費達拿的個人資料

費達拿（Roger Federer，1981年8月8號—）喺瑞士巴塞爾（Basel）附近嘅Binningen出世，係男子職業網球運動員。身高6'1"，體重177磅。喺媒體上有「瑞士快車」（Federer Express）嘅封號，喺中國，「費天王」、「奶牛」亦係佢嘅花名。

2005年到2007年，費達拿連續三年得到「勞倫斯體育獎」年度最佳男子運動員。2007年4月，瑞士為佢發行郵票；瑞士好少為人物發行郵票，為在世人物發行郵票更加係少之又少，可見佢晌同胞心目中嘅超凡地位。

目錄 [收埋]
1 簡歷
2 網球生涯
2.1 早期
3 大滿貫賽事成就
4 連出去



[編輯] 簡歷
費達拿嘅阿爸 Robert 係瑞士人，阿媽 Lynette 係南非人。佢哋喺同一間製藥廠工作，喺一次生意差事中互相認識，之後結埋婚。費達拿重有一個大佢兩年嘅家姐 Diana，係一個護士。

費達拿嘅成長道路上嘅偶像係碧加（Boris Becker）同埋艾堡（Stefan Edberg），之後最鐘意嘅球員係森柏斯（Pete Sampras），呢啲都係單手反拍嘅球員。

喺語言方面，費達拿能夠講三種流利語言：德語（母語）、法語、英語。

喺2000年嘅悉尼夏季奧林匹克運動會，費達拿識咗女朋友Miroslava (Mirka) Vavrinec。佢亦都係職業網球球員，喺2000年奧運會中同費達拿一齊代表瑞士參加網球項目。但係，因為腳傷所以喺2002年退役。

2003年10月，費達拿開展以自己個名命名嘅男性化粧品事業。

2003年12月，費達拿晌南非成立費達拿基金會，幫助貧困兒童（主要喺阿媽嘅家鄉南非），以及促進世界青年體育嘅發展（主要係網球）。


[編輯] 網球生涯
右手攞拍嘅費達拿喺網球方面好有天份，職業生涯非常成功。佢喺1998年7月轉為職業球員，開始咗職業網球生涯，無幾耐就躋身世界排名頭100名。2004年2月2日，22歲嘅時候，費達拿第一次升上職業網球男子單打世界排名第一位，重一路保持到而家。2007年2月26日打破美國名宿康納斯（Jimmy Connors）嘅連續160週世界第一紀錄。2005年勝出率達到0.9529（81勝4負），係自1984年嘅麥根萊（John McEnroe）之後最高，亦係1968年公開賽年代以嚟第三最高。

費達拿適應各種場地條件，依家係名副其實嘅網壇統治者（「一哥」），因此幾乎係所有比賽嘅冠軍大熱門。


[編輯] 早期
費達拿三歲嗰時，跟父母去網球俱樂部，因而第一次接觸到網球。到八歲，佢開始喺屋企附近嘅老男孩網球俱樂部（係泥地球場）打波。佢喺返學期間同時參加咗網球同埋足球兩項運動，兩方面都表現得非常好，但到咗十一、十二歲，不得不從中揀一樣，佢選擇咗網球。喺十四歲嗰陣時，費達拿入咗瑞士國家網球中心接受訓練。但係，為咗能夠更專心練網球，費達拿喺十六歲嗰陣時就決定唔再返學。

費達拿早年(1992年到1998年)嘅教練 — 澳洲嘅彼得‧卡達（Peter Carter (1964年8月9號 - 2002年8月1號) ）同佢關係非常密切。

費達拿專心打波之後，1998年，登上青少年世界排名第一。喺嗰年嘅澳洲網球公開賽青少年組晉身準決賽。同一年贏咗溫布頓網球錦標賽青少年組嘅男單同埋男雙冠軍。又係同年喺美國網球公開賽青少年組殺入決賽，決賽輸畀阿根廷球員納爾班迪安（David Nalbandian）。同年，喺邁阿密橙碗比賽，亦係佢自己嘅網球青少年時期嘅最後一場比賽之中，贏咗阿根廷球員哥里亞（Guillermo Coria）奪得冠軍，並且以青少年世界排名第一結束。


[編輯] 大滿貫賽事成就

費達拿喺2005年溫布頓網球錦標賽男單桂冠

澳洲：2004、2006、2007
法國：
溫布頓：2003、2004、2005、2006、2007
美國：2004、2005、2006、2007



2001年溫布頓網球錦標賽第四圈 7-6、5-7、6-4、6-7、7-5 擊敗1990年代嘅球王森柏斯（係兩人職業生涯唯一一次交鋒），破壞後者晌英國嘅31連勝紀錄，一鳴驚人，堪稱係佢最大嘅事業勝利。後來晌八強以四盤輸畀英國球員漢文（Tim Henman）
2003年以21歲之年贏咗個人嘅第一個大滿貫錦標 — 溫布頓網球錦標賽冠軍，決賽贏澳洲球員菲臘普西斯（Mark Philippoussis）7-6（7-5）、6-2、7-6（7-3）
2004年喺四大滿貫男單賽事中贏咗三個冠軍，係自1988年瑞典嘅韋蘭特（Mats Wilander）以嚟，第一個晌單季中贏到三個大滿貫男子單打冠軍嘅球員，亦係公開賽年代以嚟嘅第四位球員
2006年澳網贏到冠軍，係連續第三個大滿貫賽冠軍成為佢嘅囊中物，係繼1993年溫網至1994年澳網嘅森柏斯之後嘅第一人
晌個人生涯嘅頭七個大滿貫單打決賽都贏得男子單打冠軍（2003年溫網 - 2006年澳網），係自公開賽年代以唻第一人，紀錄到2006年法網決賽輸畀西班牙球員拿度（Rafael Nadal）6-1、1-6、4-6、6-7（4-7）先至完
2006年美網贏到冠軍，實現美網三連冠，平咗麥根萊（1979年到1981年）同蘭度（1985年到1987年）嘅紀錄，仲有望晌下一屆打破呢項紀錄添
2006年一年之內打入晒所有四項大滿貫男單賽事嘅決賽，係自1969年澳洲嘅傳奇名將洛利華（Rod Laver）之後嘅第一人
2006年繼2004年之後再一次一季之內贏咗三個大滿貫男單賽事冠軍，係公開賽年代以嚟唯一一個兩次攞到呢個成就嘅球員
2007年澳網不失一盤贏到冠軍（決賽贏智利球員干沙里斯（Fernando Gonzalez）7-6（7-2）、6-4、6-4，贏得佢第十個大滿貫），平咗瑞典名宿波格（或者譯做博格，Bjorn Borg）晌1980年法網上創造嘅「完勝」奪冠記錄；同時亦係個人第二次連贏三個大滿貫錦標
2007年澳網贏到冠軍之後，成為第一個晌三個大滿貫賽事都贏過最少三次嘅男子網球員
2007年溫網決賽苦戰五盤打贏宿敵拿度，實現自波格（1976年到1980年）以唻第一個溫網五連冠。
2007年美網決賽三盤打贏塞爾維亞嘅祖高域 7-6（7-4）、7-6（7-2）、6-4，係自公開賽年代以唻第一個美網四連冠；亦都成就佢個人繼2004年、2006年之後第三次一季之內贏咗三個大滿貫男單賽事冠軍。
（截至2007年美網）由2005年溫網開始未缺席過大滿貫男單賽事嘅決賽，係連續第十次晉級大滿貫嘅決賽，打破73年之前Jack Crawford保持嘅七次紀錄，其間只係輸咗兩個法網冠軍（2006、2007）