我隻貓做咗手術3日, 個口腔同鼻腔重好腫, 仍然間歇有血水流出, 令佢鼻塞好辛苦, 又唔肯食嘢, 醫生話佢一日唔食嘢一日都唔可以出院, 但佢喺醫院始終唔習慣, 好驚慌, 即使護士放一把鉸剪落檯面發出的kong一聲都令佢跳起, 根本瞓唔到覺, 佢而家好攰好虛弱, 無得靜心休息, 試問咁又點會好轉?
我好擔心佢喺醫院再拖落去都唔會好, 重拖壞身體, 請問有無網友既貓仔有類似經驗, 教吓我啦! 我真係好擔心呀!
xokitty0812, 好多謝你寶貴意見! 我的貓貓上星期五有點打乞嚏, 半夜情況突然嚴重咗, 毎30秒打一個乞嚏, 星期六即刻同佢去太平道寵物醫院, Dr Kam話係Cat Flu, 返屋企食咗一日藥乞嚏少咗, 但星期日下午就唔食嘢, 傍夜個鼻突然出血, 返醫院睇急診…
另一個Dr Potter話佢唔係Cat Flu, 係牙齒同口腔發炎腫脹迫爆咗血管, 要立即做手術, 但我隻貓已經17歲, 我非常猶豫, 驗血後醫生話佢身體機能好好, 咁大年紀連腎功能都好正常, 話我無得選擇, 一定要俾佢做洗牙剝牙手術, 但先觀察佢24小時, 我堅持唔簽紙, 要等足24小時再見過醫生了解情況先決定, 第二朝探病時, 佢成口成鼻都係血, 佢哋話佢半夜鎮靜劑過咗突然好激動噴血, 先發現佢個口入面有個瘡爆咗, 但後來已止血無大礙…
到第二晚醫生話佢情況穩定可以做手術, 又話有信心無問題, 話佢身體OK, it's not a big deal 咁話, 我再三問佢係咪有信心, 佢實牙實齒話無問題, 強調貓貓既情況係無得我選擇, 重話第2日或最多留多一日就可以出院, 於是我就簽咗紙. 11號凌晨做完手術頭一日佢都重OK, 到12號晚佢哋唔再俾氧氣箱佢, 將怇轉咗去鐵籠, 上下重有d中型狗好嘈, 有d狗主嚟探病大聲喝d狗, 令佢好驚完全瞓唔到, 我要求轉返氧氣箱, 但佢地話安排唔到, 佢咁多日一直唔飲水唔食嘢去唔到便便又瞓唔到覺…
到尋日一早我去睇佢佢突然抽筋, 另一個Dr Holli同佢檢查話唔知點解, 要再觀察, 幾個鐘頭後, 另一個Dr. Guo 話貓貓有生命危險, 叫我哋快d去睇佢, 去到醫院照咗x-ray, Dr. Guo話佢個肺有陰影,可能係cancer, 亦可能係手術後佢年紀大心臟弱, 導致肺積水透唔到氣. 會幫佢打去水針, 如果只係肺積水應該會好轉, 但如果係cancer相信會係喺一個月內惡化...
我哋係醫院陪佢到下午2點幾, d護士叫我哋夜晚9:30探病時間再嚟, 我哋9點幾再到醫院, 嗰個Dr Hollis就同我哋話貓貓情況好差, 應該過唔到尋晚, 叫我哋襯有人喺度陪住佢安樂死. 我哋真係好傷心, 隻貓陪咗我哋17年, 我爸爸生前最鍚佢, 爸爸過咗身之後只得佢陪住我同媽媽, 我哋同佢就好似相依維命咁, 佢上星期重好健康好活潑, 幾日間受盡痛苦就被迫離開, 佢臨死都用盡最後氣力撐起身望吓我哋道別, 我哋一路摸住佢同佢掃背脊同臉豬直到佢走咗. 我真係覺得好內疚令佢受咗咁大既痛苦同傷害. 我同媽媽都好難過都心痛呀!!!!!!!!!!!!!
