扭計骰!!

曾經瘋摩一時o既扭計骰(唔知幾時...)，令到不少人茶飯不思，幾多市民比o的無良奸商騙去整好一粒無辨法整得好o既扭計骰黎換禮物(*其實係我做o既，唔係，係我作先o岩... ^.^)，離譜到就連返工時候o的工人都拎住黎玩，搞到o的老闆好似老師唔比學生帶玩具咁唔比伙記帶扭計骰返工，問你死未!!

係我呢個網頁會講下點玩 3x3x3 o既扭計骰o既。大家只要記熟步驟就可以好輕鬆咁整好佢嫁喇，雖然唔係咩快方法，但係練熟o既話兩分鐘內整好絕對唔係問題!!(不過淨係講淨色嫁咋，有機會先再講埋有公仔o既扭計骰或者其他唔同o既玩意啦。)

要學識整扭計骰最起碼你都要有粒骰掛，唔係就真係紙上談兵，如果有o既話就開始學整啦!! 無o既話都可以睇下o既，但係都去買返粒啦，十蚊大大粒扭到你手軟都得呀，o的咩國貨公司同玩具鋪都應該有掛，你識我o既話幫你買埋又點話o者。

*唔係講笑，真係有整唔好o既扭計骰嫁，所以你買果陣就最好買粒好似上面轉緊果粒咁係整好o既就最穩陣喇 ^.^
首先等我講解下我果o的自己覺得唔錯o既畫先，粒骰可以轉o既方向一共有十八個，每次轉一個方向可以分三層，所以見我o的畫都係分三層。跟據唔同情況就跟住第一幅有色果幅咁放，之後就一步步扭就得嫁喇，小心唔好成粒轉左位喎，記得一次係轉 90度，見到兩幅一樣o既唔好比佢嚇親，照跟無死嫁喇，係我廢事再畫180度o者...(一畫就十八幅嫁喇...>.<)

咁究竟點先叫砌好第一層呢？如下圖所示，要將一面及其四邊都整齊砌好咁就叫完成第一層喇。





第一層係三層中最容易砌好的一層，至於砌呢一層o既方法無甚麼特別，所以我係呢度都唔多講o的咩喇。係呢層有一點值得初學者注意，就係將一格o岩o既扭好同時千萬要注意其他已砌好o的格仔，應該將佢轉去第二面避一避先，再將佢砌返黎先o岩。下面o既係其中一o的例子，自己留意再因應不同情況自己加以變化。(o的畫係由左至右睇落去嫁!)




我自己就比較鍾意整好曬四隻角先o既，因為咁樣對色果陣會比較易就o的。


第二層破解法


完成左第一層之後就到第二層喇，其實第二層都無咩特別o既o者，只要記熟一個步驟就得嫁喇。首先就將第一層好似圖(1)咁放係下面，之後就好似圖(2)咁將四面o既中間果格轉到去同色o既一面。呢度仲未駛咩方法o既，因為果四格中間o既一定會齊齊整整咁對返齊嫁。(對唔齊就即係代表你買中扭唔返o既扭計骰喇 ^.^)


圖(1) 圖(2)

對齊曬中間果格之後就到扭埋第二層其餘果四格喇。只要跟住下面o既步驟就得嫁喇，下面雖然好似有兩個步驟咁，其實係分開左同右o者，如果你心水清就睇一個都得嫁喇。一個八下o既步驟就玩轉第二層，係唔係好容易呢？




咁就扭完第二層喇，如果大家遇到以下咁o既情況可以用返上面o既步驟將第三層是但一格扭落下先，再係第三層搵返果格扭落下就得嫁喇。練熟左就到最後一層喇，快o的學埋去啦!!

終於都到左最後一層，亦係最麻煩果層喇...( 所以我整到呢度有o的唔想整落去 ^.^! )係呢層可以話係有四個步驟，話雖如此，我要整出黎教大家都幾係野嫁，所以整得亂或者唔好咁唔該多多包涵 ^.^!

第一步
當頭兩層都整好左之後就開始第三層，首先要將第三層o既面好似下圖咁整成十字形，跟住以下o既方法就得嫁喇。


當你扭到第三層o既時候最下果面中間o既十字位如果唔係咁好彩整好曬o既話就不外乎下面果五個情況o既o者，如果唔係圖(4)同圖(5)果個情況o既話都是但搵一個方向跟住下面個方法咁扭，但係留意一旦變成圖(4)或圖(5)咁就要擺返正確個位先繼續喎。個位係反轉o既"L"，唔理其他格仔點樣，總之有圖(4)咁o既三格就得。








咁樣扭完一次之後未必就會變成扭成一個十字，咁樣o既話就扭多幾次呢個步驟直到得為止，記住個反轉o既"L"喎。仲有就係唔駛理十字o既側面o的色o岩唔o岩住。




第二步
扭好中間o既十字就到將四隻角放好位，記住放好就得喇，唔駛理顏色有無調轉。好似下圖咁樣都叫做o岩。


其實我覺得扭呢四隻角係最難果度，不只要記住步驟，更要考大家的頭腦，要心水清先得，我都係寫到呢斷唔知應該點教大家果陣先至發現到......>.<

其實我淨係識將上圖無顏色果三隻角順時針咁轉位，但係咁就夠喇，只要大家心水清。重點在於大家係扭之前望清楚四角o既位置，如果可以係轉到得一隻角係o岩o既就唔駛煩啦，因為如果係咁其餘三隻角奉旨係順/逆時針轉左位。

如果點轉到係兩隻o岩o既時候就睇清楚點樣可以轉到得一隻o岩，都係用下面果個方法就得，所以扭呢四隻角都要有o的經驗嫁。 (呢個就係我寫果陣發現果樣o野^.^。仲有，機於數學上o既問題係唔會有三隻角o岩一隻角錯o既出現，否則你果粒骰又係扭唔返果o的^.^)




係右下方果粒o既只係代表我一直講緊o岩果粒，並唔需要好似圖咁顏色o既位都o岩。兩其餘o既藍紅紫係代表唔o岩o既三粒係轉完之後o既順時針轉位。逆時針o既方法唔駛教啦，大家轉多次就得啦 ^.^ (都講下啦，唔明就算，係將上面o既方法整個轉做從右開始，而o岩果粒要放係左下方。咁講啦，即係將上面o既步驟轉成34127856)




第三步
係呢個步驟係要將四隻角連顏色都轉o岩埋!!(我地已經將四隻角歸位嫁喇，所以轉o岩顏色當然係每隻角o既三面都o岩啦。) 呢個步驟要畫出黎比較麻煩亦唔清楚，希望大家唔好介意。

首先都係講解下先，下面o既步驟會將三隻角各自係本身個位逆時針轉一次，睇住係邊三隻角轉喎，而圖中白色o既角係唔會轉o既。大家留意最上層轉前同轉後三隻角o既分別，睇住係點轉法，則面o的格仔唔駛理住先。





賣大包教埋大家順時針轉o既方法，就係將上面轉o既方向反轉就得嫁囀，即係第一幅變成向上轉，第二幅變成向左轉，如此類推。不過咁樣o既話隻唔轉o既角就會變成係左下角，下面兩幅圖係順時針轉法o既轉前同轉後o既情況。

扭呢幾隻角通常轉一到兩次上面o既步驟就得嫁喇，大家睇清楚呢四隻角先再搵下係要點轉法。


轉前 轉後

大家留意住四隻角未必係得三隻角一齊順或者逆左位，如果係兩隻o岩，一隻要轉順時針一隻要轉逆時針o既時候可以將要逆轉o既角放係唔轉o既位轉一次順時針，咁樣就會將o岩o既兩隻角變成要逆轉，咁要順轉o既角就會o岩左位，之後就用逆轉將剩低o既三隻角都轉好啦。




最後一步!!
係第一步我地扭左o既十字位其實只係扭正個面，通常佢地互相之間係調左位o既 (話係通常係因為唔排除你咁好彩係o岩o既) ，呢步就係要將佢地換返o岩個位喇。

以下教大家o既係將上下右三粒逆時針轉位。大家不妨留言下第三至第八步，可以試下係粒o岩o既扭針骰度試下有咩情況出現。大家想識順時針o既轉法就將呢幾步研究下，再諗下之前兩步同之後兩步係用黎做咩。諗唔到o既話扭兩次個步驟咪就係順時針囉。^.^




** **
最後呢四格一係唔錯，一錯就起碼錯三粒嫁喇，所以大家唔駛驚話如果得兩粒錯咁點算好o既問題。如果錯四粒o既話就要轉兩次上面o既步驟喇。 (第一次轉返好一格，第二次轉埋其餘o既三格，呢樣係奉旨o既。)好似之前o既兩個步驟一樣。睇清楚先再決定啦。 (有經驗的我當然唔駛點睇啦 ^.^)




好喇，大家如果詳細咁睇完之後都識得點整扭計骰啦，咁我都功得圓滿喇......

大家如果有咩唔明o既話可以電郵比我，識我o既話直頭走黎問我仲好，我相信我應該回答到你地o既疑問o既。

冇可能笞到你ga......