倉鼠食毛..

咁既情況一係皮膚病,一係打交,打交都會打到甩毛,兩個可能性都需要分籠,就算係皮膚病,都有機會因為有第隻鼠在同一籠,令佢感到壓力而有,有壓力除左易有皮膚病外,仲有機會誘發肚瀉,瀉尾症等,建議你盡快分籠,到打傷or死既時候就太遲了

A.唔係話有足夠既食水鼠鼠就唔會打交,細細個都係一籠放兩隻鼠,而一隻黃金鼠加一隻小灰霸就試過一次,打得太激烈,唔敢試第二次,因為黃金鼠雖然係最純,但當佢遇到第隻同類時,卻係更早打得勁,未戒奶已經可能會打生打死
我細個一籠兩鼠時,係用兩層籠,食物,轉輪,水樽,屋仔,樣樣鼠用品都最少有兩件,食物當然地係十分多,結果係100%打傷or死,有d發現得早,傷得好少,接近睇唔到既傷,但都係有打
試過晒同一胎兄弟or姊妹,同or唔同性別,沖涼後放埋一齊,同時間買,結果都係一樣

鼠鼠打交係因為倉鼠本身就係獨居動物,野生既鼠都係發情時先走埋一齊,而家做左寵物鼠先被困埋一齊,鼠鼠好多時細個未會打交,大個先打,咁就好易一籠多鼠之後,忽然打得起勁
有時你睇住佢既時候看似唔打交,未必真係一日完全冇打交,有時佢地未了解對方實力未開戰,OR打到冇明顯外傷,打既時候你又不在,咁唔等於佢地真係唔打,我之前有兩兄弟,佢地相處得十分好咁,忽然有一日我出去一陣,返唻打到頭甩腸出,實在唔想你既鼠有機會咁樣

其實鼠鼠最好分籠,繁殖鼠鼠會有好多問題,我自己一籠一鼠左好耐,鼠鼠身體都好D,唔會被打,又少受驚,我既鼠多數都係老死OR年老腫瘤而死(當然配合返唔亂食野,同適當地對鼠鼠啦),建議分籠原因如下:
1)倉鼠天生根本就係獨居動物,根本唔適合群居,就算兄弟姊妹,同性別or唔同性別,都一樣可以打到死晒.睇書知道,外國既鼠鼠繁殖場都係一籠放一隻鼠,到發情期先放埋一齊一陣既
2)鼠鼠既繁殖速度好快,而且繁殖鼠鼠有好多問題(例如鼠媽媽有機會會食bb,bb未戒奶就打交但又唔分開得),就算樣樣都解決到,都會令鼠鼠既生活質素下降,鼠媽媽生育後壽命又會縮短(甚至難產),好多隻鼠又會有第d問題,所以真係唔好俾鼠鼠生bb呢
3)可能你會話鼠店既鼠咁多隻一齊都冇事,但鼠店既鼠仲好細,所以唔會打得好犀利,而且你睇到鼠店既鼠既時間都未到深夜,唔係鼠鼠最活躍既時候,所以未必俾你見到有咩問題.但我曾經見過,鼠店一堆鼠入面,有隻鼠已經得返d白骨...所以鼠店講既野,,唔好盡信,鼠店有鼠死左都唔會俾客人知呢
4) 就算兩隻鼠初初唔打交,其實之後都好易再打,特別係鼠鼠夜晚活動既多,半夜打起上唻,你又唔知既時候,仲危險.我細個既時候都試過覺得2隻鼠好似好fd咁放埋一齊,同一胎,我出去一陣返唻就打死晒啦
5)可能會諗鼠鼠會怕悶,但其實鼠鼠天生獨來獨往,只要有足夠既空間同運動(一個轉輪都ok啦),鼠鼠就唔會悶

B.分籠之後再睇下鼠鼠既毛有冇生返出唻,都係冇既話,就可能係皮膚病了,就要作皮膚病處理
有皮膚病既做法:
1)有第隻鼠既話要分籠,避免傳染or第隻鼠乘機打病既鼠(不過鼠鼠其實係獨居動物,分開住會好d)
2)仔細檢查鼠鼠既食物,會唔會有寄生物,有時有既話未必咁易睇到,呢d寄生物都會令鼠鼠甩毛既
3)有皮膚病就要保持個籠乾爽清潔
4)同鼠鼠每日用藥性沖涼粉沖涼,之後噴/搽藥皮膚病既藥水,藥水應該好多有賣鼠用品既地方都會有,買既時候記得睇下有效日期.
藥水噴落傷口既時候,鼠鼠既反應會好大,我諗應該幾痛啦,所以下次噴就會更難,鼠鼠會反抗愈唻愈大,小心d唔好因為咁而噴到鼠鼠既眼耳口鼻.如果脫毛既地方接近頭部/擔心會噴得唔好,就可以用棉花棒同鼠鼠搽藥.
5)有俾鼠鼠飲既皮膚病內服藥水,叫"美毛素",如果買到都可以加入鼠鼠飲用既水度俾鼠鼠飲,雖然效果比較慢,但唔洗噴藥咁難.價錢就比較貴,大約$55-70,買既時候記得睇下有效日期.
6)唔好俾零食俾鼠鼠食,戒下口先,曾經有鼠店既人話,食人食既食物都會引致有皮膚病,而人既食物其實一般都唔適合鼠鼠,所以唔俾鼠鼠食都係好既.
7)檢查下鼠鼠排尿有冇問題,膀胱or腎有事都會令鼠鼠有皮膚病,咁就要先根治引起皮膚病既問題先
8)檢查一下甩毛既地方會唔會生粒粒,生瘡or腫瘤都會令鼠鼠該位置甩毛,咁就唔係皮膚病,要處理好瘡or腫瘤先
9)唔好用有色or有味既木糠,因為呢d都好易令鼠鼠皮膚敏感,敏感嚴重起唻係會致命既
10)當然可以直接帶佢睇醫生啦. .睇醫生既話可以考慮一下:
愛護動物協會診所資料:(需入會) Dr. Corla DeWet
http://www.spca.org.hk/chi/vet/vetclinic.html
愛護動物協會流動醫療車資料:
http://www.spca.org.hk/chi/vet/moclinic.html

C.佢地已經似有打交既情況,要檢查清楚佢地有冇受傷之類,如果有既話,就要盡快處理

打交受傷既處理方法如下:
1)有流血既話,用藥用棉花咁住傷口,用外傷既藥同佢搽,小心唔好整到眼耳口鼻
2)同其他鼠分籠,因為鼠鼠係獨居動物,好易出現打交情況,如果受左傷仲勉強佢地一齊,會令情況更嚴重
3)冇受傷既鼠,都必須要仔細檢查一下真係有冇受傷
4)佢地兩隻都受驚啦,受驚好易會有其他毛病,同時要keep住檢查佢地既身體同排泄物有冇其他異常
5)保持個籠乾爽清潔,避免細菌感染
6)如果有內服既"外傷素"就可以俾鼠鼠飲住先,但嚴重成咁其實都係要盡快睇醫生先係最好既方法
7)如果流血既情況嚴重, 其實都幾難止血,因為鼠鼠本身會爪會咬,如果都係止唔到既,俾佢試下自己處唔處理到.都係唔得既都幾危險,鼠鼠咁細隻,如果不斷流血,好快就會失血過多...盡快帶佢睇醫生啦

你的金倉可能有一种皮肤病，赶快带他去看兽医，不然他把毛都吃光了就糟糕了！

咁就好明顯佢地係唔可以一齊養啦~
雖然佢地唔打交, 但係好地地一隻小灰霸唔會自己咬自己0既毛架，
快d分開佢地養啦。