✔ 最佳答案
希望你睇完樓上o既答案後，仲有興趣睇我呢ｄ，然後再睇埋我對o個ｄ答案o既意見。
圖片參考：
http://hk.yimg.com/i/icon/16/10.gif
首先，死魚可以好多原因，先睇睇你有冇做左ｄ唔妥o既o野：
１．１１條魚係乜野魚毛？新手大忌係立亂買魚，唔知魚性結果買埋藍斑馬、小王子呢ｄ惡魚；九角龍呢類食魚仔o既魚；仲有會大到成尺長o既琵琶。買魚前研究清楚，可以去討論區問下人，或上網／睇書搵下資料，千祈唔好問售貨員，多數撞板。
２．買o左袋裝魚？定o係缸撈？袋裝魚一般死亡率高，因為你唔知佢入左袋幾耐，剛入袋都可能係一有貨到就即入，舟車勞頓，身體係會差ｄ。所以最好唔好買袋裝魚，特別係個袋冇乜氣，水唔清，魚唔精神o個ｄ。就算唔係，新魚有病，會搞到成缸瘟疫，所以買魚要揀清楚，摺埋鰭／尾，同缸有死／病，身上有爛尾／鰭／白點／一舊發霉狀白色物體／身上一片白左色／魚眼浮腫，都要忍手唔好要。
３．新缸買返o黎後要先浸水日，等污物同玻璃膠氣味等溶入水中，抽走哂再入水。水可以用除氯劑或打氣（或由得缸水過夜），等氯氣清除。濾水器呢個時候可以開始長開，水會自然變得白濁，但幾日至個幾星期就會自然清返（視大小而定）。咁即係硝化細菌開始生長同其化微生物開始減少，咁就可以開始入魚。
４．買左魚後，要原袋放入缸五至十分鐘，等袋中水溫同魚缸水一樣。呢個步驟叫做對溫。然後，可以先倒去袋中部份o既水（如倒到剩返四份一袋，但當然要視乎袋size 同魚o既數目），再慢慢加入魚缸水，加完隔五分鐘再加ｄ，等魚適應魚缸水質。呢個步驟叫做對水。加到係原袋水o既約三倍，然後將魚撈出入缸，袋水唔要，以免有病菌。
５．不能太多魚。如果你養十一條魚，你個缸點都要有近一尺啦卦。
圖片參考：
http://hk.yimg.com/i/icon/16/26.gif
仲要逐少加，一次加太多，硝化菌處理唔到咁多廢物，ｄ魚會俾排泄物中o既廢毒素毒死，所以每次一兩條，俾時間細菌繁殖。
６．濾水器中o既濾材（主要係生物環），就係俾硝化菌落腳o既地方，所以濾水器係必備器材，而其水泵流量要有個缸容量六倍左右。另外，氣泵同暖管（熱帶魚冬天要維持約２５度水溫）都係。
好，答你o個幾條問題先：
１．換水三日一次好足夠，除非你冇濾水器同個缸極細（如四五寸）啦。
２．買魚品種點揀，上面已提及，最主要係品種唔會大到你個缸容納唔到，性格唔會唔相容。如果你用中性水養，其實乜魚都可以ｏｋ啦。
３．魚唔駛日日餵，隔日都可以，每次三至五分鐘食得哂就得；如果缸細魚多，更加要小心唔好餵過量，因為食剩或食得多痾得多，都令水質惡化。
2007-10-18 13:35:38 補充：
《補充》換水三日一次夠，但如果可以一星期一次啦。換水量三份一就足夠。意見：１．you should add some seaweeds ( Sea Grass)＞香港冇乜人種「海」草，只係（淡）水草。魚ｂ都用得草o既，但係草唔夠光同co2都係等枯，令水質變差。而養水草器材多，恐怕唔係你杯茶。２．Sand can get the dirty things out ＞屎沉澱入缸底o既砂度由硝化菌處理，亦令水流冇咁易沖起ｄ屎。屎唔會被砂 get out。
