✔ 最佳答案
如果真係住家繁殖既話,就會比較健康...
我有2隻狗,1隻住家繁殖 (健康/係人見到都讚佢靚), 另1隻就寵物店買 (返黎第兩日就病,睇左好耐醫生先好,細個定大左之後完全唔同樣,毛色由白變黃)
$1800都OK,其實你可以同佢講價,我之前果隻由$4500減到$3700...
你最好上佢屋企睇狗,睇下狗狗既生活環境同埋見下佢既父母...如果環境差,狗狗容易有病...如果佢父母唔靚,狗狗大過左都可能唔靚...如果無得見父母,分分鐘係大陸狗扮住家繁殖,所以一定要見父母,最少要見其中一個,因為佢可能係搵人配種,未必有齊兩個...
你最好搵D有養狗既朋友一齊去,可以幫你睇下隻狗健唔健康..你要留意下佢有無眼屎,眼有無神,隻耳乾唔乾淨,活唔活潑...
如果你真係買佢既話:
- 記得問佢拎針卡,如果佢話自己同佢打無針卡...咁你就重新同佢由第一支打過,打多左無所謂,但無打就好易病...
- 問個主人狗狗食開咩糧同問佢拎一兩餐既份量比狗狗食住先,因為怕你買唔切糧...你最好唔好咁快同狗狗轉糧,因為同時轉生活環境同糧既話,狗狗可能唔適應...而且轉糧要慢慢轉,唔急得...最好等佢食完1包約5LBS既糧之後,如果你覺得隻糧唔好先幫佢轉...如果要轉最好轉天然糧,會健康D,D毛靚D,各方面都會好左,但天然糧就貴D...
另外想提提你,松鼠狗一般會比較神經質,會經常吠,你要諗清楚先好買...
我自己兩隻係銀狐 (中型松鼠, D人唔識,成日以為佢地係白松鼠), 男果隻就比較神經質,女果隻就唔會...