肥鼠疴哂D大便响鼠棉度呀!

唔知你隻鼠係完全唔再用鼠廁所,定係都有用鼠廁所呢?

鼠鼠用鼠棉後,排泄地點問題,主要都係以下呢三個情況:
A.便便部份在棉,部份在廁
如果係部份便便在鼠棉,都有一部份便便及尿尿在鼠廁所,呢個情況就十分普,好多鼠都會咁做,因為好多時鼠鼠就算用鼠廁所,都會在其他地方排泄,主要都係訓覺既地方,而鼠棉鼠鼠係用唻訓覺,所以就會出現用鼠棉後在鼠棉上便便既行為
而且就算唔係直接在鼠棉度便便,鼠鼠可能只係想在訓覺既地方便便,而鼠棉係好易痴到便便上去,咁就好似幾集中在鼠棉度便

呢個情況既話,建議你由得佢咁做,鼠鼠係用排泄物去表示該地方係屬於佢,所以十分習慣在訓覺既地方排泄,鼠鼠既天性就建議你唔好阻止,亦都十分難阻止,始終佢都冇放棄晒個鼠廁所
而便便其實都唔係太污糟,除非佢肚瀉,又或平日好多零食,咁就難講,鼠鼠本身係食糞既動物,因為好多營養未消化就排左出唻,所以鼠鼠係會食返自己既便便去吸收當中既維生素B同K,同時排泄物中既礦物質都對身體有益,不過而家鼠糧營養豐富,就好少真係會食便便,但可想而知,便便其實並唔係咁污糟既

B.所有便便在棉,尿尿在廁OR尿在其他地方
唔再用鼠廁所唻便便就麻煩d,細鼠教去廁所應該都花左唔少心機,俾一舊鼠棉就打回原形,實在令人沮喪,加上正所謂學壞容易學好難,鼠鼠自行改變習慣,又要再教唔係易事,好易會事倍功半

你可以試下將鼠棉內既便便揀返出唻,放返入鼠廁所,如果尿尿在其他地方唔係在鼠廁所,都可以將有尿既木糠放埋入去廁所度,就好似教鼠鼠用廁所既方法一樣,但就更加辛苦要揀便便
揀完便便出唻既棉可以俾返鼠鼠,又或換一舊新既棉俾鼠鼠,盡量令鼠鼠接觸到既都係冇便便既棉,如果成舊有便便既棉放去鼠廁所,我怕會令鼠鼠誤會,鼠棉原來係新廁所,以為排泄落鼠棉度係正確,咁就唔好啦,更唔好就係當鼠鼠在廁所度尿,整濕左d棉,就好臭,又易整濕埋鼠鼠
但都要留意返,就算教得識佢,都可以會好似A點既咁,好難做到完全當鼠棉只係用唻訓

C.便便+尿尿全部都在鼠棉
呢個情況係一定要處理,我以前有一隻鼠試過呢個情況,十分麻煩,肯好鼠鼠既尿唔算多,亦比較濃,唔係仲大件事
尿尿在鼠棉會令鼠棉濕,咁就好易令鼠鼠冷親,而且係好臭好唔衛生,冬天既時候又未必咁易買到大量鼠棉,所以呢個情況就最麻煩了

當時我四出買左大量鼠棉,因為當時係假期,除左買棉就睇實隻鼠,常常同佢換返乾淨既棉,將鼠棉中既便便揀出唻,而鼠棉中部份有尿既鼠棉就拆出唻(拆出唻既係好少既棉),再放入鼠廁所換一舊乾淨既俾佢,真係十分努力左好幾日,見鼠鼠開始去鼠廁所排泄,佢一用完廁所我就俾野佢食,之後終於冇在訓覺既棉尿尿,都仲係有A既情況,但我已經十分開心了
做法雖然好似好誇張同辛苦,但我之前養兔仔既時候,試過好幾隻兔都係俾自己既尿整死,有D浸死,有D冷親而死,最高紀錄係1日死1隻兔,我都唔記得養過幾多隻(我當時太細)...,實在令我太擔心鼠鼠都有呢個問題

如果冇咁多時間去處理,就可以試下唔成日睇住,只係將便便同有尿既棉放去鼠廁所試下,情況嚴重既話,可以考慮換一個頗密封既籠,,放十分大量既木糠,屋仔用一D出入口較細既(但唔好買草屋,因為鼠鼠咬爛既話,入面既鐵絲會整親鼠鼠),再將籠放去較暖既位置,棄用鼠棉,好過鼠棉濕左令鼠鼠更凍

希望你既鼠唔會係咁,我咁多隻都只係一隻試過,好彩!

2007-12-18 19:00:29 補充：
努力,教鼠鼠用返廁所實在不易

Sa嬌の迷＊要大叫:「好愛佢地呀!」

其實係因為倉鼠會响家裹度大大(溫暖的地方)
(唔一定有效)辦法:早上唔比鼠棉佢用,等佢sleep先比鼠棉佢用
要擺鼠棉係toilet,佢去toilet度就拿起鼠棉