✔ 最佳答案
唔知你隻鼠係男定女同幾大年紀?同一籠有冇第隻鼠?便便有幾林呢?
如果真係大便有血,可能係腸胃出血,又或便秘令鼠鼠排便困難而出血,但你話佢既便便係好林,就唔似便秘,係內臟既問題要搵獸醫先處理到
鼠鼠病既初期未必會好累既,所以唔可以話見佢精神就遲左處理
而便便林可能係因為有血,整住D便便都會較林,一般肚瀉甚至濕尾症就好少話會瀉到出血
A.首先要留意返以下問題:
1)係咪真係大便有血?
留意會唔會係身體第d地方有血,又或有血尿整左落便便度?前者係外傷,後者就可能係膀胱or腎有問題
如果係女鼠,就要留意會唔會係佢陰道出血,唔正常既陰道出血可能會係子宮腫瘤
2)會唔會係有第隻鼠打傷佢呢?
檢查返會唔會有外傷,因為呢D位置用唔到外傷藥,所以係既話就要睇醫生先處理到,當然都要同第隻鼠分籠
3)呢排有冇俾紅色色素既野食俾鼠鼠食?
有時鼠鼠食左某d色既食物,都會在排泄物見到該顏色既
4)個籠會唔會有d紅色野會甩色整到落去?
B.如果不幸真係大便有血,又或係A點1,2既原因,就要盡快睇獸醫了,可參考以下獸醫資料:
大圍珍禽異獸及寵物醫院 DR.TIGER/DR.LAM
Tel: 2687 1030 地址:大圍積信街75號地下
http://www.taiwaiexo tic.com/
平d可以睇愛護動物協會,但做手術既話,都可以會叫你睇大圍,因為設備不足.
愛護動物協會診所資料:(需入會) Dr. Corla DeWet
http://www.spca.org. hk/chi/vet/vetclinic .html
愛護動物協會流動醫療車資料:
http://www.spca.org. hk/chi/vet/moclinic. html
C.未咁快去到既,可以做以下既野先:
1)有第隻鼠既話要分籠,唔係會傳染(鼠鼠本身係獨居動物,冇事都係分籠會對鼠鼠好d)
2)保持周圍既環境衛生
3)唔好俾風直接吹到鼠鼠,要鼠鼠保持溫暖
4)俾一d有營養既野佢食.可以試下俾d麥片or白麵包佢(得呢兩類人既食物我會俾鼠鼠食,仲係有病先會俾)
5)如果鼠鼠唔食野唔飲水,就用手直接餵,都係唔食既話,就要俾d耐性試多d,鼠鼠唔舒服,又會好累咁,係冇咩胃口既.但要小心,都唔好嚇親鼠鼠
D.以防萬一,都要檢查下係咪便秘
分辨便泌:
1)拎鼠鼠既排泄物上手咁下,最好係佢排出唻冇耐(過一陣,1分鐘度啦,即摸好易係好林),睇下會唔會好硬,唔洗擔心,佢身體冇咩事既話唔會好臭.其實最好係成日咁樣去檢查鼠鼠既排泄物,因為如果之前你冇掂過,就好難分係咪特別硬左,我成日都會咁做.
2)清晒個籠之後,再仔細留意佢既排泄物係咪真係少左
3)睇下鼠鼠排泄時會唔會好辛苦,平日休息又會唔會好痛苦咁縮埋一舊
4)便秘有時會見到佢肛門附近會濕濕地咁既
便秘處理方法:
1)將水放近鼠鼠訓覺既地方,必須確定水樽出水係冇問題(平日都要,但便秘時水份特別緊要)
2)可以俾少少橙既"衣"俾鼠鼠食,再睇下情況有冇改善,都唔得既話,俾極少極少既橙肉俾鼠鼠(大約半隻指甲大小),唔好俾菜,易有農藥但記得真係便秘先好俾,唔係一陣攪到隻鼠肚瀉就慘
3)情況都冇改善(2日度啦),就必須睇獸醫處理
2007-12-03 23:47:03 補充：
多謝你有睇我以往既回答,更開心係睇到你對你既鼠鼠既愛護,希望你既鼠會冇事便便都要留意返係咪剛剛排出先係好似飯咁,剛剛排既時候係較林,如果過1分鐘左右都係咁既樣,就真係有唔妥,鼠鼠體內似乎有點問題可以俾生既麥皮俾鼠鼠食,白麵包都可以,俾麵包就要留意返唔好俾太多,因放得耐會壞,麥片就冇咁易壞天氣涼涼地都記緊小心保暖呢唔知你約左醫生未呢?雖然係過兩日先去睇但一定要早d約,咁先約到個識醫鼠既醫生
2007-12-03 23:47:22 補充：
去睇醫生前都記得諗定有咩要講,同埋記得問清d藥點食,洗唔洗再睇之類,最好寫低啦,唔知你會唔會,我次次帶鼠睇醫生都會好緊張,擔心鼠鼠有事,又怕鼠鼠俾醫生整親嚇親,最初冇寫低真係問少好多野仲有,唔洗叫我博士呢,博士只係知識 既級別名稱,叫我杰就可以了,唔洗咁客氣^^
