請問如果乘B！上大陸，附近有邊ｄ正氣骨場適合一家大小？

按幾多鐘先過得夜係睇你星期幾上去，星期六好多時都要3、4個鐘，仲要10-12點過後。我就試過好多間，我都係成日一家大細，所以實去大場。

其實間間都係沖涼，游水，浸水，乾濕蒸、包飲品同生果架咋，有得叫野食，但係冇得免費包埋食，所有場都係。當然如果你俾錢就另計，以前去開福田蘭桂芳，蔡灡都有介紹，真係各方面都好好，有水池SPA仲有泳衣借，好新好乾淨。但係最近試過一次星期六去就居然2點入房都唔俾我訓房，硬係話可能會有客。所以我以後都唔去了。不過如果你閒日去都唔錯，坐車去黃崗口岸有免費VAN仔車你。

另一我最近愛去地點係瑪雅城，係近羅湖，所以我會自己坐車去左東門樂園路海鮮街食左野先，果度通宵都開，我地成家6、7個人食都係唔駛200蚊，好難有第二度咁平，仲係叫好多海鮮架，正爆！然後我再去瑪雅城，果度其實6樓可以當酒店咁租住，大約280蚊，可以免三個人基本消費，帶細路去晒，上次我阿爸去唔想按摩，開左間房兩張大床都夠我地四個人訓。主要原因係佢至少要按3個鐘先有得訓房，我地淨係想按2個鐘。而家買500蚊vip card 有7抵，1500蚊就65折，如果你真係想按三個鐘訓都ok！同埋租房有8折，但係我上次星期六夜晚去就租唔到了結果要按4個鐘先有得訓房，勁多人帶d仔仔女女去游水，因為佢有個超大泳池，但係要自備泳衣，否則要買。佢乜野都有得玩，小型戲院同打機場都有，但我覺得你千祈唔好諗住去食飯囉，一個人食餐都3、4十蚊貴過香港，你自己諗。仲有寫小費要睇清楚張紙，有一次佢張紙就只可以揀50、100小費，我地俾開20、30蚊，原來要自己寫，我細佬同個朋友一間房又唔識喇，以為冇得揀，果個技師又係咁叫佢CLICK 50，咁佢就唔知CLICK左，好似俾佢呃左成百蚊咁。

其餘福田出名d場，在水一方、蔚藍海岸都冇我頭先講果兩間咁豪華乾淨。不過都係每人平均要俾200蚊到。

另外皇室假期係貴中之選，豪過晒我講果兩間，我有個同事成日去但係淨按摩都要3百幾，佢話食埋飯單人係600蚊落樓，太貴而且聽聞男賓去會問你特別服務，唔適合我地成家人去。

仲有好多我去過如：嘉年華會，月光城、友誼、皇馬，好多間都去過但係好多度都好似香港芬蘭浴賣廣告果d feel，去到過夜我都唔想留低，但係個個人要求唔一樣，你自己決定喇。
不過我講都係出自我自己經驗，因為我成日都有睇人地介紹新場同去試，但係好多網上或書介紹都不能信，因為都成日影左最靚果d俾你睇，以前我介紹好多朋友去蘭桂芳都話好，而家就係介紹瑪雅城。

仲要提一提好多店都有去到浴室擦背，佢會就咁叫你埋去擦，都冇講錢，我阿爸同阿妹男朋友連續中招，以為係基本服務包埋，結果50蚊擦十幾分鐘，仲要另俾小費，又俾人呃百幾蚊。

總括黎講就算去邊間都坐住要200蚊每人，有d會話$138中式(其實$88-158不等都有架)又送大堂服務1至兩項，大堂服務係修手，修腳，腳底按摩，按頭肩，洗臉之類，但係你諗下，佢送俾你你仲要逐樣野俾貼士，就算你好厚面皮咁樣樣俾10蚊計埋加一都要$200喇，仲有你俾得少佢就自不然會黑晒口面然後你就玩得都唔會開心，所以我從來都唔會去玩88蚊三個鐘，我玩果間蔚藍海岸日式168送2樣大堂，送到黎我仲要每樣野加多20-30蚊貼士，加到黎每個人成二百幾，仲貴過我去瑪雅城按3個鐘全身日式囉。

如果你去黃崗口岸，一出就好多間都有專車接送，有好多女仔成日住牌。出羅湖就瑪雅城、皇室假期都有，其他想去地方我會叫的士，反正咁多人。但如有的士站就的士站上，千萬不要上在街上兜搭的車。