,留意鼠鼠尾部會唔會成日濕晒,如果濕既話整乾淨又會唔會再瀉返,長期濕就可能係好嚴重既濕尾症.而濕尾症就多數好難會好得返,好快會死.最好就盡快要睇醫生.
9)肚瀉不止(2,3日左右)or瀉得嚴重,就最好去睇醫生啦