我18歲都比人管

雖然話係廿一世紀, 加上你都成年, 仲要下下管住晒, 真係好離譜。但, 好明顯, 你屋企都係太擔心你姐。好可惜, 佢地用錯左方法, 仲係錯到離晒譜, 兼唔顧人感受。我好同情你的處境, 所以忍唔住走黎答你問題。

其實, 並無話你屋企人有權還是無權咁管你。你接受唔到, 但你又唔想同屋企鬧薑, 咁你唯有同佢地慢慢傾 (不過, 我估佢地都係啋你都傻的)。如你既接受唔到, 兼一心要獨立, 我會大膽建議你自己搬出去住。

雖則呢 d 係你的家事, 但如你十八歲都仲要捱打, 咁真係好無人權, 好封建, 差在你朋友唔使連坐乍。呢 d 家庭點忍呀 ??? 而家打隻狗都分分鐘都比人登頭條啦, 何況係人 ??? 你屋企人一廂情願以為為左你好, 乜都管住, 仲要又鬧又打, 我覺得佢地好無文化, 好唔文明。老實講, 我見過三四個類似你的例子, 最後的結果都係一樣, 個女一識飛即刻同屋企反面, 之後在外面就好似解除束縛咁好放縱, 好唔自愛, 我當然唔想你都係咁。

建議你, 由於始終係你家人, 同埋只係太緊張你, 所以希望你唔好怪佢地先。但, 之後你都要企硬, 一係你有你去街, 拍拖, 你屋企有你屋企鬧, 唔使嬲, 唔使激氣, 更唔使同佢地鬥鬧, 當佢地唱歌。打你咩 ??? 報警都得添呀, 但絕對唔鼓勵你咁做。打你咪即走囉, 如唔比你走, 困住你, 仲好。關埋房門執定野, 你始終都要出外的, 一出門咪立埋野走囉。你唔使驚你屋企人報警, 因你已成年, 你有權咁做。但你要有心理準備你家人一定會有更激 o既 相應行動, 因呢場硬仗要一次過打, 所以如開始左, 就一定要撐到底, 唔可以認輸。

如最後你屋企人肯妥協就最好, 又唔使搬走, 又唔使同佢地反面。而且搬離家都好講經濟能力同其他因素, 所以你先要衡量下你可以點做, 同做到 d 咩野 ? 先好開始你的爭取行動, 而開始左, 就一定要堅持到底。

其實一家人, 有咩唔可以坐埋一齊傾丫 ??? 因你係女仔就要你好似坐監, 驚咁多, 咁你父母就唔應該生女。你家人咁樣, 根本對雙方都有好壞的影響, 所以, 你不能再忍落去。

我建議妳鬧返佢
話比佢知妳已經大個女
妳不如搬埋去男友度住la

18歲都成咗年la
但係你二哥仲要管你,,
18歲已經係大個女喇,,
應該要有番D自由
唔好下下管住,,

你10點先放工,,
根本冇可能係10點半番到屋企,,
你不如找日叫你二哥接你放工
睇下佢可唔可以半個中番到去

女仔一向都貪令,,
化妝根本就理所當然

女仔大大下就會對異性產生興趣,,
拍拖在所難免

你應該向你二哥說明你GE情況

如果你二哥真係明知你最早都要10點先至有得收工, 而又限住你10:30前一定要返到屋企, 仲要唔聽佢講就喊打喊殺, 咁又真係好過份喎, 因為不論你係咪18歲, 佢郁手打人或體罰你就係唔岩架啦! 不過我相信你即使由油麻地返大圍屋企又應該唔駛用成2個鐘咁耐, 除非你收工係街度食埋飯既啫.

另外, 我唔明點解你二哥連你化妝都話你, 佢所持既理由係咩呢?或者你形容多d我會明白多d. 至於佢見到你男友又鬧你, 我亦想知佢係鬧你乜野呢? 太早拍拖? 男友人品太差? 識左男友太短時間帶返屋企?抑或怪你識左男友唔一早介紹佢識? 唔同原因都可以有唔同解釋架!

至於你覺得自己18歲你二哥就冇權管你, 咁我又有少少保留, 因為我唔知你有幾識諗(即係為自己打算), 如果你係生唔埋腦筍個種女仔, 18歲對你黎講亦只係一個數字遊戲,咁屋企人絕對有權管你, 當然唔係好似你二哥咁激要郁手郁腳啦, 屋企人管你, 係唔想你行差踏落, 因為唔係發生所有事, 你都有能力自己去承擔, 你諗下如果真係有事發生, 最終包庇你,保護你,攬你既又會係邊個丫? 咪又係同你日日住埋一齊最親既屋企人.

如果你二哥對其他兄弟姐妹都係咁惡, 咁就係佢性格同態度問題, 同你18歲根本無關, 如果佢淨係針對你, 咁我諗應該係你既問題, 除非佢同你有不共戴天之仇, 又或者你地係同父異母或同母異父個種啦, 否則無理由佢會咁對你.

我覺得你可以表現得成熟d, 同埋搵埋你其他兄弟姐妹或父母幫你同你二哥理論, 如果你真有道理既話,其他人無理由會唔幫你既, 起碼下次你二哥再出手打你, 都有人會撐你丫! 至於18歲呢個問題, 我始終覺得唔代表d乜野, 因為真係要睇你自己既思想夠唔夠成熟, 只你要明白一隻井底之蛙, 即使俾佢活到100歲, 佢一日跳唔出個井, 經歷唔到出面既世界, 佢一日都仍然係井裡面一隻乜知識都冇既青蛙.