買近千萬豪宅用私人名義或公司名義買好呢, 有甚麼分別?

買物業打厘印嘅錢同你用私人或公司名義買並無關係, 都係一樣咁多, 以一千萬樓價嚟講都係$375,000.00.
銀行按揭方面, 如果用私人名義買, 就用私人名義借錢, 銀行會睇你個人嘅收入, 包括薪俸,租金收入, 股息收入等等等等, 一般每月嘅按揭供款唔可以超過收入總額嘅一半; 如果係用公司名義買, 而該公司係你做開生意的話, 銀行就要睇該公司盤數, 包括過往嘅會計帳目, 睇吓所繳納嘅利得稅, 營業額等等等等, 如果該公司係空瞉公司, 即係你只係買佢番嚟買嗰個物業嘅, 咁銀行都係要睇番作為董事嘅你嘅個人收入, 而且再要加董事嘅個人担保.
稅務方面, 以私人名義買, 你可以有自用物業供樓利息嘅扣減, 但每年扣減嘅上限係$100,000. 而且只係可以扣減七年; 以公司名義買, 有關該物業嘅所有支出, 包括供樓利息,差餉管理等等等等,都可以在帳目上記上, 咁每年都可以有一個虧損,一路累積落去, 日後你以該公司買賣物業得到嘅利潤,以該累積嘅虧損對銷, 就可以慳番好多利得稅嘞.仲有, 如果以私人名義買, 稅局好可能會問吓你你俾嗰三成首期嘅錢係點嚟架(當然如果你過去年年都報足晒入息稅嘅就冇所謂啦).
當然,有利有弊嘅, 你用公司名義買物業, 你要用多幾千蚊買一間公司,每年交商業登記費(二千幾蚊),並且為公司做好盤數俾核數師核數以便報稅, 咁每年就要使多幾千蚊嘞.另外, 每年定期要向公司註冊署提交年報(有關股東及董事公司秘書嘅變動), 遲咗仲要罰錢添噃.