有關澳門的酒店

講真，雖然港澳碼頭附近都好多酒店，但係，因為澳門本身嘅路況太差，而且，政府對建設”無障礙通道”嘅意識都幾薄弱下，所以，要推輪椅去到，都幾難（除非冒險橫過馬路啦，碼頭附近又正響度拆賽車D嘢，都幾亂下，想衝過去都唔易）．

最近碼頭嘅係漁人碼頭，裡面有間萊斯酒店，不過，由漁人碼頭正門行到去酒店，大約都要５分鐘（推輪椅可能要１０分鐘，因為有D上落斜位，要走”之”字路）．

漁人碼頭旁邊有間金沙（不過好似只服務佢D賭客，唔知有冇得就咁租）．

呢兩間就係響港澳碼頭嘅旁邊（海邊呢邊），算係比較易推輪椅去到．

再隔離遠少少就係文華東方酒店（響金沙隔離）．

跟往就要過對面馬路（跨過友誼馬路，條馬路都幾闊，車都幾快，雖然成日都有同胞就咁衝過馬路，推住輪椅就唔好試啦），金沙對面就係金龍，問題係點過馬路呢？係有扶手電梯上天橋呀，但係輪椅都幾難上扶手電梯．

行埋少少仲有皇家金堡，同一問題－上落天橋．

文華東方對面有間銀河華都，都係同一問題－上落天橋．

唉！澳門就是與別不同，發展旅遊業，但係就冇以人為本嘅構想，歧視傷殘人士．

2007-12-17 19:30:34 補充：
都有一個方法過馬路嘅，先響碼頭上二樓（碼頭裡面好似有lift俾輪椅人用），之後出去，沿住行人天橋，過去八佰伴，再用八佰伴嘅lift落樓（八佰伴好似係開11:00~21:00嘅），之後出去，過去金龍同埋皇家金堡都可以勉強無障礙嘅．