Canon G9附件問題

我都買左兩個星期，花左成個月去學快門、光圈、景深先決定買佢﹗我對上o個部都用左4年先換呢~~~

先解你既憂慮，有關WC-DC58B你講o岩一半，已有前輩指出正常使用不開閃光下完全冇問題，但如要加閃光，一定要再自行加外置閃光，否則會有黑角(因內置閃光既光線被個大鏡庶住左)，我已入購WC-DC58B證實以上皆屬實。不過本人覺得冇問題，因為夜景少用廣角，就算我用，都多數選擇減低快門以吸收最好的光線，好少開閃。

配件值唔值得買呢﹖我覺得值得，我明白樓上所說的G9係一部All in one既機，多帶配件要裝拆及效果半桶水，但佢係用單鏡反光既機來比較wo....。買得G9既人應該都係一樣，想影靚相及學影相，但又想平時都可以帶出街唔想大舊，RIGHT﹖

我自己既想法係咁，買G9係因為去外國旅行我都可以帶住佢周圍去，但當我在本地影相時，我又唔介意袋多一兩舊野去影靚相囉。配左鏡後要同單鏡比梗係半桶水啦，但同返G9未加鏡前比就絕對可以加強拍攝效果了~~~

有關配件，因為D配件只限G7orG9，銷售率好低，所以一般都係要訂貨先有的。樓上講o個間DC fever亦一樣冇(成個旺角我已走遍，只有星際2樓一間舖有現貨，但個cheap精抬高至$1100，我採佢都傻啦)，之後去油麻地數碼廣場鐳射訂貨，第二日下午就取貨了。其實任何一間連鎖影音店如百老匯等都可以訂貨服務。

至於價錢，你唔駛諗喇，佢官方已定左LA-DC58H $160、WC-DC58B及TC-DC58C均$960，鐵價不二。只有賣貴不會賣平的﹗

至於二手，係真既.....唔好買二手野，價錢唔差太遠之遠，有咩暗病你用肉眼都係睇唔到，往往要用上幾次甚至幾日你先會發現到的。而且最重要既一點，我曾於各大網站及店鋪徵尋二手貨(包括三種配件)，結果都係""零""﹗勸你唔好重蹈我的覆轍白花時間了。


強烈建議電同接駁器買代用便可﹗始終唔係專業玩家，唔駛每樣野都要求原廠，代用價，電只係幾十(我係送埋的...所以唔記得幾錢了)，接駁器$45(我在鴨街入手的)

認同唔好急於買齊晒所有配件，我原本同你一樣想買齊所有野，仲睇中左支$500腳架，而結果只先買一個最貴的原廠廣角鏡$960及鴨街cheap腳架$50，試下自己o岩唔o岩玩再決定是否投資買貴野。

建議唔好買遠攝，除非你要用來偷拍或觀鳥，否則真係冇咩用(因為G9焦距本身就短，你加遠攝都做唔到淺景深，只係zoom至24倍...諗真D你幾可用得到先。廣角就影風景、山景、海景、大合影等都一流，好實用﹗