旦哥主理金牌火鍋在哪,好不好吃?

我尋晚咁啱去咗一間叫金牌火鍋, 不過唔知係咪你話嗰間 “旦哥主理金牌火鍋”, 喺九龍佐敦白加士街10-24號永富大廈1樓.

我覺得食物一般. 成晚覺得最好味嘅係個小食炸魚片頭. 湯底叫咗蕃茄薯仔牛粒併沙爹, 蕃茄薯仔比唔上火鍋館咁濃, 沙爹湯底唔及牛皇星咁香.

其他火鍋食品就真係好一般囉.牛肉有牛味, 不過口感好唔掂, 可能係部位問題掛. 鮮鵝腸夠肥, 不過唔知點解超幼…..墨魚滑唔知裡面有咩, 好似有骨咁, 好似食到雞軟骨嘅口感, 有啲怪怪地. 鯪魚滑好腥, 唔掂…

裝修方面唔錯, 有圓枱有卡位, 而且幾舒服唔會太迫. 價錢方面, 唔算平因為碟碟都好細碟. 我哋冇叫海鮮, 平均每位都差不多2百, 茶介都$20/位.

如果講格調同價錢, 我會去火鍋館囉, 食物質數算ok而且好多野食選擇, 價錢合理. 唯一壞處係坐得好迫.
如果講食物質數, 我係牛魔皇, 就一定去牛皇星, 不過食物種類好少選擇.