✔ 最佳答案
其實你要問既野太廣泛，三言兩語只可以講個扼要．所謂輪，其實即係認股證（Warrant），當中又分認購證（call）同認沽證（put）．而一般係港交所公開買賣既大部份係備兌認股證，發行商（即輪商，或莊家）其實同掛鈎既股票所屬公司並無任何關係，結算時亦唔會有任何現貨過手．
認沽證（put輪）既意思係，去到到期日你可以以一個指定價格（行使價）沽出該股票．由於你理論上要係市場買入該股票先可以沽，所以要獲利，市場上既股票價格必須比你認沽證上既行使價低，你先可以賺取其中既差額．而跌得越多，你既利潤就越深．所以買put輪係一種看淡後市既行為．
備兌認股證係一般證券衍生產品，買賣如同正股一樣．但係你要留意一點，備兌認股證作為對沖風險既工具，早已名存實亡．而家輪商發行認股證既角度唔係從對沖風險出發而係從賺取盈利出發，導致窩輪濫發既情況非常嚴重．而大眾無知散戶亦視之為賭博工具多於一切．你睇下而家股市火熱，本來put輪在需要對沖風險下需求理應大增才是，但係情況剛剛相反，call輪既發行及交投反而更加暢旺，put輪則乏人問津．發行商亦都唔會理會一眾股民死活，繼續狂推認購證．
老實講，除非你手上真係有大量高位入貨既大藍籌需要對沖風險，否則我絕對唔贊成買put輪用黎對沖風險．控制風險應該用分段沽貨同止賺止蝕既手段，唔應該依靠輪商既天仙局．如果市況真係轉向，輪商又會唔會濫發put輪？？你從put輪既獲利又是否足夠彌補你正股上既損失？我真係好懷疑．
