氣車音響！！！

我都係渣貨van，之前都有玩音響，大家研究下。

恕我直言，如果以你3-5千蚊筆值，加上你想要車機、前後喇叭、後級同低音，我相信，只有大陸車機，平價喇叭，大陸後級，同平價低音至做倒。

始終，汽車音響係一種奢侈品，亦係一分錢一分貨，另外，會唔會引起D賊既光顧亦係問題，等我同你分析下。

機頭，我之前亦係用有牌子既日本機，但早前被人爆左，而家只有用大陸機頂住。我7年前用Kenwood既Touch mon VCD機($11000)，5隻Sound Stream A/B類後級($15000)，3隻Alpine後級($8000)，全車17隻高中低音Rockford喇叭($15000)、水塘、電子分音、電池......加埋成$80000，之後不足兩星期，比人爆車，想連車帶機偷，雖然及早比人發現無偷倒，但都比人搞到車窗、錶台、匙膽.....熔熔爛爛，隔左成年至好低調咁重新裝過。早兩年換車，唔想再玩，只換左部JVC入門級既DVD大面板，同樣又被人偷。之後裝過一套大陸兩件頭既DVD機同大陸伸縮Mon($1350)，裝左1日，聽/睇左半隻碟，完全接受唔倒，第二日退貨換左第二D野，再換過部大陸既Touch mon DVD大面板($2000)，雖然D聲勉強接受倒，但有時D聲有D盟，而且日間個mon仲好反光，完全唔清。

好喇！講完題外話，如果保安方面你唔需要考慮，純綷聽歌唔睇DVD，我建議你咁。

買部好少少既機頭，Alpine大路，D聲又唔差，你預$3000左右既已經幾好，再買對千零蚊既頭喇叭，喇叭方面，要視乎你想買幾錢同你親身聽，始終口味不同，岩我未必岩你。玩住先，有多餘錢再玩後級推低音，之後再玩一隻4路後級推前後喇叭.....水塘、電子分音。

又如果你需要考慮保安方面，又唔介意D聲，只要接受倒，人有我有就ok既，你可以選擇JVC既車機，價錢千鬆D有交易，視乎你要咩功能，例如有無入SD咭、USB、DVD、定齋機之類，加隻4路既日本後級，前單元，後6X9平價日本喇叭，加埋裝工，都已經差不多$5000咁上下，低音遲D再加。

又再如果你只係想人有我有，完全唔理D聲、個樣接唔接受倒，總之想$5000樣樣有，你可以選擇用大陸機，大陸車機我試過兩件頭、一件過同大面板，我覺得最好係大面板，連裝$2000樓下，加隻千幾蚊既大陸5路後級，一隻幾百蚊大陸低音，二三百蚊前單元加五六百後6X9日本牌子平價喇叭，或幾百蚊兩對前後單元喇叭，你預$6000樓下，呢類大陸機你可可以到鴨寮街行下睇下格下價。

最後，由於市面上牌子、型號太多，都係果句，岩我未必岩你，我無謂介紹比你，要你親身試聽。如果你買日本牌子，唔好買Sxny，因為真係好雞，同埋千祈唔好貪平，因為而家好多名牌假貨，Sound Stream、Rockford、DLS.....幾百蚊有交易，但我有個做音響評判，專業玩同做汽車音響既朋友話，如果係真貨，即使唔經代理，直接同間公司拎水貨，平極既4吋單元喇叭都要過千。

如果你仲想大家研究下，可以e-mail我。