鼠........................................

唔知你既鼠B幾多日大呢?而鼠爸鼠媽又養左幾耐?

1)有時鼠鼠既行為未必同人既感觀一樣,你所講既情況,我有第個睇法,我覺得要就返鼠鼠既天性同原居環境去睇返會較好
A.照睇你係將兩層籠分左上下,上面係鼠爸,下面係鼠媽同鼠B,唔知咁既擺設係咪剛開始?
忽然將籠既野有所更改,兩層變一層更加係好大既轉變,鼠鼠係好好奇既,有唔同左會情緒緊張or試下改變or掘地,係好正常既反應,加上下層有第隻鼠,有氣味or聲音,鼠鼠就會更好奇,你是旦拎隻鼠去一個兩層籠住,忽然改成一層,相信都好易有呢個反應
我之前買左隻已懷孕既鼠,都試過將兩層籠改成一層,下面既就不斷向上頂同爬,上面既就不斷向下抓,用返你既講法就係佢地想一齊,但其實佢地之前係一齊,仲打到飛起呢,到可以將佢地完全地獨立分開籠,情緒先穩定落唻

B.要將鼠爸分開,除左係怕鼠爸會傷害鼠b,都怕鼠媽見到鼠爸在而傷害鼠b,都有網友話一家人一齊冇問題,但過左一排之後,同一網友就話見住有食鼠b既情況,我唔係話一定會咁,而係機會其實唔細,咁博唔博就睇你點去揀,只係為左鼠爸好似想同佢地一齊而去博,我就覺得唔值得,我細個都試過鼠鼠生完bb俾佢地一齊住,睇住鼠爸點食鼠b,真係畢生難忘
同時,就算鼠b冇危險,呢個時候如果兩隻鼠再交配,有可能在鼠b未戒奶時鼠媽又再生,不斷生育唔計處唔處理得到,仲要諗對鼠媽既傷害,而第一批鼠b又可能會傷害第二批鼠b,但未戒奶時又唔分開得,進退兩難

C.鼠鼠在二樓掘地,其實都仲有一個解說,鼠鼠原居沙漠地底,掘地其實好多時都會有,只係籠既地係掘唔穿,如果佢掘既位置係有孔or本來有通道,鼠鼠就更易掘得較耐,鼠鼠可能唔明,點解明明之前唔係咁,而家會咁既呢?

D.唔知你既鼠B幾大,但鼠鼠生完BB有D野要留意返
a)將鼠爸及其他鼠分開
b)唔好接近個籠,唔好掂鼠媽媽同bb,盡量等到鼠bb戒奶後先洗籠(大約18-21日戒奶)
c)用奶粉沖d奶代替水俾鼠媽媽飲,記得唔好俾鮮奶,唔係會令鼠鼠肚唔舒服既
d)放定好大量既食物入去,之後換食物換奶都要小心唔好俾鼠媽媽發現,到鼠bb識行之後,食物就要整碎d,唔係bb食唔到/食左落去吞唔到就大件事.
e)唔可以將鼠bb同媽媽分開,唔係bb就冇野食,生存唔到.我細個既時候,有人教我用手餵bb飲奶,但咁係唔可行既.
f)另外,如果用既籠係通風,bb可能會趺出唻,可以用d膠file整開包住個籠,但記得要整多d小孔,唔係就冇空氣

食唔理鼠bb or 鼠bb被食有幾個原因:
a)如果鼠媽媽覺得bb有危險-媽媽會食左bb/收埋bb入腮,令鼠bb缺氧,都會食bb
b)鼠媽媽覺得bb養唔大-鼠bb身體弱 or 自己冇足夠既奶分俾佢地
c)鼠媽媽覺得bb有第d動物氣味
d)鼠媽媽情緒太緊張-有第隻鼠在場,有外來環境令佢緊張,有人打擾佢,甚至只係因為生育而情緒緊張
e)鼠bb死左
f)鼠爸爸對bb根本冇咩感情,所以如果生之前冇將鼠爸分開籠,爸爸就有機會會食bb,而鼠媽媽感到威脅,都會唔理鼠bb

2)同性別既鼠當然地唔會生bb啦,但同性別同一胎既鼠並唔代表唔會打交,我細個有同一胎兩兄弟,我覺得感情係最要好既,忽然出去一陣就打死晒了
同時要留意,分錯性別除左會繁殖之外,仲會係亂倫,後果就可能會較嚴重,會有機會生出畸胎

其實鼠鼠最好分籠,繁殖鼠鼠會有好多問題,希望你可以考慮一下之後唔再繁殖鼠鼠,我自己一籠一鼠左好耐,鼠鼠身體都好D,唔會被打,又少受驚,我既鼠多數都係老死OR年老腫瘤而死(當然配合返唔亂食野,同適當地對鼠鼠啦),建議分籠原因如下:
1)倉鼠天生根本就係獨居動物,根本唔適合群居,就算兄弟姊妹,同性別or唔同性別,都一樣可以打到死晒.睇書知道,外國既鼠鼠繁殖場都係一籠放一隻鼠,到發情期先放埋一齊一陣既
2)鼠鼠既繁殖速度好快,而且繁殖鼠鼠有好多問題(例如鼠媽媽有機會會食bb,bb未戒奶就打交但又唔分開得),就算樣樣都解決到,都會令鼠鼠既生活質素下降,鼠媽媽生育後壽命又會縮短(甚至難產),好多隻鼠又會有第d問題,所以真係唔好俾鼠鼠生bb呢
3)可能你會話鼠店既鼠咁多隻一齊都冇事,但鼠店既鼠仲好細,所以唔會打得好犀利,而且你睇到鼠店既鼠既時間都未到深夜,唔係鼠鼠最活躍既時候,所以未必俾你見到有咩問題.但我曾經見過,鼠店一堆鼠入面,有隻鼠已經得返d白骨...所以鼠店講既野,,唔好盡信,鼠店有鼠死左都唔會俾客人知呢
4) 就算兩隻鼠初初唔打交,其實之後都好易再打,特別係鼠鼠夜晚活動既多,半夜打起上唻,你又唔知既時候,仲危險.我細個既時候都試過覺得2隻鼠好似好fd咁放埋一齊,同一胎,我出去一陣返唻就打死晒啦
5)可能會諗鼠鼠會怕悶,但其實鼠鼠天生獨來獨往,只要有足夠既空間同運動(一個轉輪都ok啦),鼠鼠就唔會悶

2007-11-27 18:13:36 補充：
鼠b 4-5日大,咁樣放埋一齊更加大問題,雖然而家看似冇問題,但唔等於以後都係咁,之前都有人講,有d鼠b15日,24日大都仲會俾鼠媽傷害因為答過不少問題,搵唔返之前所講既例子,但以下我回答既知識,你都可以睇返佢既情況,佢最初都係完全冇問題既http://hk.knowledge.yahoo.com/question/?qid=7007071105166好明白有d人會覺得,點解好地地要分開一家人,但都要了解返鼠鼠既特性,鼠鼠唔同人,倉鼠係獨居動物,感受當然同人唔同啦,建議你分開佢地,只係為你既鼠鼠著想,希望你明白及考慮分開,到有問題時先再處理,可能已經補救唔到

2007-11-27 18:13:45 補充：
鼠b又好,成年既鼠都好,一定唔可以飲維他奶,人既食物同飲品唔可以輕易俾鼠鼠食用,咁係好危險既事,鼠b只可以飲鼠媽既奶,而鼠媽就可以飲奶粉沖既奶,唔好俾鮮奶,因為易肚瀉