倉鼠 ,,,,,,,,,冬白&布丁&小紫王

1.你講既鼠其實都係冬白鼠,冬白鼠仲包括小銀弧,小灰霸,我唔屬沙田,但其實一般鼠店都唔難買到冬白鼠,只係布丁較少有,多d揀同平d既,可以去旺角金魚街睇下

2.小灰霸大約 $6-20
小紫王大約 $6-40
小銀弧大約 $30-60
小布丁大約 $50

買鼠時要買既物品:(大約價錢)
1)鼠籠(數十~數百都有)
要揀一d地板係冇一間間既,因為一間間既地板好易會卡住鼠鼠,我細個時就係因為咁而有隻鼠因為咁而死.鼠鼠好多都會咬籠,如果怕佢地成日咬,可以買一d較密封既籠.
2)水樽
多數籠都包埋,每次換水時必須用手試下係咪出到水.
3)沖涼粉($30~65)
有分普通同藥性,買藥性都ok,但記得唔好成日沖涼,一星期1-2次,唔可以用水沖涼.
4)磨牙石($10)
唔磨牙會死既,所以一定要有,普通既同鹽磚都ok,如果鼠鼠唔咬,就最好買d木制玩具俾鼠鼠咬,唔係隻隻鼠都會咬特定既野,因為佢地唔知樣物件係點用既.
5)轉輪(較大$30~55)
都係多數籠會包埋,但都要留意唔好係一間間會卡鼠腳既,唔係都會好危險.鼠鼠好需要活動,而大多喜歡轉輪,所以都係必需品.
倉鼠係夜晚活動,日頭訓覺,怕嘈既話可以用一d安靜既轉輪,又可以搽d牛油落去個軸度,當然咁整要成日洗下個轉啦. 咬籠嘈既你就訓練下佢,佢咬既時候鬧下佢(最緊要係個態度,佢唔明你講咩架),或者唔理佢,佢唔咬就俾少少野食佢食(主糧度俾一粒佢已經足夠)
6)鼠糧($20~30)
買一包咩都有d既混合主糧就可以,唔需要買零食,我個人經驗係愈少雜食,鼠鼠身體愈健康,可以去到年老都冇病.唔好俾鼠鼠食蔬果,因為易肚瀉,又可能有農藥等問題
7)食物盆($10~60)
最好就用一d咬唔爛既食物盆啦,買一d大既不秀鋼食物盆之類就幾好用,大到可以放得落成隻鼠,食物唔易飛出,而且鼠鼠好鍾意成隻坐晒入去咁食野既,雖然會貴d,但好耐用又安全,我既鼠用開既,都用左好多年了
8)木糠($5~30)
可以既話買d較貴既木糠,因為冇咁碎,碎既木糠易令鼠鼠有呼吸道問題,而有味既木糠就唔好買啦,加埋鼠既排泄物味,係會好臭既,都易令鼠鼠敏感.
9)屋仔(跟籠or自買,約$30~50)
有屋仔會令鼠鼠住得安心d,較有安全感,唔好買草屋之類易爛既屋仔,唔係會整親鼠鼠
10)額外物品(視情況而定,可以唔買)
除左轉輪,鼠鼠玩既玩具最好係鼠鼠專用既木制玩具,因為自己整既木易有刺,可以俾鼠鼠爬唻爬去,鑽唻鑽去既就多數都會玩.
唔好買波波球之類(有d係成架車,車上有個球,類似既玩具),都算係危險既玩具,因為通風做得比較差,而且鼠鼠被困入面,好有壓迫力,想像下你被困一個咁既物品入面,行極都出唔到去有咩感覺?所以我就覺得呢款玩具唔係幾適合鼠鼠玩既

3.小紫王我覺得較好,較乖

4.平日養鼠要留意既事:
1)每日換水,並檢查水樽係咪真係出到水同會唔會漏水

2)食物要有足夠既份量,多d都唔緊要,鼠鼠係知飽既.最好放多d,多d食物先令鼠鼠有安全感,一般乾糧可以耐d先換

3)糧食方面都要留意好多人既食物都係唔適合鼠鼠既,甚至蔬果我都覺得唔好,原因如下:
a)好多蔬菜都會有農藥,人食既時候整得唔熟都已經有問題,而鼠鼠既體積咁細,極少農藥都會做成問題,所以俾鼠鼠食係好危險既.
b)咁多水份既食物好容易令鼠鼠肚瀉既,肚瀉對鼠鼠唻講係幾嚴重既病,好易會死架.就算毫無農藥成份既蔬菜,都好難控制俾幾多蔬果俾鼠鼠食,好易俾過多,所以唔俾好過.
c)其實人類既食物大多數都唔適合鼠鼠食既,有d食物可能好少份量已經會超出鼠鼠可承受既鹽or糖份,又或會對鼠鼠係太刺激食物等,食得唔健康好易病既.
d)鼠鼠多數鍾意將食物收埋入腮再去安全地方收埋(有時鼠鼠放入腮但都會好似食緊咁),之後再食,新鮮食物咁處理既話會好唔衛生,好易到食物壞左鼠鼠先進食

4)一星期用沖涼粉沖一次涼,真係太熱太臭最多都係兩次,有病先例外.唔好用水同鼠鼠沖涼.

5)一星期大洗籠一次,平日覺污糟都可以打掃一下,鼠鼠多數排泄得好集中,打掃排泄開既位置同佢訓既位置就已經好好多(因為鼠鼠用排泄物去表示呢個係自己地頭,所以訓既地方都會排泄)

6)唔好用有味or有色既木糠,最好買d冇咁碎既.有味既木糠加埋鼠鼠既排泄物係好臭既,有色就可能會甩色,碎既木糠就易影響鼠鼠呼吸道.以甘既都易令鼠鼠敏感.

7)個籠一定要安全,唔會有野整親鼠鼠,唔好用一間間好通風既轉輪同地板,好易卡住鼠鼠隻腳.

8)鼠鼠好叻走佬,留意有冇咩位鼠鼠會走到.

9)鼠鼠怕凍,更怕熱,凍同熱都要為鼠鼠保暖or解暑

10)好緊要既係,平日多d留意鼠鼠既身體同排泄物,有咩異常就可能係有病.

11)鼠鼠既牙係不斷生長,所以要有野俾鼠鼠磨牙,唔磨牙既話,d牙會插穿鼠鼠,令鼠鼠死亡
如果你隻鼠唔咬磨牙石,就可以買一d木制玩具俾佢咬(磨埋爪都得),又或可以試下鹽磚.

12)除左轉輪,鼠鼠玩既玩具最好係鼠鼠專用既木制玩具,因為自己整既木易有刺,可以俾鼠鼠爬唻爬去,鑽唻鑽去既就多數都會玩

5.一般唻講唔算惡,如果可以一籠一鼠,加上適當既照顧,應該都會好乖

6.內容太長,可參考我回答既知識: http://hk.knowledge.yahoo.com/question/?qid=7007092404538

7.鼠鼠買返唻既初時,頭兩日唔好打擾佢,再試下以下方法:(耐左都同鼠鼠唔熟,都可以試下做)
1)你可以隔住個籠叫多d佢,在籠邊拎d野食引佢埋唻(主要係想有食物袋既聲音俾佢聽到),唔一定要拎零食引佢,拎主糧入面既野食都ok架啦,唔食零食會健康d.日日叫佢都有野食既話,佢好快就會記得你把聲or裝食物既袋既聲音,我覺得鼠鼠認食物袋既聲比較快.
2)等到你地熟d,做到你一行過佢就行埋唻or冇咁驚你,之後你可以試下伸隻手入籠隻俾野佢食
3)再熟d再試下俾野佢食既摸下佢頭or身
4)佢都唔抗拒之後,可將食物放在手心,等佢行上唻食,慢慢佢會習慣左你既手
5)再熟d就可以抱佢,抱既時候唔好忽然由頭or從後抱起佢,咁會令鼠鼠以為有敵人攻擊,最好慢慢叫住佢先抱佢,如果抱唔到,可以用乾淨既杯唻俾佢上去咁樣抱

另外,養倉鼠前需要考慮一下以下幾點:
1)倉鼠天生根本就係獨居動物,根本唔適合群居,就算兄弟姊妹,同性別or唔同性別,都一樣可以打到死晒.睇書知道,外國既鼠鼠繁殖場都係一籠放一隻鼠,到發情期先放埋一齊一陣既
2)鼠鼠既繁殖速度好快,而且繁殖鼠鼠有好多問題(例如鼠媽媽有機會會食bb,bb未戒奶就打交但又唔分開得),就算樣樣都解決到,都會令鼠鼠既生活質素下降,鼠媽媽生育後壽命又會縮短(甚至難產),好多隻鼠又會有第d問題,所以真係唔好俾鼠鼠生bb呢
3)可能你會話鼠店既鼠咁多隻一齊都冇事,但鼠店既鼠仲好細,所以唔會打得好犀利,而且你睇到鼠店既鼠既時間都未到深夜,唔係鼠鼠最活躍既時候,所以未必俾你見到有咩問題.但我曾經見過,鼠店一堆鼠入面,有隻鼠已經得返d白骨...所以鼠店講既野,,唔好盡信,鼠店有鼠死左都唔會俾客人知呢
4) 就算兩隻鼠初初唔打交,其實之後都好易再打,特別係鼠鼠夜晚活動既多,半夜打起上唻,你又唔知既時候,仲危險.我細個既時候都試過覺得2隻鼠好似好fd咁放埋一齊,同一胎,我出去一陣返唻就打死晒啦
5)可能會諗鼠鼠會怕悶,但其實鼠鼠天生獨來獨往,只要有足夠既空間同運動(一個轉輪都ok啦),鼠鼠就唔會悶
6)要考慮清楚係咪可以照顧鼠鼠一世,唔會因為鼠鼠大隻左而嫌棄.
7)得到家人同意去養
8)預算好養鼠既費用,包括鼠鼠有病既話要付出金錢去買藥,睇醫生