(急)有關破產問題

我四年前破過產,以我經驗,你個Case要分兩方面睇!如果你決定申請破產的話......
首先站喺銀行同財務公司立場嚟講,你喺準備破產前三個月左右,其實就唔應該再碌啲信用卡,因為你有破產嘅想法時,即是代表你已經經濟出現困難,你既然知道還唔到錢,點解仲要去碌爆啲卡呢,你咁樣即係加重銀行同財務公司嘅損失,就算Aeon張卡係佢地自己批比你,你都唔應該用,而家碌完卡又話破產,銀行有權懷疑你有意圖訛騙,可能會告你,不過呢啲都係以前謝偉俊律師話我知有咁嘅可能啫,因為我同你一樣都係用卡數冚卡數,不過結果銀行都沒有告我,我只係分析比你聽啫,唔駛驚嘅.
至於你自己方面,你隨時都可以申請破產,唔關有無工作做嘅事,不過自己申請破產要比錢㗎喎,如果你搵律師幫手,以謝偉俊律師為例,我破產嗰陣時,佢律師樓收$999(而家有無加價就唔知喇),連埋啲文件影印費等,總共大約一千蚊多些,但係比高等法院嗰啲費用就八千多元,差不多九千(現在有無加價就唔知),即係話你自己申請破產,如果搵律師攪,大約一萬一千左右,如果自己攪,節省律師費淨係比高院都要九千蚊,但有律師幫手,唔駛自己落手落腳做,安枕無憂,而且律師會第一時間,幫你發信通知晒銀行,話你申請破產,銀行和收數公司就唔會再煩你.
但如果你無錢比破產費,就唯有唔還錢,等銀行和財務公司自己申請你破產,不過佢地唔會咁輕易申請你破產,點都會搵收數公司麻煩吓你先,等佢地真係認為你無力償還先會行最後呢步,申請你破產,你就一蚊都唔駛出,不過就要比收數公司騷擾你一段時間了.
你仲有無其他問題?如有問題,請加在補充內,我再回答你吧!

2007-11-16 20:16:25 補充：
如果你真係擔心的話,咁咪還住最低還款額先囉,一於拖住兩三個月先,呢兩三個月你所有卡都唔好再碌喇,然後三個月後就申請破產,咁銀行和財務公司咪唔會懐疑你意圖訛騙囉.至於攪破產方面,自己攪都要成9000蚊,搵律師攪都係比多千多蚊,但係有人幫你出律師信通知銀行和財務公司,我覺得係值得嘅,因為破產要填嘅文件好煩,有律師幫手,好做好多.律師係唔會問你點解會碌爆啲卡嘅,因為唔關佢地事,佢地唔會問亦唔想知,反而破管署將來就會問你,你到時咪話失業無嘢做,又無錢找卡數,所以用咗啲錢嚟做生活費同埋找卡數囉,佢地會接納你嘅解釋,因為我嗰陣都係用咁嘅理由,佢地都無抽秤我.

這樣才是真心幫人的~

我係欠債及破產過來人 想分享下我的經驗去我的破產網誌"一起走過欠債及破產的日子"到睇下
內有好多有關欠債及破產資料 還在不停更新中,謝謝。

http://auctions2007.mysinablog.com/