煲薑醋的詳細製造方法

要煲出靚薑醋, 記住只用甜醋, 不要加酸醋.
薑的處理: 刮好之後, 攤開吹乾, 然後用刀拍鬆, 再放少少油用鑊爆, 有少少金黃便可, 用意抽乾水份.
煲滾醋之後放下已處理好的薑, 第一次要煲耐d, 兩個鍾左右啦, 然後每隔一星期煲一次, 每次要over 半個鍾, 如果天氣熱, 可能要煲密d.
蛋的處理: 如喜歡吃硬蛋, 要早一些落, 最少跟薑煲兩三次, 因愈浸得耐, d蛋愈硬. 如吃普通醋蛋, 則吃之前一日放便可.
豬手: 吃之前一日, 買回來出水後, 放入醋內煲45-60分鐘, 然後浸一晚, 吃時再煲滾便可.
每次下蛋和豬手時必須先煲滾醋.
如要派送的人太多, 可用兩個煲, 先做好個薑醋底, 然後再分開煲, d薑最後會好似糖薑咁好味.

煲薑醋的製法
=======================================
材料(十人份量)：

十斤(4.8公升) 八珍甜醋

五斤去皮生薑

兩隻豬腳 (亦可選用質地較柔嫩的豬手)， 斬開約八至十件

熟去殼雞蛋十隻

一斤八珍黑糯米醋

做法： 產前一個月

預先將甜醋及生薑放入瓦煲內大火煮兩小時

每隔一星期煲滾一次， 以免細箘及霉箘滋生

派送前一天

把豬手豬腳放入滾水中飛水去油及沖洗乾淨

把豬手豬腳放入已預備好的薑醋中煮滾

以慢火煲豬手豬腳至腍熟，加入八珍黑糯米醋稀釋及增加鮮味

下雞蛋再煲十分鐘， 即可趁熱享用


除了自奉進補外， 在小寶寶出生後第十二天 (俗稱十二朝) 向親朋好友派發豬腳薑以宣佈小生命到臨亦是中國家庭代代相傳的慶祝習俗；而在小寶寶彌月宴席上， 豬腳薑也是不可缺少的菜式！

速煲薑醋製法

兩日搞掂第三日食得的快速煲薑醋法(即十二朝前兩日先整)。

材料：

甜醋2500ml、黑糯米醋250ml、豬腳兩隻
老薑2斤、粗鹽1茶匙、雞蛋(隨意)

製法：

第一日
1）將生薑刮去皮沖洗乾淨
2）拍薑～抹乾水份切厚件輕輕拍鬆。
3）烘薑～(少油、粗鹽)少油將薑放入白鑊灑下粗鹽以中慢火把薑烘至乾身、軟身。

4）另一邊煲醋，烘完將薑放入醋內(最少煲四小時)。

第二日
1）豬腳～放入滾水中以中火煮10分鐘，再轉調慢火煮45分鐘，撈起放入一盤水喉水中，再用水不斷沖至凍晒為上(內外都凍)，沖洗乾淨瀝乾水份。

之後將豬腳放入醋內煲(一定要薑墊煲底)，



煲到豬腳直至可用筷子穿得過為止(最少煲四小時)。
2）另一邊側可以將雞蛋烚熟後去殼，(去殼後蛋一定要乾身)先可放入薑醋。


第三日
吃時可把薑醋再次煮滾即食。

＊如要加豬腳再重覆第日的步驟＊

提示：
1）煮豬腳薑要買豬腳，不要用豬手。因為食豬腳薑是食其豬皮筋腱，而豬手的瘦肉比較多，用醋浸後會變得乾硬不好吃。但喜歡食豬手亦可以加的。
2）浸豬腳薑的醋汁可多次使用。但豬腳不宜一次過落太多，否則豬腳膠質重會令醋汁太濃。
3）除了豬腳薑外亦可加入雞蛋，但雞蛋不宜浸得時間太長，免至變得乾硬不好吃。

醋的發源：
相傳晉朝竹林七賢劉伶放浪形骸，極愛飲酒作樂，甚令其妻吳氏厭惡反感，因此吳氏在劉伶製酒的甕中加入鹽梅，
誤打誤撞醞釀醋的成形，後人依法仿效，相傳至今已有千年歷史。
吃醋的好處：
(1)殺菌效果佳，幫助體內環保。 (2)平衡體內酸鹼值，健康加分!!
(3)幫助腸胃消化，消除疲勞，容光煥發。
(4)去腥除臭效果佳，媽媽廚房好幫手!!


食醋心得：
(1)薑醋~一定要用甜醋、白醋。 (2)鹵水鹅~一定要點蒜粒白醋。
(3)大閘蟹~一定要點鎮江黑醋。 (4)食翅﹛酒樓或街邊﹜~最好落大紅浙醋。