倉鼠問題~

✔ 最佳答案

A.混種唔係一定冇BB,但會較同品種難,而混種繁殖其實會有好多問題,除左解決左你兩隻鼠唔打交既問題之外,咁繁殖出唻既鼠會有好多問題
生物學家研究混種,其實唔係好似一般家庭咁,放兩隻唔同品種既鼠就咁交配而得出唻,佢地會將兩種唔同品種既鼠既基因純合先,即係將該品種不斷亂輪交配,令基因純化,咁樣好多代之後,再將兩個品種既鼠交配,失敗好多次之後,先可能會研究到新品種

但千萬唔好以為自行可以純合基因,因為生物學家純合基因時都出現好多問題,大約到6,7代近親繁殖後,就會有一出世就死鼠既情況,佢地會再用第D方法去改善,太詳細唔多講了,總之就係唔係一般家庭可以做到既方法
而生物學家咁樣既研究,可能就會犧牲極多既鼠先會研究到一隻健全既鼠

講左咁多呢D應該好悶吧,講一講近混種繁殖出唻既BB會有咩既可能:
1)DNA病毒
有機會會有一d DNA既病,屬於一D先天性既癌症,基本上可以話冇得醫既
2)遺傳病
基因出現問題,令隱性疾病既基因誘發出唻,有機會會令鼠鼠有糖尿病,濕尾症,腎病等嚴重疾病
3)肢體畸形
一出世已經有機會係缺少一d肢體,冇腳or冇牙等,由於有缺憾,所以好易會俾鼠媽媽覺得佢生存唔到而唔理,甚至食左佢.但就算過到鼠媽媽呢關,長大都會非常困難
4)殘廢
畸形既鼠,就算一出生身體上冇問題,但長大後,可能忽然會癱左咁
5)短命
近親繁殖OR混種既鼠鼠壽命一般都係較短
6)智商問題
呢個我冇睇過書OR研究,但都有話亂倫會令鼠鼠智商下降.
7)生活問題
一般都會生長較困難,亦會較惡
8)夭折
都有一出生就死既機會

B.另外,繁殖鼠鼠真係有好多問題(同品種都有呢D問題),希望你可以考慮一下唔好繁殖佢地,同埋可以一籠一鼠,原因如下:
1)倉鼠天生根本就係獨居動物,根本唔適合群居,就算兄弟姊妹,同性別or唔同性別,都一樣可以打到死晒.睇書知道,外國既鼠鼠繁殖場都係一籠放一隻鼠,到發情期先放埋一齊一陣既
2)鼠鼠既繁殖速度好快,而且繁殖鼠鼠有好多問題(例如鼠媽媽有機會會食bb,bb未戒奶就打交但又唔分開得),就算樣樣都解決到,都會令鼠鼠既生活質素下降,鼠媽媽生育後壽命又會縮短(甚至難產),好多隻鼠又會有第d問題,所以真係唔好俾鼠鼠生bb呢
3)可能你會話鼠店既鼠咁多隻一齊都冇事,但鼠店既鼠仲好細,所以唔會打得好犀利,而且你睇到鼠店既鼠既時間都未到深夜,唔係鼠鼠最活躍既時候,所以未必俾你見到有咩問題.但我曾經見過,鼠店一堆鼠入面,有隻鼠已經得返d白骨...所以鼠店講既野,,唔好盡信,鼠店有鼠死左都唔會俾客人知呢
4) 就算兩隻鼠初初唔打交,其實之後都好易再打,特別係鼠鼠夜晚活動既多,半夜打起上唻,你又唔知既時候,仲危險.我細個既時候都試過覺得2隻鼠好似好fd咁放埋一齊,同一胎,我出去一陣返唻就打死晒啦
5)可能會諗鼠鼠會怕悶,但其實鼠鼠天生獨來獨往,只要有足夠既空間同運動(一個轉輪都ok啦),鼠鼠就唔會悶

C.女鼠發情期係會背向天,身體較扁平,尾向天,有時你用人手摸佢背,佢都會擺出呢個準備交配既姿勢
男鼠發情期睪丸會漲大,會去聞女鼠既尾部,如果見到女鼠準備交配,就會爬上女鼠背部,再進行交配

回答 (2)