澳門旅遊 - 行程安排

1. 假設你在早上點幾十一點到澳門

2. 先在『利澳酒店』登記入住

3. 乘巴士過氹仔，官也街落車去誠昌食水蟹粥

4. 預計一點左右出發，步去龍環葡韻散步影相（對岸就是威尼斯人），吸收下大自然空氣

5. 再步行至大利吃豬排包，品嚐莫義記大菜糕或木糠布甸

6. 打的去威尼斯人，約二十蚊車費
如果還想吃東西，可先打的入路環市區，品嚐安德魯葡撻，才回程入威尼斯人
由於威記廿四小時都開放，可選擇夜點才去，安德魯黃昏便關門

7. 約八時回氹仔市區晚膳，有多間出名葡國菜如木偶、公雞、小熊貓．．．

8. 如果晚膳後還早，可回澳門逛逛新八佰伴，不過本人認為冇咩好睇，八佰伴10.30關門

9. 晚上去皇朝酒吧街飲杯野（與利澳相近，步行回酒店亦可）

10. 第二天早上（約十點出發）去二龍喉公園，可乘全世界最短既覽車上松山（雙程$5）
早上的松山好靚，可瞰澳門全景，空氣又清新

11. 中午去新馬路福隆街吃煲仔翅、下午茶可選牛什或義順炖奶，至於禮記就要步行約十幾鐘分，來回都要半小時架，未必夠時間去

12. 下午可逛逛板章堂、噴水池，買手信
若愛影相，建議去民政總署內既葡式花園，板章堂既玫瑰堂、大堂、盧家大屋、關帝 廟．．．
若第一天去不到路環吃安德魯葡撻，建議第二天下午行街時可去南灣（近大堂）瑪嘉烈食葡撻，瑪嘉烈自從跟安德魯離婚後就自己開左間餅店同佢打對台，所以瑪嘉烈葡撻一樣美味



若打算晚膳後才離澳，可在附近（議事亭前地）進餐，有中菜、意大利菜、法國菜、葡國菜、日本菜、上海菜、台式小泉居．．．相信一定有你喜歡的

以下係我去開的行程供你參考:
第一日行程:
早上抵達澳門後, 你可以在碼頭搭新福利3號, 3號A巴士或澳巴10號線去議事亭前地, 然後步行前往大三巴牌坊. 再行上少少就會見到澳門大炮台+澳門博物館(博物館逢星期一休館). 之後可以在大三巴再步行5分鐘去聖安多尼教堂及白鴿巢公園. (當你落完大三巴前面的樓梯, 面向大三巴牌坊時, 你的左手面有一條路仔, 沿路仔行5分鐘便到聖安多尼教堂及白鴿巢公園, 果條路仔有好多古董賣的). 中午可以在議事亭前地中央郵局附近的黃枝記食LUNCH, 主要係食中式粥類及粉麵.
下午可以到福隆新街睇下一些特色的街道(福隆新街在議事亭中央郵局對面的澳門民政總署旁邊的橫街入去, 整條街的門窗都係油上紅色的油漆), 然後在新馬路搭澳巴10號線, 在總站落車便到達媽閣廟及海事博物館. 之後可以去附近的主教山小堂. 傍晚可以落一落去位於新口岸的觀音像及宋玉生公園參觀. 晚上可以去漁人碼頭玩及到附近的新八佰伴SHOPPING, 新八佰伴頂樓有美食廣場, 你可以在那裡食晚餐. 如果你有興趣睇賽狗的話, 晚餐後可以在新馬路搭巴士去拱北, 在紅街市附近下車然後行一段路去逸園賽狗場, 入賽狗場只須10元的入場費, 憑入場券可投注一次. 賽狗場門口有好多大排檔的, 可以食埋消夜才回酒店. 回酒店之前順道去埋賽狗場附近的三盞燈睇特色街燈.

第二日行程:
早上可以去盧廉若公園及二龍喉公園舒展一下筋骨. 二龍喉公園係有纜車上松山燈塔的. 燈塔旁邊有一間聖母雪地殿聖堂, 始建於1626年. 之後可以搭車前往氹仔, 你可以在氹仔的益隆炮竹廠下車, 到龍環葡韻睇萄國的特色住宅(此處是澳門八景之一), 整座building富有萄國的色彩以及用粉綠&白色為主色. 如果想入埋屋睇的話, 最好是在星期日及5時前去到. 因為在出面睇座building係唔駛$$, 入屋參觀要比入場費, 而星期日入屋參觀是免費的. 中午由官也街行大約10分鐘便可以去到富有中國色彩的花城公園遊覽+食Lunch, Lunch後去四面佛. 下午茶可以去大利來記食馳名的豬扒包及絲襪奶茶, 不過最好要在3:00pm前霸定位, 因為大利來記每日3:00pm會有新鮮的豬扒包出爐, 到時會有好多人去食, 遲D去的話就會賣完無得食架啦! 之後去返官也街買手信, 你亦都可以去官也街9號A的莫義記品嚐特色的三色大菜榚, 如果沒有記錯的話, 應該6-7元就有交易(營業時間至晚上七時半). 晚上可以去附近的熊貓餐廳食地道的萄國菜. 請緊記要預鬆D時間由氹仔出返碼頭, 因為預左會有少少塞車.

第三日行程:
早上可以去路環的黑沙灣OR竹灣等海灘踏下水, 之後可以去路環西部的石排灣郊野公園行下山及去郊野公園內的土地暨自然博物館. 中午出返去路環市區的聖方濟各教堂, 教堂前有一個具葡萄牙傳統風格的廣場, 廣場兩旁設有餐廳和咖啡廳可以食Lunch. 另外, 還有一座紀念碑, 紀念路環市民在1910年戰勝海盜的事跡.

P.S.: 最後一日如果酒店退了房但仍然有地方未去及帶住好多行李唔方便的話, 可以要求酒店方面將行李寄存, 走的時候才回酒店取回. 另外澳門巴士車費方面: 澳門市區去澳門市區劃一為2.5元, 去氹仔3.3元, 去路環5元. 你亦可以睇下附近有沒有免費的酒店專車去你想去的景點.