澳門旅遊問題

建議行程如下:
第一日行程:
早上抵達澳門後, 你可以在碼頭搭新福利3號, 3號A巴士或澳巴10號線去議事亭前地, 然後步行前往大三巴牌坊. 再行上少少就會見到澳門大炮台+澳門博物館(博物館逢星期一休館). 之後可以在大三巴再步行5分鐘去聖安多尼教堂及白鴿巢公園. (當你落完大三巴前面的樓梯, 面向大三巴牌坊時, 你的左手面有一條路仔, 沿路仔行5分鐘便到聖安多尼教堂及白鴿巢公園, 果條路仔有好多古董賣的). 中午可以在議事亭前地中央郵局附近的黃枝記食LUNCH, 主要係食中式粥類及粉麵.
下午可以到福隆新街睇下一些特色的街道(福隆新街在議事亭中央郵局對面的澳門民政總署旁邊的橫街入去, 整條街的門窗都係油上紅色的油漆), 然後在新馬路搭澳巴10號線, 在總站落車便到達媽閣廟及海事博物館. 之後可以去附近的主教山小堂. 傍晚可以落一落去位於新口岸的觀音像及宋玉生公園參觀. 晚上可以去漁人碼頭玩及到附近的新八佰伴SHOPPING, 新八佰伴頂樓有美食廣場, 你可以在那裡食晚餐. 如果你有興趣睇賽狗的話, 晚餐後可以在新馬路搭巴士去拱北, 在紅街市附近下車然後行一段路去逸園賽狗場, 入賽狗場只須10元的入場費, 憑入場券可投注一次. 賽狗場門口有好多大排檔的, 可以食埋消夜才回酒店. 回酒店之前順道去埋賽狗場附近的三盞燈睇特色街燈.

第二日行程:
早上可以去盧廉若公園及二龍喉公園舒展一下筋骨. 二龍喉公園係有纜車上松山燈塔的. 燈塔旁邊有一間聖母雪地殿聖堂, 始建於1626年. 之後可以搭車前往氹仔, 你可以在氹仔的益隆炮竹廠下車, 到龍環葡韻睇萄國的特色住宅(此處是澳門八景之一), 整座building富有萄國的色彩以及用粉綠&白色為主色. 如果想入埋屋睇的話, 最好是在星期日及5時前去到. 因為在出面睇座building係唔駛$$, 入屋參觀要比入場費, 而星期日入屋參觀是免費的. 中午由官也街行大約10分鐘便可以去到富有中國色彩的花城公園遊覽+食Lunch, Lunch後去四面佛. 下午茶可以去大利來記食馳名的豬扒包及絲襪奶茶, 不過最好要在3:00pm前霸定位, 因為大利來記每日3:00pm會有新鮮的豬扒包出爐, 到時會有好多人去食, 遲D去的話就會賣完無得食架啦! 之後去返官也街買手信, 你亦都可以去官也街9號A的莫義記品嚐特色的三色大菜榚, 如果沒有記錯的話, 應該6-7元就有交易(營業時間至晚上七時半). 晚上可以去附近的熊貓餐廳食地道的萄國菜. 請緊記要預鬆D時間由氹仔出返碼頭, 因為預左會有少少塞車.

第三日行程:
早上可以去路環的黑沙灣OR竹灣等海灘踏下水, 之後可以去路環西部的石排灣郊野公園行下山及去郊野公園內的土地暨自然博物館. 中午出返去路環市區的聖方濟各教堂, 教堂前有一個具葡萄牙傳統風格的廣場, 廣場兩旁設有餐廳和咖啡廳可以食Lunch. 另外, 還有一座紀念碑, 紀念路環市民在1910年戰勝海盜的事跡.

P.S.: 最後一日如果酒店退了房但仍然有地方未去及帶住好多行李唔方便的話, 可以要求酒店方面將行李寄存, 走的時候才回酒店取回. 另外澳門巴士車費方面: 澳門市區去澳門市區劃一為2.5元, 去氹仔3.3元, 去路環5元. 你亦可以睇下附近有沒有免費的酒店專車去你想去的景點.

1) 去澳門有咩係特別好食的(或必食的)?尤其是正餐, 請提供埋鋪頭名, 地址

答: 講真，澳門真係冇咩好食。

我試過在威尼斯內的「渢竹」食過自助餐，覺得水準高，價錢平過香港，好好味，每人$208。這個價在香港只能吃三至四星酒店的東西，但在那裡可以吃超水準的六星食物，好抵食架，我兩夫婦吃完都讚不絕口。
尤其是小碗蒸蛋，我的至愛，有史以來覺得超滑的蒸蛋。另外生蠔及長蟹腳亦值得一試，非常鮮甜。其他與香港五星酒店的食品差不多，不過味道就真係唔錯，我試過在香港吃這類的自助餐一定超過$350。超抵。
7:00前入座多數有位，7:00後入座要訂位，好多人吃架。

另外去新馬路近手信街(手信街街頭有棵樹，向左行幾步)，有間台灣胡椒餅，一流，下午人龍都好長，此食物雖然好好味，不過可惜係台灣特產，$10一個。

胡椒餅隔離有間好亂好污糟的舖頭，阿婆買金錢餅，我未吃過，唔係我唔想食，而係好難買到，因為材料靚，又系本土人即時做，所以人龍好長，我見買到的人都贊不絕口。

2)豬排包那兒好食?我想係近葡京/新馬路那頭的,方便去的, 請提供鋪頭名, 地址

答: 豬排包我在葡京咖啡廳吃過，唔好味。聽說(乙水)仔手信街的包好吃，不過未試過，唔知。

3)想請問澳門call的士(電召的士)的電話號碼, 有冇人知道?容易call到的士嗎?

答: 去澳門最好搞清楚他們的巴士路線，在酒店可以搭酒店免費旅遊巴(未必是你住開那間，是旦一間都得)，亦可在酒店搭的士，但千萬千萬不要在街頭搭的士。

澳門的士好串架，D司機又會簡客，短途佢地多數唔載，所以你唔好晒浪費時間係街等的士。鬼咩，澳門人多的士少，方搵唔到食，好鬼串。

我11月底去完啦，係威尼斯因為人多，要等個幾鍾先有的士，所以搭旅遊巴去金沙，點知去到金沙因為人太少，冇的士入來，咁我地咪行去漁人碼頭等囉，結果等了兩個鍾，都係白等，跟住又返去金沙搭旅游巴去威尼斯，結果第一日就咁為了搭的士而浪費了一日，澳門的士早就被我罵到臭啦!

唔好的經驗，借你參考。

連在街找的士都咁難，咁就唔好話電召的啦!


4) 由葡京搭的士去威尼斯人酒店要幾多錢大約?

答: 大約$50-$70，那要看他們會唔會兜路。第一次我由碼頭搭去威尼斯$100，第二次由威尼斯搭去澳門市中心的議事亭$45，其實兩條路線都差不多，不過價錢就差好遠，你要小心啊。

5)晚上威尼斯10:00前多唔多的士可截到走?

答: 多，很多。不過如果你去澳門市中心還可(約$60)，如果你去(乙水)仔(約$15)，他們都會車，不過面色就冇咁好睇啦。因為他們係排好耐隊入來的，唔通想吉車出去咩，不過他們心內一定數臭你(只要你見他們搖搖頭就知啦)。 如果你可以厚面皮當咩都睇唔到，咁就冇所謂啦。

祝你旅途愉快!